小寶寶係男仔定女仔?! 開估!!!

27 Mar 2007

放咗工同張先生去咗睇小寶寶呢~~ 小寶寶16週大啦! 不過我地等咗成兩個鐘至有得見小寶寶一面呢~~

醫生係咪將個超聲波係肚皮上面碌黎碌去, 首先醫生檢查個頭仔, 眼仔鼻仔有齊, 咀唇仔兩片, 確定咗無兔唇, 跟住腦部發育正常, 頭頂直徑有3點幾cm!

跟住醫生就檢查脊骨同埋胸骨, 好明顯地睇到呢~~ 跟住醫生指住呢度個度話係胃、肝呀等等, 但成pet嘢, 真係唔識睇呢~~ 然後醫生係度同我地數手指仔腳指仔, 十隻手指十隻腳指都齊晒, 好得意呢, 細細粒咁~~ haha......

當個超聲波係肚皮上碌黎碌去時, 心諗: 點解醫生仲未話小寶寶係男仔定係女仔嘅?!

大家係咪好心急想知小寶寶係男仔定女仔呢~~

正當我想問醫生時, 醫生就指住小寶寶嘅重要部位, 而小寶寶亦好合作, 好開放咁俾我地睇到......

醫生

 : 呢個突出黎嘅, 就係 "啫啫" 啦

張師奶

 : haha...... 呢個就係啦! 咁得意嘅 (心諗: 咁似臘筆小新個何b仔嘅~~)

跟住醫生繼續檢查, 小寶寶大脾骨, 都有成2點幾cm呀! 照下照下, 醫生又指住話......

醫生

 : 呢兩條就係大脾骨, 中間呢個就係 "啫啫" 啦

在旁嘅張先生仍然無乜反應...... 原來佢聽唔到醫生係度講乜, 一來佢企咗係醫生後面, 二來醫生好養聲, 講嘢好似無氣咁又陰聲細氣, 所以張先生咪由頭到尾都唔知醫生講乜囉~~

檢查完畢, 就輪到同醫生傾計嘅時間, 張先生第一個問題就問醫生......

張先生

 : 醫生, 真係仔黎架?!

醫生

 : 有 "啫啫" 唔係仔係乜丫?!

張先生

  : .........................................

此情此景, 我覺得好搞笑呀! haha.......................................

做完檢查, 我地速速去咗尖沙咀搵食, 行過金巴利道街巿(原來個度有個街巿都唔知添~~), 門口有個妹記大排檔嘅宣傳牌, 見入面咁多人食, 唔通好好味, 於是同張先生入去一試!

個度d服務都幾好喎, 拎到d碗筷子埋黎仲幫我地洗埋喎~~ 最得意係, 佢地唔係俾啤酒杯d客人飲啤酒, 係俾個雪凍咗嘅碗~~

呢個就係一碗啤酒, 而唔係一杯啤酒, 碗入面仲要有個勝字, 型呀!!!

我地叫咗個招牌唔知咩雞煲, 好香, 但辣, 唔見特別出色, 但都好味嘅~~ 另外叫咗碟油條讓墨魚, 呢個好味, 炸到條油炸鬼脆卜卜, 好香呢~~ 張先生話送酒一流喎! 同埋叫咗碟粉絲蒸絲瓜, 好香好入味, 正!

因為肚餓得濟, d餸一黎就顧住食食食, 食咗一半至記得影相!!! 結果, 都係繼續食食食, 無影低俾大家睇, haha......

 

食飽飽就回歸!!! 沖完個靚涼, 又歎一歎尋日放工自己去沙田逛街時買嘅超好味士多啤梨! (唔係特登去買架~~ 係咁啱路過而又心癢癢想食, 又忍唔住手買咗盒黎食, 今次第d呀, 同樣68蚊一盒, 但呢盒有9粒呢~~ haha......)