好辛苦的一天

5 Mar 2007

唔知點解?! 今日起身都好地地, 一搭火車時, 唔知關唔關個香水女子事, 佢企正係我面前, 身上個陣香水味勁濃郁, 陣陣香氣係咁飄過黎, 唔知係咪果陣香氣, 令到我搭火車搭到頭暈陀陀兼作嘔呢?!

好不容易至捱到落車, 返到公司竟然食唔落個早餐, 但食唔落點都食啃咗佢! 大o既唔食, 細o既都要食丫~~

成朝混混沌沌咁渡過, 超勁眼瞓 

好不容易先捱到lunch, 食飽飽就速速眠一眠, 抖一抖, 諗住會好d~~ 點知..........................

公司裡面一位 "好" 同事, 唔單止開到個收音機大大聲, 都算啦~~ 佢不嬲都係咁! 我咪聽住mp3黎瞓, 但聽住mp3都聽到佢 "kit" 報紙 "kit" 到烚烚聲o既聲浪! 都算啦~~ 實在太攰啦!

正當進入夢鄉之際

個同事竟然係我附近個介紙器度介紙, 介到 "習習" 聲  搞到咩睡意到俾佢 "習" 走晒! 都唔知佢突登還是有意架! 佢實見到我係度眠繄, 因為佢實要經過我個位至去到介紙器度! 佢有心好, 無心好, 我都俾佢嘈到瞓唔到, 唯有出counter同姐姐仔傾計過日晨!

結果, 這個下午又係混混沌沌, 超勁眼瞓, 頭痛到爆咁渡過!

原本夜晚約咗亞珊食飯, 結果都放咗佢飛機, 真係唔好意思呢~~~~