黃梅天+嘉年華

11 Mar 2007

尋晚張先生好夜至收工, 返到屋企都已經點幾鐘, 今朝一早又要返工, 真係辛苦呢~~

一早十點幾, 張先生打電黎話佢一陣會係屋企附近個球場做嘢, 因為要係個嘉年華度幫手, 問我去唔去睇表演! 瞓到唔多想郁嘅我, 就答咗佢唔去! 但收咗線, 又瞓唔返喎......

於是就起身梳洗完, 食過豐富早餐之後, 就去俾個驚喜張先生, 出現係佢面前! 順便帶小寶寶去見識下, 睇下有無靚仔大隻消防員哥哥!

  (答案係唔多覺有架!!!)

點知...... 張先生將佢stand by嘅時間話我知, 搞到我早咗去到, 企係度無無聊聊咁! 於是自己四圍逛下! 鑑於近日天氣勁潮濕, 屋企晾咗d衫兩三日, 仍然好似啱啱係洗衣機拎出黎咁, 非常討厭, 於是去咗百老滙睇抽濕機!

睇中一部係日立牌, 四千幾蚊折咗三千幾, 另一部係惠而浦, 舊款個部二千八百幾, 折咗二千三百幾, 兩部抽濕量都係20公升, 水箱容量4.5公升, 前者就大部過後者, 所以都心郁郁想買惠而浦個部! 於是拎咗份catalog俾張先生過目, 經大家商議過, 法定買惠而浦個部!

講返嘉年華個度, 天氣唔多好, 落毛毛雨, 因為天氣關係, 開幕禮就延遲, 將表演項目做先, 首先d消防員哥哥開咗張氣墊, 有兩個消防員哥哥從高處跳落個氣墊度! 好一個無聊嘅表演環節!

跟住就係表演用個 "犀利鉗" 開鐵閘, 呢個鉗好勁架! (其實個鉗有名, 但我唔記叫咩lu~~ 咪叫佢做 "犀利鉗" 囉~~) 連車禍時剪開個車頂救人都係靠佢架! (個消防員哥哥話) 呢個環節都曾幾何時參觀消防局開放日睇過! 都算係吸引嘅~~

之後就表演用滅火筒! 表演員就邀請巿民試下用滅火筒, 但有興趣嘅巿民全部都係小朋友, haha......

表演完個開幕禮就開始, 張先生都做完嘢就走人, 咁我咪獨個兒返屋企!

返屋企途中就去咗買抽濕機, 最後買咗惠而浦新款個部, 比舊款都係貴200蚊左右, 更係買部新款啦~~

 若要送貨就要等到星期三, 等咁多日到時都唔知仲潮唔潮濕囉~~~~~ 之但係自己又拎唔得重嘢! (拎到一定自己拎咗先, 實在太難頂嘅黃梅天) 所以還是等聽日張先生放工至去攞!

 

 <-- 我就係買咗呢部啦!!!

(圖片摘錄自: http://www.whirlpool.com.hk/sc_webcat/ecat/product_view.php?lang=2&id=580&color=white&image_num=)