粉嶺龍山寺

3 Mar 2007

張先生放工就揸車黎娘家接我, 當大家討論去邊度食早餐時, 突然之間想食齋, 於是張先生提議帶我去粉嶺龍山寺, 佢好耐好耐之前去過食齋, 而我就未去過!

坐車又係坐到我頭暈暈兼想嘔! 都幾辛苦! 落咗車要係寺附近個公園仔坐一陣, 抖一抖至回復心情、狀態呢~~ 因乜解究呢幾日身體會咁咋斗架!!!

好隱居feel嘅一間寺廟! 環顧四周都係草木! 感覺好舒服!

抖咗陣, 雖然我地無宗教信仰, 但入廟當然要拜神, 上返注香, 以示敬意! 跟住四圍行咗陣, 見到有幾棵許願樹, 我地就攞咗張紙(個度提供埋), 然後綁係樹上面! (狀態未回覆, 唔記得影返張相添~~)

跟住我地去咗齋堂食齋, 叫咗個價值120蚊嘅二人餐, 有二味齌拼盤、羅漢齋同埋腐皮鴨! (肚餓得濟掛住食, 又唔記影底俾大家睇添~~) 拼盤就一般, 羅漢齋好味, 腐皮鴨更加好味, 因為即炸, d腐皮脆卜卜, 好香, 真係好好味! 之前去過粉嶺蓬瀛仙館食過, 雖然蓬瀛仙館嘅齋菜款式選擇較多, 但感覺商業化d~~ 

食飽飽就同張先生四圍閒逛, 幫助消化, 呢度有好幾個錦鯉魚池呢~~ 養咗好多錦鯉

呢個係其中一個魚池, 正值有其他途人係度餵魚呢~~ 所以成堆圍埋係度, d魚好大條, 個咀大大的

呢個係另一個魚池, 裡面有個大水車添架~~ 又係養咗好多錦鯉

個度d魚池除咗好多錦鯉之外, 仲有好多龜, d龜仲要係大大隻, 大過我嘅手掌添呀!

我諗係d人係呢度放生多呢~~

仲有十二生肖石像, 我地分別係各嘅生肖前影相, 當然唔少得小寶寶嘅生肖 ~~ 豬豬啦!

大家睇下呢隻大肥豬樣子幾牙擦! 但牙擦得黎又幾可愛, haha.....

逛到咁上下我地就返屋企lu~~ 因為好攰啦~~~ 加上張先生夜晚要開工呢! 今晚張老太返咗黎煲湯俾我飲, 又係山班魚淮山粟米豬骨湯! 再加碟菜心! 又係一式一樣嘅餸菜! 咁啱爸爸拎咗d新鮮蕃茄俾我, 所以加多一碟蕃茄蛋! haha...... 今晚就係得我、張老太同張老伯三個人食飯!