辛苦

10 Jan 2007

放咗一日病假, 下晝去咗屯門醫院覆診. 個醫生都好後生, 應該係見習醫生吧~~

佢話個水泡應該係功能性水泡, 正常懷孕時都會有個水泡! 寫咗張醫生紙俾我去健康院排期檢查, 我同張先生都決定唔會去屯門醫院生, 決定去廣華排! 聽同事講廣華生幾好呢~~

睇完醫生, 係吉吉島逛咗陣, 買條舒服d嘅鬆身運動褲, 原來買條褲都咁難, 行咗好耐都睇唔啱心水, 逛咗好多間先買到一條舒服運動褲呢~~ 買完褲就返娘家食飯, 仲要裝作若無期事咁, 都好辛苦呢~~

今晚將有咗小寶寶嘅消息話俾爸爸媽咪知, 佢地無咩反應(因為佢兩老係d比較含蓄嘅人), 但我知道其實佢地係好開心架! 因為佢地好鍾意細路仔呢~~ 更何況今云有孫抱! haha...

自知道懷孕消息之後, 想嘔、好攰、周身唔妥嘅感覺越黎越強烈, 食飽個肚又頂住一肚氣, 想er出黎又er唔出, 嘔又嘔唔出

唉……………….. 超勁辛苦呢~~~~~~~~~~~

*****************************************************************************

11 Jan 2007

起床返工好辛苦, 但點都要爬起身返工呢! 搭火車時, 遇正一名肥女子坐係隔離, 佢身上嘅香氣真係好惡頂, 搞到我勁想嘔

想瞓又瞓唔着, 唔坐的話, 我又好攰, 又無可能! 

去到火炭, 坐隔離個姐姐仔落火車, 於是用最快速度坐過隔離, 隔開一下都好, 起碼陣味無咁強烈先丫~~

唔知係咪唔夠瞓嘅關係, 返到公司好攰, 好眼瞓, 頭好痛, 頂唔順, 去咗睇王醫生, 王醫生都好好, 肯寫兩日病假俾我, 同埋寫咗隻維他命丸俾我, 話食黎補充維他命! 不過就要自己去藥房配呢~~

呢幾晚, 瞓到四五點左右就醒咗, 呢一醒, 發覺原來係要去toilet嘅先兆, 但係去完之後, 撻返落床, 竟然碌黎碌去都瞓唔着, 但其實就好攰, 好痛苦呀~~~