第一次嘅廣華產檢

1 Feb 2007

 

終於有一晚可以睡得安樂啦~~

 

今朝同張先生一齊去咗廣華醫院檢查, 今次係第一次去政府做檢查呢~~ 去到好多人坐晒係度等, 差不多爆滿, 今年真係好多孕婦呢~~

 

等候期間, 好肚餓, 所以張先生去咗買三文治俾我頂肚, 點知....... 就係佢去咗買三文治嘅期間, 竟然叫我名去照超聲波

  張先生今次無緣見小寶寶一面添~~

 

小寶寶九週大啦~~ (但係同張醫生診段有所出入, 張醫生嘅診段係八週), 成個豆號咁, 好有趣呢~~ 見到好微弱嘅一點係度閃下閃下, 就係小寶寶嘅心跳!

 

今次檢查除咗照超聲波, 仲有度高磅重、驗小便、抽血同埋見醫生! 今次見呢個醫生好nice, 好好人, 又滿帶笑容, 唔似屯門醫院個d婦科醫生, 黑口黑面! 唔知下次覆診會唔會遇返呢位醫生呢?!

 

好可惜, 沒有被助產士小組選中, 聽同事講過, 助產士小組d人好好, 又會教你點照顧小寶寶等等知識! 問護士, 佢話應該滿咗額! 又係嘅~~ 係我前面有咁多孕婦, 要揀都一早揀晒啦!!! 真可惜呀!!!

 

做完檢查, 我地去咗食嘢, 跟住閑逛咗一陣就去咗睇戲, 睇<人獸戰>, 其實唔係好想睇呢d戲, 驚嚇親小寶寶, 但張先生好想睇, 於是咪順下佢意囉~~ 最多自己咪入場瞓覺! 點知............................ 一開場無耐, d血腥場面好屈突呀!!! 驚影响到小寶寶, 合埋雙眼唔敢睇呀~~

 

望住張先生, 佢嘅反應係: 無諗過套戲咁屈突! 

有幾個場面無啦啦彈d嘢出黎, 俾佢嚇親呀! 最老土係, 完場時, d字都係咁打出黎, 無啦啦有個場景出現, 臨走都俾佢嚇咗一嘢 == (小寶寶出世時唔知心口會唔會多執毛 )

 

睇完戲, 張先生陪我食晚飯, 因為佢今晚要去飲呢~~ 唔知點解, 睇完戲之後好攰, 好似周身唔舒服咁, 佢送我搭車期間, 辛苦得濟, 無啦啦對住張先生喊, 平時好少咁易喊嘅我, 唔知點解突然之間會咁! haha...... 嚇親張先生!