慶祝爸爸節 + 端午做節

17 June 2007

尋晚同自己爸爸慶祝, 今晚就同張先生老豆慶祝, 順便端午節做節! (好囉~~ 終於唔駛成村人上黎我屋企做節! 唔駛搞到烏煙脹氣! 唔駛進行事後大清潔! 唔駛煩囉~~)

不過食飯尾聲時, 發生咗一段小插曲........................

隔離枱有個女人走過黎, 企係張二嫂面前, 撓晒手, 態度當然唔方好(黑口黑面), 話張二嫂個仔行黎行去, 成日撞到佢老豆(其實撞到張凳, 間接撞到個位伯伯), 又話老人家唔出聲遮~~ 撞親老人家就唔好啦! 成埋大人淨係掛住講嘢, 都唔睇下d細路!

張二哥同張二嫂再加埋張老伯張老太四個人都已同個女人講唔好意思! 個女人行返自己個位(佢面對住我地張枱), 隻眼仲啤啤供, 嘴苗苗咁! 跟住就出事........................

張先生行過去同個女人講道理(因為我地已經同佢道歉咗, 佢仲咁嘅態度), 最後搞到兩家人係度罵戰!  成間酒樓d人都望住晒, 真係非常尷尬!

個女人一開始已經態度差, 張二嫂佢地都已經灑晒冧同佢地講唔好意思架啦~~ 同埋一個正常曉行曉走嘅細路, 行黎行去好正常遮! 佢撞到人, 被撞個個唔出聲, 我地d大人邊知! 唔通成餐飯, 係咁"目及"住個細路咩~~ 撞到你, 你咪同我地講! 我地又唔係無道歉! 道完歉仲要咁嘅態度, 真係唔知呢d係咩~~~~~~~~人黎!

係罵戰期間, 個女人竟然行埋張先生度挺晒胸咁兇張先生! (咩........ 女人黎架!) 見勢色唔對, 孕婦唯有用狗牛二虎之力拉開張先生! 始終一個男人對住一個女人, 個男人會蝕底d~~ 個女人夠膽死兇高大過佢嘅男人, 有咩做唔出! 結果, 孕婦拉開咗張先生(擔心會出事呀!), 淨底張三哥張二嫂佢地同個班人"理論"....

張先生同個女人理論期間, d人真係超..........................無品, 竟然講咗句 "有爺生無乸教"

 我聽到我都覺得好嬲! 好慶呀! 我都想話個女人, 但又要禁住張先生, 唔得閒話個八婆! (孕婦係斯文人都忍唔住要叫佢一聲八婆)

個細路仔行黎行去撞到人遮~~ 有幾大件事呀! 呢d說話都可以講得出嘅~~ 我反而覺得佢至係囉! 咁大個人, 人地都同佢地道咗歉啦~~ 咁嘅嘴臉之餘, 仲要咁無口德!

呢個社會某部份人真係唔知應該用咩字黎形容! 鍾意小事化大, 鍾意持惡行事, 鍾意蝦得就蝦, 鍾意話人唔駛本, 鍾意行為缺德之餘連把口都咁衰到貼地! ..........................