27週檢查

13 June 2007

今日係好忙嘅一日呀~~~

9:45am 獨自去到廣華, 因為今朝張先生9點至放工, 等埋佢會趕唔切, 所以自已搭車去報到先! 點知趕住出門口, 唔記得帶小便!

搭車期間, 企係隔離有個唔識嘅師奶, 無啦啦撩我傾計喎! 佢見我個肚咁大, 話好辛苦呢~~ 跟住佢就同我分享佢嘅生仔經! 原來佢啱啱生完, 個女家陣4個月呢~~ 仲有個大女! 開刀同順產都經歷過, 佢都話有得揀千其唔好開刀, 生時唔痛, 但麻醉藥散咗就痛到喊

大家傾下傾下就好快到站!

10點幾張先生就黎到, 之後好快就見醫生, 見醫生又係聽下小寶寶心跳, 度下肚皮(其實唔知佢度乜), 呢個醫生nice過上次個個, 不過又係好後生! 今次要抽血, 仲要抽兩支, 中期血糖檢查同埋唔記得咩檢查! 等見醫生時仲食咗個吞拿魚包頂肚餓添~~ 希望唔會影響血糖測試, 聽聞飲糖水test好痛苦架!

等抽血仲耐過與醫生見面呀! 因為個抽血姑娘係咁搵個孕婦嘅血管, 搵咗好耐, 個孕婦驚到擰咩晒面! 面都紅晒, 我諗佢應該好怕抽血吧!

抽埋血都未過十一點, 於是同張先生去咗食碗麵! 仲有成個幾鐘頭至去照4D, 於是去咗朗豪坊Food Court坐, 好似d亞公亞婆咁, 係商場嘆冷氣睇報紙, 等時間過~~

12:30pm 去咗旺角中心林醫生樹照4D, 係Blog友ar lin介紹! 第一次照, 心情好興奮! 以為book咗唔駛等好耐, 但都等咗差唔多成個鐘至有得照! 林醫生問咗一輪, 跟住檢查乳房, 之後就同張先生一齊見小寶寶!

初初小寶寶都唔係好合作, 淨係見佢合住雙手, 塊面仔擰咩一面, 搞到淨係睇到佢側面, 睇咗好耐, 佢越擰越咩

 我拍下小寶寶, 同佢講, 你俾我地睇下你個樣啦~~ 醫生唯有睇住其他地方先! 今次好肯定佢係B仔, 因為好清楚咁見到佢啫啫!

之後醫生再照返小寶寶個樣, 佢終於肯俾正面我地睇啦~~ (唔知佢係咪真係識得聽我講嘢呢?!)

好得意呀! 睇得算係清楚! 睇得我同張先生都好興奮呀! 我望住小寶寶嘅嘴仔時, 第一個反應係: 好似爸爸呀! 嘴角翹翹咁! 但我睇唔到小寶寶有邊忽似我

 睇黎要等佢出咗世至知!

小寶寶可能瞓緊覺, 無乜點郁! 無食手指! 但係見到佢卒眼仔, d手指那下那下, 嘴mark mark咁, 好神奇, 好得意! 有幾秒時間佢隻手仔係咁郁, 好似係度跳緊 "爬啦爬拿" 咁~~~~~ 我地同埋醫生都係度笑!

初初佢合住雙手架! 跟住就無合, 一隻手仔托住面仔, 另一隻手就搭係另一隻手上面, 個樣好似係度沉思緊咁! 好過癮! 咁細個就咁多嘢諗?! 會唔會因為佢媽媽我多嘢諗, 搞到佢都咁多嘢諗呢?!

有個post好搞笑, 成個咸旦超人咁! 兩隻手仔十字咁擺

照咗大約20分鐘! 整個過程都令人好興奮呀!

之後仲有成個幾鐘至夠鐘見張醫生, 於是同張先生去食下午茶, 等時間過!

好不容易至到3:45pm呢~~ 等咗個零鐘就有得見醫生! (每次都等成兩個幾鐘架~~) 磅重時比起上次重咗成9磅(但今朝係廣華磅152磅, 不過就未食嘢磅! 下晝係林醫生磅就155磅, 跟住係張醫生度磅158磅

) 連張醫生都寧寧頭, 又重9磅, 我問係咪我食咗嘢磅嘅關係?! 佢就話唔關係!

張醫生話小寶寶係中碼大少少嘅BB, 係大頭B! 依家有2點幾磅! 頭仔已轉咗係下面! 問醫生估計小寶寶出世會有幾磅, 醫生話我同張先生都咁高大, 可能起碼會有8磅重! 希望能夠順產啦! 唔想開刀呢~~

睇完醫生就返屋企煮飯仔!