寫菜單 ~ 餸菜篇

講返菜單方面, 其實都唔係好識咩叫好, 咩叫唔好, 淨係知有全豬、全雞、翅、魚呢d基本一定要有!

我地join個個餐係席間任飲啤酒、汽水同埋勁寶橙汁, 之前落訂時, 個菜單係果汁先生, 但吳經理話好多客投訴果汁先生唔好飲, 所以佢地換咗勁寶橙汁, 我就未飲過, 吳經理話呢隻好飲d~~ (都唔知係咪?!)

個菜單有樣唔好, 就係條魚 -- 清蒸雙星斑, 邊有人擺酒會兩條魚上碟架?! 同埋放得兩條魚上碟都唔方大條! 咁咪好唔得體囉~~ 通常都係一大條架麻~~

於是咪問吳經理: 轉一大條魚得唔得?!

吳經理: 轉大星斑要加四百蚊!

張師奶: 下~~ 四百蚊咁貴?! 係其他菜度轉個平d嘅餸抵賞返得唔得呀?

吳經理: 唔得架喎~~ 不過, 如果你唔想加錢而又想要大魚, 咁我可以幫你轉條老虎斑, 一樣咁上下大條, 都好得體~~

張師奶(心諗): 條條大魚蒸熟咗都係咁上下樣架啦~~ 應該都無乜分別嘅遮, 最緊要搬出黎夠大體就得~~~

結果, 個味清蒸雙星斑就變咗清蒸大海石斑!

豬豬個度, 問咗吳經理如果有賓客想拎走個豬頭會唔會額外收費, 其實都唔係好想問呢個問題, 覺得好肉酸咁, hehe.....但同事fe fe 人教落, d酒樓好奸, 乜都要問清問楚, 到時包走要額外收費就費事大家咬喎~~ 所以都尷尷尬尬咁問咗呢個問題~~ 答案係: 唔駛收任何費用! 起菜時記住同待應講聲留起就得!!!

糖水方面, 叫做濃情蜜意, 即係蓮子紅豆沙, 問吳經理有無得加湯圓, 佢都係個句: 無架喎~~

至於到最尾個合時甜西橙, 一枱12個, 咁就唔駛煩, 唔駛自己買去囉~~~