過大禮

今日係過大禮o既大日子, 淨係叫咗亞麻同亞婆過黎屋企. 尋晚媽咪話駛唔駛叫埋姑姑黎, 我話費事煩, 成村人係度嘈呢嘈路, 已經幾十樣嘢要煩, 佢地黎到又嘈, 煩上加煩,  再加上Pizza妹妹見咁多人係度實嘈嘈閉, 所以都係唔好叫咁多人黎~~

原來過大禮準新娘係唔可以留係家中, 個日亦唔可以見到準新郎, 如果新郎無攞嘢過黎, 淨係d兄弟攞黎o既話, 準新娘就可以係屋企~~ 媽咪問過朋友, 佢都話係~~

結果, 係張先生上到我屋企之前, 我就要離開屋企, 落樓下食碗麵, 直至張先生離開我屋企之後, 我先可以回家呢~~~~~

食麵期間, 成日心思思想裝下張先生, 睇下會唔會見到佢(食麵位置係有機會見到佢呢~~ ) 越係唔見得就越想望下, hehe......  既然知道有咁o既規條, 為有乖乖服從吧~~~

因為媽咪好隨和, 又係怕麻煩o既人, 唔駛要乜要物, 所以乜都利是代替, 唔駛煩, haha......

所以張先生今日攞咗兩籃過大禮o既套裝(兩對椰子、茶葉、龍鳳燭、對聯、檳榔、八涼果、扁柏)、兩盒糖餅、兩盒龍鳳餅、兩籃生果、禮金、牲口金、包羅萬有金、舅仔褲金同埋姨仔裙金! 跟住佢又拎返一半返屋企!

今日總算順利渡過, 又搞掂一樣~~  可以派帖俾人啦~~ haha......