深圳搜購結婚物資

5 Nov 2006

與張先生北上, 去咗買d結婚用品同埋攞第二輯相!!! 好開心呢~~

第一站, 我地去咗藝展中心買咗d絲花、樹葉同埋籐, 打算用黎做油畫同埋reception枱嘅佈置!

(藝展中心地址: 深圳巿羅湖區梅園路)

買樹葉同埋籐個間個老闆娘係都唔肯減價! 企得鬼咁硬,  總果就買咗$70. 

而絲花個度, 我地係咁同佢講價, 每揀一種花就講一次, haha... 都唔知平咗多少, 只知埋單$146! 佈置用嘅物品總共買咗大約$220. 都算係平啦~~

去完藝展, 跟住下一站係附近嘅文具批發中心 (個附近有兩三間呢d批發中心, 不過唔記得個中心叫咩名, 不過坐的士前往藝展中心時應該會路過, 大家不防on the way時就四圍望望啦)

個度有文具, 又有玩具, 又有d精品, 最搞鬼係有少少結婚用品買!

於是我地就係個度, 買咗2張大嘅囍字($3@)同埋2個細d嘅囍字($3/2個)! 仲有買多兩叠利是封($5/8個), 啱啱好夠封俾兄弟姊妹!!!

除咗呢d, 仲有一樣婚宴時必需嘅物品 -- 啤牌(special for張先生嘅同事), 買咗1條共12盒啤牌, 都係$36 ($3@)~~ 張先生話"小蜜蜂"呢個牌子係香港買好貴, 若係酒樓買一副應該要廿幾蚊, 嘩......  d酒樓咁咪食水好深~~~

仲有買埋花炮, 真係超第呀~~ 上次去睇, 問過最細支個種就$0.7一支, 今次去問$0.5一支咋~~  haha......   大一個size就$1.3一支, 但唔知大一個size會射得幾高, 驚到時射到酒樓d水晶燈就唔係咁好, 丫~~ 估唔到個店員肯開一支黎試喎~~~ 射得又唔係好勁, 所以最後都揀咗大一個size, 總共買咗30支, 都係$39蚊咋, 超第呀~~ haha......

不過要係個度問多幾間, 因為我地問過一間, 最細size如果散買, 竟然收我$2一支,  佢都傻傻地架~~ 上次係第二間睇過都係$0.7之麻, 所以即刻放低閃人~~

當我地離開呢個文具批發中心, 係門口有檔賣遮嘅檔口, 竟然發現個度有我地係美華買嘅紅遮, 仲要係一模一樣~~  於是叫張先生望下, 佢都話係一樣, 於是我地睇到唔睇, 問都唔問價錢就走!

買完嘢, 我地就向東門進發, 係面點王食咗d嘢, 跟住就去我地嘅主要目的地 - 現代經典攞相啦~~