寫我心情

陳醫生仲未搵到隻藥膏, 唔知幾時至搵到呢?! 問陳醫生搽巿面買到嘅秀碧退疤膏得唔得, 陳醫生唔知成份, 不能答我得唔得, 唉... 又係嘅, 始終B仔仲細, 唔敢胡亂幫佢搽嘢, 唉...

呢幾日心情都麻麻, 雖然粒肉牙對B仔身體同生活都不受影響, 但都幾礙眼, B仔爸話驚佢大個仔會自碑........ 真係寧願粒嘢生係我度囉!

又唔可以怪Pizza, 其實Pizza係最可憐嘅一個, 主人又去咗澳洲, 得婆婆照顧佢, B仔出世後主力又去晒B仔度, 同埋由細到大都未接觸過小朋友, 可能唔習慣屋企多個又嘈又曳嘅BB! 運去澳洲其實係最兩全其美嘅方法, Pizza係澳洲跟返主人生活, 應該會好開心, 之但係check過澳洲個邊d手續費起碼五千幾, 機票又四五千, 香港檢查抽血個d應該都唔少嘢, 夾夾埋埋至少都要皮幾嘢, 仲要過到澳洲至少坐成個月監, 成個澳洲得3個 "監獄" , 阿德萊得又無, 最近個個係墨爾本, Pizza年紀大, 真係怕佢受唔住呢~~

唯有亞Q d, 可能大個仔個頭大咗, 皮膚會扯行d, 粒嘢就會變返細d, 無咁凸, 到時無咁覺眼呢~~ 又自我安慰一下自己, 每個人都有缺憾架啦~~ 無傷到眼睛已經好好彩! ............

真係好煩, 煩遲下見到B仔嫲嫲伯娘佢地實會話做乜會咁?! 見一個時解釋一次, 煩都煩C人! 唉... 好怕應酬佢地, 好似好大壓力咁, 好似乜都要同佢地交代咁, 但個仔係我嘅, 有無必要同佢地交代呢?! 之但係B仔爸實話: 佢係B仔嫲嫲黎, 有權知! 唉... 有乜好知呢?! 查實好唔明, 個仔係我嘅, 又關佢乜事?! 佢知又點, 都唔會幫到d乜, 只怕佢個腦又唔知諗d乜, 又唔知講d講者無心但聽者有意嘅難受說話! 唉...

每次見親佢地都已經感到好大壓力! 見到B仔好似發仔瘟咁, B仔越大就壓力越大, 二伯娘不理B仔願意與否, 二話不說就抱走我個仔, 佢都好d, 只係抱走我個仔!

唉... 三伯娘雖然見B仔唔肯都唔會勉強, 但我反而最怕咗佢, 好怕佢問都唔問就咀我個仔(係咀對咀), 好怕佢問都唔問就用自己嘅飲食用具餵B仔食嘢飲嘢 (上次爺爺生日食飯, 三伯娘已展開餵飲行動啦, 係咁用佢個杯餵B仔飲茶, 唔好意思推開佢, 已用說話來表示我嘅不願意, 連嫲嫲都出聲話唔好俾B仔飲, 但佢都唔聽, 繼續餵, B仔爸又唔出聲, 唉!)

好驚, 好驚佢以為B仔同二伯娘d仔女一樣, 任佢"鍚鍚"同"照顧" (想當年姪仔女細真係睇住佢咀對咀佢地, 睇到我O晒咀 =.="""), 呢家嘢我真係接受唔到, 實在超超超唔衛生啦, 二伯娘接受到不代表我都能接受, 希望唔會發生係B仔身上!

自B仔出世後, 呢個問題已不斷纏繞住我, B仔越大我就越擔心, 但又唔知可以點樣開口讓大家好落台, 係成村人面前直接拒絕佢, 人家又會好面矇, 其他人又唔知會點睇我, 可能會話我巴之閉, 洗唔洗咁緊張之類.... 至大問題係因為佢地成村人都覺得呢d行動唔係一回咩事! 對住人黑面, 我咪係衰人囉! 唔表達自己嘅不願意, 佢又以為我願意, 好煩呢! 超鍾意小朋友都唔係咁架麻, B仔係我個仔黎架, 唔好當咗係自己個仔至得架, 伯娘黎架咋! 求求上天好心快d賜個小寶寶俾三伯娘啦!