17.12.2008
凌晨時份, 唔知點解囉囉"聯"瞓得唔係咁好, 兩點幾聽到B仔碌黎碌去, "E E 也也" 咁, 睇下佢咩事啦, 量下體溫, 嘩... 100.4度, 發燒添~~ 咋咋臨踢醒B仔爸幫B仔貼返張退熱貼先!
到5點幾B仔媽又扎醒, 101.4度, 嘩... 大濟, 發高燒, 又咋咋臨踢醒B仔爸去拎退燒水俾B仔食啦!
到7點B仔爸臨出門前度咗退咗燒, 以為放心落黎啦, 點知... 到11點度102, 嘩... 想嚇C B仔媽咩... 食退燒水又喊到嘔返晒出黎, 得自己湊住佢, 佢又發燒又嘔, 唔敢帶佢出佐敦咁遠呢~~ 咋咋臨帶佢去附近兒科睇睇先, 等睇時餵水B仔飲, 隔一陣又嘔晒出黎, 唉...
醫生話B仔喉嚨發炎, 唉...... 又喉嚨發炎!
返屋企食咗退燒水就退返d, 但就仍有微燒, 期間都有幾個鐘無燒, 但之後又升返, 唉.....................
B仔爸有嘢搞臨時臨急又推唔到人, 得B仔媽一個人湊住病咗既B仔, 又唔肯食奶, 又唔肯食粥, 又唔肯飲水, B仔媽又無經驗, 婆婆又過咗澳洲, 唉......... 非常十分之呢Hea, 好無助, 好擔心又好驚!
18.12.2008
凌晨3點又黎高燒, 塞咗粒退燒藥係pat pat, 之後就降返101點幾度.
B仔爸今日要返工, 全日就得自己湊住B仔, 日頭都還好, 至驚係半夜, d BB好興半夜至黎料架麻, 又得自己一個, 到時都唔知點算好囉~~
今日都keep住係100-101點幾度, 下晝就好d, 返98-99點幾度, 叫做退咗燒, 心情鬆返一鬆之際, 4點幾度, 又黎微燒, OH MY GOD! 究竟發生咩事呀, B仔, 你玩媽媽咩?!
好無助既B仔媽唯有邊喊住邊向B仔爸報告, 真係忍唔住呀, 好擔心呀, 咁反覆, 仍然唔肯食同飲, 又唔知邊樹唔妥! 跟住又打俾大姨媽問佢意見, B仔媽又嚇親大姨媽呢, 真唔好意思! 大姨媽Suggest我地去仁安, 咁B仔爸要攞TO黎同我地一齊去!
"大姨媽金句: 唔洗驚! 大姨媽係大廳! " 收到啦大姨媽, 好彩有你响樹咋, 如果唔咪, B仔媽真係"藤"晒囉~~~
去到醫生check咗, 耳仔無事, 聽過肺都無事, 係喉嚨發炎, 但由於已燒咗2日2夜, 同埋擔心B仔媽處理唔掂, 俾B仔留院觀察, B仔媽無咁驚之餘, B仔爸又唔洗咁擔心!
B仔仲得意洋洋咁係張床到行黎行去, 又係度UN, 又撩對面床個哥哥玩, 但我就覺得個張床似個籠, 個欄好高呢~~ 留咗小便同抽鼻涕驗, 嘩... 塞條管仔入鼻, 好似好恐佈咁, 好彩好快趣, B仔都係反抗喊幾聲就無嘢!
19.12.2008
凌晨時段, 姑娘一個鐘量一次體溫, 聽到"無燒"呢兩個字, B仔媽都放下心頭大石, 係其間有2次量微燒, 但之後就去返無燒!
頭個兩個鐘B仔媽都會彈起身睇姑娘量, 但之後個幾個鐘實在起唔到, 眼都差d挈唔大, 知道姑娘黎咗都已經好叻囉, 兩晚都無乜點瞓過咁濟呀!
這個晚上真係喉嚨開始唔舒服啦, 隔離床d大人都咳咳地啦! 睇黎B仔媽又打敗仗多囉~~
晨早8點3就有人拉開個簾, 原來準備收床, B仔媽真係超超超唔想郁呀! 實在太太太攰啦~~ 但無計, 人地要收床! 唉... 咁唯有早d叫個早餐黎食下啦!
9點幾醫生黎巡房, 話想B仔觀察埋下晝先, 等佢再黎巡房時再睇下先決定出唔出得院, 但我就覺得既然d驗尿同鼻涕報告無嘢, 又無燒, 醫院菌又多, B仔爸今朝又放工, 無謂黎係度啦, 於是要求早d出院返屋企好過啦~~
等出院期間, B仔就作反囉, 將張凳仔係房度推黎推去, 仲推出走廊推添呀~~
12點幾就走得, 返到屋企咋咋臨沖個涼食d嘢就大家眠一眠, B仔媽實在頂唔住啦, 真攰到呢~~ 又病啦喎~~ 頭赤到爆, 好彩眠完之後就無乜嘢, 係喉嚨唔舒服!
20.12.2008
B仔開始咳得勁咗, 瞓瞓下咳醒, 一咳就好似驚嘔就係度喊, 唉... 出院時淨係俾咗退燒同止咳藥, 但d咳藥都好似無乜效咁, 煩! 煩! 煩! 真係寧願咳個個係媽媽囉~~
夜晚同爺爺嫲嫲一家做節, 真係唔多想帶B仔出去, 但B仔爸唔肯, 唉...
B仔一見嫲嫲又即喪喊, 二嫂又話想抱佢, B仔喊到係咁扯實我都仲想搶B仔黎抱, 係咪發B瘟發得咁利害呀?! 係咁話B仔瘦咗好多, 我究知啦, 駛唔駛不停係咁係成村人面前講呀?! B仔媽不斷重覆又重覆回應佢: 可能高咗, 顯得瘦咗! 嫲嫲又問B仔媽: 你無俾奶佢食咩?! 無煲粥佢食咩?! 二嫂又話: 你倆公婆做乜瘦咗?! 嫲嫲就接住問B仔爸: 你無湯水飲咩?! 唉... 點解d人咁Q煩架?!
21.12.2008
星期日既早上, 9點起床, 餵奶同執拾行裝, 獨自帶B仔出佐敦睇陳醫生, B仔爸要返工, 為咗B仔, 山長水遠都要帶佢去睇!
11點幾出到去, 好彩唔係好多人, 等唔係好耐就有得睇, 睇完咋咋臨返屋企, 正當上咗巴士, 而巴士開動無幾耐, 陳太(陳醫生太太)打黎話俾漏咗一支藥水B仔, 叫我返轉頭拎, 好彩部巴士未停下一個站, 唯有落車行返轉頭, 路程都唔近架, 由山林道行返去佐敦永安個頭, 心諗: 好彩係推車仔去, 如果孭住去就大濟, 又要咩住奶粉袋!
B仔媽俾陳醫生話, 應該打完針第二日就返黎搵佢, 唉... 我都想, 但個日B仔嘔, 叫B仔媽點獨自帶佢出咁遠水路丫! 唉... 檢查過, 喉嚨發炎, 仲要生咗幾粒飛滋! 又生飛滋?! 點解成日生架?! 陳醫生話係腸病毒所致, 係口腔發炎, 唉......... "喉嚨發炎" B仔媽真係買你怕啦!!!
返到屋企放底d嘢就咋咋臨同B仔去買嘢煲粥仔, 成日都未食過嘢, 順便買個飯盒返屋企食, 煲好粥就餵包+粥+藥, 呢幾日餵藥真係諗到頭到爆, 連柏滔媽都同我一齊研究有可能餵到藥既方案呢~~
就咁餵無可能, 格硬黎佢又喊到嘔返晒出黎, 將d包包沾藥佢食又唔中計, 齋包就食, B仔媽唯有"畢"一匙粥, 再滴d藥入匙粥入面, 面頭加舊包黎引B仔開口, 呢招佢就中計啦! 唯一可行既方法呢~~
到晚上11點幾, 唉.............. 又燒, 仲要燒到101度, 又黎嚇C B仔媽啦! 餵退燒藥又喊到嘔返晒出黎, 食唔到藥又驚佢燒壞腦, 見B仔個樣又勁辛苦咁, B仔媽真係既痛心, 又擔心, B仔爸又返咗工, 真係攬住個仔係度喊呀! 唉............. 係咁同佢抺身抺手抺腳, 叫做退返d.
B仔爸今晚做大廚, 整咗個雜錦煲
22.12.2008
凌晨2點聽到B仔又"E E 呀呀", B仔媽彈起身量體溫, 嘩... 101度, 唉... 將少少奶溝退燒水俾B仔飲, 但10分鐘後喊到嘔晒, 之後仲嘔咗兩次, 抱咗一大輪至瞓冧, 到4點都仲唔降, 喊晒口打俾B仔爸(又嚇親B仔爸), B仔爸又攞TO返黎一齊入急症, 醫生聽過肺無嘢, 應該係喉嚨發炎, 俾咗d退燒水就返屋企!
B仔爸送咗我地返屋企就咋咋臨返公司! 好不容易至捱到B仔爸返黎呀, 但B仔都仍然低燒, 但都已擔心C我地, 不過有B仔爸係度, B仔媽都無咁驚無咁呢Hea!
今日都Keep住有燒無燒又有燒, 但胃口就好咗, 肯食奶食粥飲水, 夜晚就開始回覆正常, 但食咗藥成個人都好攰, 唔多肯玩, 只管瞓, 陳醫生打黎跟進情況, 話因為落重咗藥, 所以食完藥會攰係正常, 喉嚨發炎會燒成四五日, 因為仲有菌係度, 所以B仔仲發燒, 叫B仔媽唔洗太過擔心! 唉... 唔擔心就假囉~ 燒咗咁多日!
今晚又係B仔爸做大廚, 有魚肉滾節瓜湯
蒸水蛋 (雞粉多得濟啦~~)
翠肉瓜云耳炒肉片
23.12.2008
成晚都Keep住幫B仔探熱, 真係好驚唔知幾時又黎燒過! 凌晨5點開支奶俾B仔食, 順便煲定粥仔瞓醒食粥同食藥!
8點幾就瞓醒, 雖然B仔媽仲好想瞓, 但都起身係B仔爸協助下餵粥餵藥, 跟住就去飲茶! 飲完B仔又返屋企瞓!
下晝瞓醒同B仔去咗公園玩一陣, 晒下太陽, 之後就買餸返屋企!
今晚B仔媽做返大廚, 有木瓜雪耳豬骨湯
蒜蓉鮮尤
炒三絲 (甘荀、薯仔同肉絲)
