黃金海岸食Buffet

29 Apr 2007

夜晚同爸爸、媽咪、細佬、亞ming、亞婆同埋兩位亞姨一齊去咗黃金海岸酒店食buffet

點解無啦啦去食?!

 因為黃金海岸做緊promote, HKID Card No. 有"2", "0", "7"是旦一個數字就全枱有七折, 咁咪一家人去食囉~~

個度食物種類話多唔多, 話少亦唔少.......

張先生一開波就食咗碟好正嘅刺身, 有三文魚、北寄貝、生蝦同埋八爪魚! 實在太吸引啦~~ 坐係隔離嘅我, 見到流晒口水呢

 係苦苦哀求張先生之下, 佢批准我食一塊三文魚刺身呢  我都知自己好唔聽話架啦, 不過只係一塊, 過下心癮, 等到小寶寶出世之後至再食! 

我就食咗......

翡翠螺、個隻唔知咩蜆咁上下嘅嘢, 但好鮮甜, 好食過蜆! 仲有果隻大頭蝦, 係初初至出, 之後出嘅都係普通嘅蝦! 無得食三文魚刺身, 唯有食住煙三文魚先!

仲有龍蝦仔, 不過呢碟全部都唔係我食, 係拎返去俾屋企人分享嘅~~ 見到有人拎到長腳蟹, 但係佢出咗一輪之後都無出, 所以我地全枱人都無人食過!

呢個係翅, 但係唔知咩翅......

海南雞飯都唔錯, d飯唔油膩! 仲有燒烤食品, d串燒好味, 雞翼就醃得唔夠味, 或者佢加多d蜜糖去燒應該會更正! haha...... 仲有個度d燒牛扒幾正! 掛住食, 無影到添~~

菜就偏咸, 所以食咗唔係好多! 其餘個d一件件都唔知係乜! 個唔知咩咩三文魚試咗少少, 但味道怪怪的! 呢碟裡面嘅嘢唔太好食, 個薯仔波波就最好味!

食完熟食, 最後緊係試下甜品啦~~ 初初去到食buffet個度, 見到d甜品好靚架, 有d仲係一杯杯細細杯, 但當我去拎甜品食時, 個d好精緻嘅甜品已經唔再出........

個對小白兔好可愛好得意呢~~

 我同張先生一人一隻!

d甜品水準唔係咁掂, 除咗小白兔同埋藍梅cheese cake食晒之外, 其餘嘅甜品都只係食咗一半就唔要, 雖然好浪費, 但係唔鍾意食嘅嘢無謂免強自己食晒佢, 同埋還是唔好食咁多甜食吧! 果度仲有個朱古力噴泉添架!!! 有雪糕雪條食!!! 可惜我唔食得!!!

生果方面選擇都算多, 有西瓜、哈蜜瓜、火龍果、菠蘿、奇異果、梨、蘋果、橙、提子、布冧! 不過到我食生果時, 好多生果已無晒!

呢度環境都幾好, 不過坐出面好過坐入面, 個環境靚d, 見到椰林樹影咁! haha...... 不過麻煩在要行返入裡面至拎嘢食!

同埋呢度有d食物可能出一兩次就唔會再出

 好似長腳蟹、大頭蝦、精緻嘅甜品、橙、布冧, 可能有d出咗但我無緣一見兼一試個d, 呢方面就真係唔係咁滿意!!!

大家有無發現, 我唔知有d食物叫咩呢~~ 唔係因為我唔記得, 而係呢度有九成以上嘅食物, 係無牌仔介紹個樣嘢嘅名堂!

原價差不多三百蚊位, 折咗再加一每位二百四十蚊左右, 價錢都ok嘅~~ 如果以原價食, 就覺得唔第, 因為有好多想食嘅佢唔再出, 蝕晒! haha......