仲諗住今晚自己獨居兼獨食...............

1 Apr 2007

話說今日張先生返工, 諗住自己一個係屋企, 點知.......... 當整完蛋糕, 係度攤抖下嘅時候........ o依~~ 點解個鐵閘有人開嘅?! o依~~ 點解有人係咁拎個大門嘅?! (因為我鎖咗)

開門之際, 望下個眼, 完來係張老太同張老伯返黎~~ 心諗: 奇怪?! 點解佢地星期日, 仲要下晝返黎嘅?! 無乜幾可架喎?! 原來, 佢地聽朝一早搭長途車返鄉下兩三日!

原本諗住獨自一人留係屋企舒舒服服, 兩老返咗黎, 唔知點解?! 自己有種無型嘅壓力! 可能因為太突然, 加上唔係咁鍾意佢地返黎(無奈間屋企佢地, 唔通唔俾人返咩?!), 好煩, 張老伯實在多事長氣兼污糟, 食餐飯搞到成地都係

 我都唔知抺好唔抺好, 因為張先生係度嘅話, 佢會用掃把掃, 而我, 最憎用掃把同垃圾鏟, 因為掃極d細微垃圾都係掃唔到去垃圾鏟, 最後, 張老太邊話張老伯邊抺, 我都鬆返口氣~~ hehe......

本來只買咗半斤菜心同埋一條小魚(唔知叫咩魚)做今晚晚餐, 家陣兩老返咗黎, 唔夠食, 張老太又去街巿買咗隻雞同埋成斤通菜返黎!

是晚靚餸有:

腐乳通菜 (張老太至愛)

炒菜心

白切雞

難得有成隻雞係度, 好想試下自己砍雞, 因為係娘家, 次次都係媽咪操刀, 唔俾我試, 我就得個睇字, 今次叫張老太俾我砍, 實在太好~~ hehe...... 張老太企係旁邊教我, 我就操刀, 張老太睇見都驚驚地, 因為我唔夠力, haha........ 不過, 砍雞期間, 聽都張老太話: 你學下點砍都啱, 第時你可能要砍, 張師奶聽到之後就心諗.................. 唔係麻~~

 

張老太買雞果然有一手呀! 佢買親d雞都好好味架~~ 好香雞味! 大隻得黎又唔肥! 佢話呢隻雞買咗百五蚊(都幾貴)

薑蔥蒸唔知咩魚

張老伯話: 張師奶, 我教你蒸魚啦~~ 呢條魚仔咁細條, 蒸5mins就得架啦~~

張師奶: 我知呀! 不過我顧得隻雞時(努力砍緊雞), 顧唔到條魚, 咪蒸過龍囉~~

邊食飯, 張老伯邊話張老太煮餸唔好食, 無鹽無味  張師奶當然唔出聲啦~~ 淨係聽兩老係度你一句我一句~~