唔洗錢食buffet, hehe.......

3 Apr 2007

今日公司請食buffet, 我地放工之後就去咗紅磡都會海逸酒店食, 個度都好多食物選擇, 有中式、日式、印度式、意大利式...... 甜品都好多選擇呢~~

個度d牛柳幾好味! 但唔敢食咁多呢~~ 只食咗半嚿! 跟住見到刺身檔有唔同種類嘅刺身, 當中包括我至鍾意食嘅三文魚刺身

 有得睇, 無得食, 真係慘~~ 唯有夾一塊煙三文魚過下口癮~~ 點知........ 覺得咸, 食咗一啖就放棄咗佢!

凍海鮮bar個度, 有源源不絕嘅生蠔, 雖然平時都唔食生嘅生蠔嘅我, 成日路過都係度諗, 如果有得芝士/蒜蓉焗生蠔就好啦~~ 但係都係得個諗字! 有凍蟹腳, 聞蟹即走嘅我(因為唔食得), 當然無食啦~~ 但同事話好咸呢~~

仲有兩款青口, 都係唔敢食, 一來凍, 二來真係驚食咗會肚仔痛! 不過自己到膽操操, 食咗兩粒大大粒嘅螺(綠綠地色殼個d, 但唔知佢叫咩名堂, 西田超巿買幾粒都四五十蚊), 想繼續食, 但都係少食為妙~~

又有個攤檔係6面、煮生滾粥, 我仲同同事講, 會唔會有人咁蝕底, 係呢度食白粥油炸鬼, 點知......... 當品嚐緊美食途中, 見到大老細拎住碗嘢, 成條油炸鬼插係度(相信就係白粥油炸鬼)

可能有錢人食開貴嘢, 所以要品嚐下平民化嘅白粥油炸鬼! 清下腸胃!

見到好多嘢都想食, 好似炸蝦天婦羅、牛柳、蝦、刺身、芒果甜品、唔同味道嘅雪糕...... 但係, 為咗小寶寶着想, 唯有忍下口................

個度d甜品, 不論中式定西式, 都幾好味! 我鍾意食個個燉鮮奶同埋朱古力蛋糕, 好好味!

最後就係生果! 可惜得好少選擇, 有士多啤梨、奇異果、木瓜、哈蜜瓜、菠蘿同埋西瓜, 啱我食嘅就只有士多啤梨同埋奇異果

好彩今餐係員工福利, 唔駛錢遮~~ 如果唔係, 咁多嘢都唔食得/唔食得多, 真係會好蝕呀! haha......