新店開張

8 Apr 2007

張先生嘅朋友嘅老婆係旺角西洋菜街開咗間樓上店, 係幫客人整水晶甲(Diamond Nail)嘅~~ 於是今日我地就帶埋招財貓上去踩場! 鍾意煮嘢食兼唔貪靚嘅我, 當然無即場整啦~~ 整咗對我黎講, 一定好唔方便呢~~

坐咗一陣我地就走! 旺角人多車多廢氣又多, 所以係花園街逛咗一陣, 睇下B仔衫就返屋企買餸睇碟!

今日睇咗<鐵金鋼智破皇家賭場>

睇後感:

嘩.............. d打鬥場面好精采! 好睇! 但結局就求其咗d~~ 最尾個壞旦都未肉博過, 一粒子彈就搞掂咗! 呢個結局實在求其咗!!!

上次睇完<香水>, 個晚就發咗個夢, 夢入面成個環境都好香, 坐緊車嘅我, 係隔離坐咗個四眼男人, 唔識架! 佢係咁係度索索索, 好似個變態佬咁~~~~ 跟住就醒咗! 唔知睇完<新鐵金剛>又會發個咩夢呢?! (自從有咗小寶寶之後, 好多時睇完戲個晚就會發返有關套戲嘅夢, 好奇怪!!!)

睇戲睇到成八點幾至動工煮飯! 好彩煲落飯先咋~~ 如果唔係有排都未有得食!

是晚靚餸有:

冬菇節瓜滾肉片湯 (加咗幾粒冬菇去煲, 果然係香d~~~)

粉絲蒸帶子 (5蚊一隻帶子, 大大粒, 好味!!! 如果淨係蒜蓉蒸會唔會一樣咁好味呢?! 因為對豆豉麻麻地好)

冬菇云耳蒸雞 (好味! 最鍾意咁樣蒸雞食!)