2 Apr 2007
奪命呀~~
尋晚成晚都瞓唔着, 眼光光呀! 唔知係因為換咗件新睡衣瞓唔着丫~~ 還是張老太張老伯返咗黎, 佢地無關房門瞓, 咪唯有關自己個門, 但係又焗焗地無風入, 開咗風扇都仍然瞓唔到, 最後都係開返房門瞓 (平時慣咗開住房門, 有自然風吹下), 但仍然瞓唔到, 唉................. 最後兩老朝早六點半出咗門至瞓得着.......................
由於今朝十一點幾要去廣華產檢, 所以借d以攞咗一日病假! 好彩咋~~ 如果唔咪, 成晚瞓唔到嘅我返工都唔知點捱到放工呢~~
去到婦產部門, 嘩.................... 坐滿晒孕婦, 今年真係多人生bb呢~~ 小寶寶第時讀書競爭都相當大呀!
等呀等........ 等到點幾鐘至見到醫生, 等嘅時間就耐, 見醫生嘅時間5分鐘都唔知有無, 問你幾句, 話返俾你知上次個驗血報告, 俾你聽下小寶寶心跳咁就搞掂! 真係夠晒快!
今次第一次聽小寶寶嘅心跳聲! 嘩........................... 好搞笑呢~~ "洪洪洪洪....." 聲, 洪得好快呢~~ 唔怪得之我自己嘅心跳都咁快啦~~ 原來小寶寶心跳都咁勁! (我攤係sofa都好明顯睇到自己心口上上落落得好利害呢~~ 可想而知我嘅心跳有幾勁)
同埋都放到幾大聲下呢~~ 聽落去感覺好似狗吠聲呀! 好搞笑呀! haha...... 由於張先生同我隔住道簾, 佢唔知我係入面做緊咩呢~~ 淨係聽到 "洪洪" 聲, 以為係d機器聲~~ haha......
問過醫生會唔會俾我地抽血驗糖氏綜合症, 醫生話由於我唔係高齡, 又無家人有此症, 所以唔會轉介我去抽血驗, 要驗就要自己去私家驗 ==
所以檢查完之後, 去咗佐敦抽血驗糖氏綜合症 (因為上次係私家檢查時, 醫生寫咗張紙俾我去化驗所驗呢), 雖然患唐氏綜合症嘅機率超底, 但係都係唔好慳呢幾百蚊, 驗一驗但求安心!!!
跟住我地返返去旺角逛咗一陣街, 去買d整蛋糕嘅材料, 趁住張先生同我一齊, 幫我拎呢~~ 因為都幾重下架!!! 嘩... 買完之後, 好似變咗夜晚咁, 雨落得超勁大呀! 雖然有遮, 但背脊都濕濕地呀! 於是速速回家!
是晚晚餐食返尋晚淨低嘅白切雞, 不過今晚就變咗咸雞! (醃得唔夠咸添~~)
我都成日食菜心、西蘭花、節瓜食到嘔，不過為咗Baby，無計啦!! 我尋晚食咗豆角，原來營養都唔錯架，可以食下喎!
回覆刪除你唔鍾意食呾多菜心.試下芥蘭苗.都好好味..椰菜都唔錯架
回覆刪除A~~ 大肚婆最好最好就係食新鮮野,所以尋晚既餸就盡量吾好食,因為吾係即日煮既已經冇咩益了~~
回覆刪除你形容得好好笑呀---〉好似狗吠聲！你甘乐天，BB都一定好开朗！
回覆刪除喺我識嘅大肚婆裏面, 你係第一個用狗吠聲黎形容bb心跳聲, 你係得嘅, 禁都諗倒。 遲d喺個肚皮上面你就會見到bb隻手仔喺度郁黎郁去, 超正、超攪笑架。
回覆刪除貓貓, 我又咪係~~ 見到菜心都食唔落! 但為咗小寶寶, 點難啃都啃咗佢! haha..... 其實個d豆類係咪都食得嘅呢?! 其實豆類我淨係鍾意食荷蘭豆! haha...... 鬼妹, 但芥蘭食唔食得呢?! 芥蘭唔係含水銀??? 二家姐, 其實我極少食隔夜餸架! 成日都係餐餐清架! 係個晚張老太買隻雞好大隻(兩個老人家同我點食得晒), 唔好晒咪食埋佢囉~~ vivibebe, haha... 有時我都幾樂天, 但我係一個成日都好多嘢諗嘅人黎! 不過我都希望小寶寶會係個開朗bb!!! 馬尾媽媽, 我都好期待小寶寶郁黎郁去嘅感覺呀! 可惜我到依家都未feel到~~
回覆刪除我同國勲用開心既心情等待你既bb來臨富建家庭生活 , pizza 妹妹等我去應付啦...
回覆刪除你好攪笑呀, 話心跳聲似狗吠聲
回覆刪除荷蘭豆應該都OK架~我都有食蜜糖豆架!
回覆刪除Ming, Pizza妹妹就交俾你教導佢愛鍚bb, 訓練佢幫媽咪看住bb, haha....... 呢個重任交俾你啦!!!
回覆刪除哎吔~~~~~ 我將蜜糖豆同荷蘭豆掉亂咗呀! 其實我鍾意食蜜糕豆至真, haha......
回覆刪除....唔好話俾人知，我直頭試過買錯然後返到屋企俾人吋~
回覆刪除貓貓, haha.......... 放心! 我唔會話俾人知架! 但人地睇到就另計, haha.........
回覆刪除恭喜 恭喜 你有身妃
回覆刪除恭喜恭喜 就快做媽咪啦
回覆刪除你係咪舊年先結婚? 咁快有喜, 真的好開心呀!!!!
回覆刪除恭喜晒！有左ＢＢ食野要小心Ｄ！盡量忍吓口，對你同ＢＢ都有益處架！有時間睇多Ｄ靚野！生出來的ｂｂ都靚ｄ精靈ｄ架！
回覆刪除Lala, 我係上年4月註冊, 12月擺酒, 跟住就有咗小寶寶! 真係好快呢~~ 詩謠媽, 收到!
回覆刪除