大日子啦 ~~ 酒樓篇

下午四點就到達酒樓, 酒樓方面仍係度執場! 我地係最早到達o既一對新人呢~~ (當晚總共有三pair新人擺酒)

係無無聊聊之下, 開咗兩枱麻雀黎打, 一枱細妹同兄弟打, 另一枱張先生同兄弟打! 而我就等班姊妹返酒樓開新娘房!

化妝師同埋攝影師都好準時到達, 其實我係完全無要求要化咩妝, set咩頭, 完全信化妝師o既技術! 不論係日頭o既褂妝, 同埋夜晚o既妝, 出黎o既效果都好理想, 好靚呀~~ 好多朋友都讚不絕口呢~~

最失策就係套婚紗影得好少相, 得進場同切餅個陣子, 之前唔醒起着黎影下相先, 唉...

 好後悔呢~~~~~~~~~~~~~~~~

影得最多都係粉紅色個件迎賓晚裝, 個套都好靚呢~~

全晚嘅過程真係好急趕, 酒樓係咁趕住晒, 準時8點半就收晒麻雀枱, 擺好晒位! 有d晏黎嘅親戚朋友都影唔到相呢~~

差不多9點鐘, 就已經準備企係門口等進場! 出到去, 隔離廳個pair新人已坐定定等進場, 佢地嘅"步伐"仲快過我地呢~~

haha... 唔知係咪靚得濟呢?! 個pair新人係咁望住我喎~~ 我都望返佢地, 個位新娘子頭戴個頂羽毛勁過我個個好多呢~~ 長又長過我個條3陪呀!!!

  本來以為自己個條已經夠勁, 但相比之下, 變咗條"雞毛", hehe......

係門口等進場到唔緊張, 播片時就係門口裝, 一播到張先生係度谷胸谷手臂個張相, 全場都嘩嘩聲, haha......

  全晚最緊張都係自己對住咁多人講嘢個刻, 講得好快, 原本諗住講嘅嘢都省卻晒, 以精簡為主, 講完就將個波交俾張先生, haha....... 真係好驚好緊張呢~~

而張先生, 相信佢全晚最緊張都係呢part呢~~ 佢淨係識講"無下次", 不停"無下次", 好搞笑呢~~ haha............

講完一小堆嘢, 就入席! d餸都起得好快, 一個接一個, 非常高效率呢~~ 我同張先生都無乜點食過嘢, 只品嚐咗頭3道菜, 之後個d, 連個樣係點我都唔知呢~~

上咗3道菜就換衫, 準備敬酒! 好熱鬧, 好開心呀! 每去到一圍就好高興咁"飲杯"、"飲杯"再"飲杯", haha...... 雖然唔識爸爸d同事, 但係佢地各人都好高興, 好開心呢~~ haha......

敬完酒就玩$20蚊夾錢遊戲, 好巧恰地, 抽咗3位自己嘅同事, 2位爸爸同事同埋1位張先生嘅同事呢! 各人都好高興, 好開心! 真係好, 唔駛成本嘅遊戲, 大家又玩得高興~~

姊妹們本來仲有一個遊戲安排咗, 但時間所限, 無玩到! 玩埋就好囉~~ 應該會好高興! 但我會好驚, 因為佢地要張先生抱住我走云全場, 係每枱拎一個汽球呢~~

席間打算去d朋友、同事度傾下計, 影下相, 但係俾兩位姊妹係咁叫我返位坐, 所以淨係同朋友social咗之後, 就乖乖入坐! 真係唔好意思呢~~ 無乜點理過d同事(加上佢地成班好遲先黎, 都差唔多入席, 好彩都影到兩張大合照~~)

一晚嘅時間過得好快, 自己都未夠盡興, 姊妹就話要換衫準備送客, 換咗出黎, 媽咪就吹我地準備送客, 出到門口, 見到隔離個pair新人已企定定準備送客! 大家又係你眼望我眼, haha......

送客時, 從大家嘅面上見到佢地都好開心好高興呢~~ 由細睇到我大嘅親戚們都讚我好靚, hehe... 好少讚自己嘅我, 都覺得個晚自己個樣好掂呀~~ 全靠化妝師姐姐亞Ann呢~~ hehe......

未到12點, 我地就散水lu! 張先生想同d朋友係酒樓飲下酒都唔得, 因為酒樓好似趕收工咁, 真掃興~~ 咁都好嘅, 咁樣張先生就唔駛飲醉酒啦~~ haha......

 

返到屋企, 放好d嘢, 張先生就同朋友去咗元朗飲咗一陣酒就返黎! 我實在太攰啦, 留係屋企梳洗兼執嘢~~~

這天, 混亂中度過! 非常充實! 好開心! 好高興! 亦好難忘!