大日子啦 ~~ 出門篇

1 Dec 2006

今日就係我同張先生嘅大囍日子!  好開心呢~~

 尋晚都瞓得着, 只不過係醒瞓咗少少咁啦~~

一大清早七點左右就起床, 辦完d例行公事(刷牙洗面)就等化妝師同姊妹上黎屋企!

第一個到達嘅係亞珊, 跟住d姊妹就陸續黎到! 化妝姐姐都好準時到達~~

化妝姐姐一邊幫我化妝, 另一邊箱, 碧瑜就幫我黐假指甲!

 其餘姊妹就逐個逐個由兩位化妝大師 - Fion同埋碧瑜操刀~~

九點半左右, 張先生已經到咗樓下, 但我地仲未準備好呢~~ 所以張先生係樓下等咗一陣, 到十點左右就開始玩遊戲~~

係佢地玩緊遊戲期間, 我就係房度睇電視仔, 睇下佢地出面嘅情況, 感覺都好得意呢~~~~~

部camera係咁影住佢地, 文翔好聽話地做掌上壓, 其他兄弟就係度打忌廉, 但打好耐都好似唔成形, 個刻真係替佢地擔心呀~~ hehe.........

到宣讀愛的宣言時, 張先生又搞鬼, 讀d唔讀d~~ 最後重新讀一次, 真係好開心呢~~ haha

  

當張先生衝破所有防線, 順利進入我家之後, 爸爸就親手將我交俾張先生! 張先生就將花球交俾我! 而成班兄弟都讚我好靚呢~~ 而我, 就即場回應: 淨係今日靚咋?! hehe.......

之後, 係大妗姐(媽咪個好姊妹)嘅引領下, 拜過祖先之後, 就向長輩敬茶! 斟茶俾亞麻時, 佢可能感動得濟, 眼濕濕呢~~~~~ 而其他人都好開心好興奮!!!

大約11點左右就出門! 媽咪再三叮囑我同張先生唔可以踩到個門檻同埋掂到門框喎! 但唔知咩因由?! 而細妹第一次做伴娘關係, 擔遮時係咁篤到我個頭, 最搞笑係入Lift時, 關遮時一嘢笠一笠我個頭, 佢真係搞笑呢~~ 俾伴郎笑佢夢夢上身, haha......

落到樓下, 好多街坊都眼望望呢~~ 係車度影咗一陣相就出發往男家!!!