煮飯仔

尋日張先生要返工, 無無聊聊嘅我, 朝早同屋企人飲過早茶, 便一齊逛街, 係屯門巿廣場路過時, 睇埋什麼世界第一花式足球Mr. Woo嘅表演添~~ (其實係媽咪駐足觀看, 唔多願走, 所以成家人就陪佢一齊企係度睇...) 最搞笑係, 當表演完畢, 個位Mr. Woo同在場觀眾扼手, 媽咪十分興奮, 仲叫細佬用佢個相機幫佢影底, haha......好可惜, 企咗個唔係有利位置, 個位Mr. Woo無行去媽咪面前~~

之後佢地就回家, 我就繼續無所事事四圍逛, 去咗書局睇下今晚煮乜餸好, 睇到有個湯 <沙參肉竹節瓜湯>, 話係滋陰消暑, 材料有沙參、肉竹、節瓜、瘦肉(我改咗用排骨)、紅棗、南北杏, 夠簡單, 材料又易買, haha.....(我仲自己自作主張, 加埋我至愛嘅蠔士), 跟住返老公度, 買餸煲湯煮飯仔等老公收工!!!

原來買餸都好重架(本來想買過西瓜返屋企食, 消暑一下, 但太重, 拎唔到), 過往真係辛苦老公囉~~ (因為同老公買餸時, 全部都係佢拎, 唔駛我拎) 成個下晝就係準備晚餐, 三餸一湯, 白飯任裝, haha...... 有呢個 "沙參肉竹節瓜湯"(改良版)、"蒜蓉菜心"、"蕃茄炒蛋" 同埋 "清蒸桂花魚".

清洗好d餸, 我就 一邊準備明日嘅午餐(同埋張先生嘅晚餐) "茄汁肉醬意粉", 一邊煮, 一邊聞到煲湯時d蠔士散發出陣陣香味~~ hehe......

但係張先生尋晚夜咗返呢, 原本話六點收工, 點知成七點先走得, 返到屋企已八點幾, 係等佢返黎期間, 肚子已不停打鼓, 於是飲咗兩大碗湯(好味~~

), 仲蒸咗幾粒燒賣食!!! haha......跟住就開始"打仗", 等張先生返到屋企就有飯食!!! 

張先生話d菜好老(買個時個樣幾靚架, 但好睇唔好食, 仲要唔係平

), d蛋煎得厚得濟, 但條魚就蒸得靚, 啱啱好, hehe......我都覺得條魚蒸得好呢~~~~

總結, 做家庭主婦真係唔易, 爭係諗買咩餸都覺得煩~~ 本來諗住抺下屋, 點知都係無時間, 一個字 -- 忙!!! 非常佩服每日日頭返工, 夜晚仲要返屋企煮飯執屋嘅家庭主婦, 真係要向佢地致敬~~~