世界杯八強

呢兩晚都與張先生係屋企睇世界杯, 前晚就睇德國vs阿根廷, 張先生認為會係阿根廷win, 而我就對兩隊都唔熟悉, 又無乜感覺, 見張先生揀阿根廷, 我咪包咬勁, 揀咗德國, 結果我揀o既德國win!

不過呢場都唔好睇, 張先生話睇睇下覺得唔對路, 踢踢下阿根廷就將猛將調離場(唔記得係乜水添~~ｈehe...), 好似特登讓德國出線咁, 係度打假波 (唔知係咪阿根廷個coach收咗德國錢呢???), 所以張先生對阿根廷o既表現好失望! 可能我受到張先生o既影響, 再加上與尋晚個場英格蘭vs葡萄牙(好精采!!!)比較, 德國vs阿根廷呢場真係唔好睇!!!

尋晚就坐定定睇英格蘭vs葡萄牙, 一開始, 張先生就問我覺得邊隊win, 相信好多人都會揀英格蘭, 但上一次睇英格蘭vs巴拉圭, 完全唔好睇, 英格蘭踢得好差, 同埋唔係好明白點解咁多香港人咁鍾意英格蘭, 真係唔係好明白, 可能因為明星效應卦???羊群效應??? 有碧咸??? (碧咸確實係靚仔萬人迷黎o既, 但迷唔到我, hehe...)

老實講, 我唔係咁鍾意英格蘭, 結果我揀葡萄牙, 其中一個揀葡萄牙o既原因係Cristiano Ronaldo係葡萄牙!!! hoho......又高大又有型又靚仔......hoho......以我呢個一直唔睇報紙波經、唔多留意且平日亦唔會刻意去睇波o既人, 點解會鍾意Cristiano Ronaldo呢??? 就係有日睇某本雜誌, 裡面夾住佢o既poster, 就係咁就俾佢迷住了, hoho......

--------------------------------------------------------------------------------------------------------------------------------------------
Cristiano Ronaldo (C﹒羅納爾多)

出生日期: 1985-02-05

出生地點: Madeira (葡萄牙)

體重: 75kg

身高: 184cm

位置: 中場

曾效力球會: 裡斯本競技隊、曼聯

(資料摘取自http://www.manunited.com.hk/zh_cn/)

--------------------------------------------------------------------------------------------------------------------------------------------

講返尋晚o既賽事, 全程都好緊張刺激(一到緊張關頭就捉住咗張先生o既手指公, hehe......), 英格蘭守得好, 葡萄牙亦攻得妙, 全程大家叮噹馬頭, 一個字"勁", 踢踢下碧咸因腳傷而退下, 跟住勁勁前鋒朗尼因為腳踩對方球員要害而被紅牌遂出場(個個被踩要害o既葡萄牙球員真係傷囉~~), 打少一個o既情況下, 兩隊都仍然叮噹馬頭, 踢咗120mins都分唔出勝負, 要等到互射12碼黎決定勝負, 真係好緊張呢~~~~ (張先生話英格蘭好黑仔, 每屆總有個球員咩鑊, 上屆係碧咸, 今屆係朗尼, 下屆英格蘭要去拜下神, 邪一邪佢先得啦, hehe...)

踢12碼o既球員同埋手龍門將o既壓力都幾咁大呀! 是勝是負, 真係一失足成千古恨呀!!! 當葡萄牙第一球入咗, 跟住英格蘭唔入, 真係好開心, 跟住葡萄牙個兩位球員竟然唔入(睇佢兩個個樣就知佢地無信心射, 結果, 一個撞柱, 另一個唔知想射去邊 =.=), 當兩隊打成平手 (支持葡萄牙o既我, 不停捉住張先生o既手指, 不斷嗌 "加油" "加油", 為葡萄牙打氣, 好在係係屋企睇, 如果去酒吧睇, 恐怕會俾英格蘭o既fans怒啤吧 =.="""), 淨底決定勝負個兩球, 真係勁緊張呀!!!  踢到last個球, 終於輪到充滿信心o既C. Ronaldo出場啦 , 入咗, 入咗呀! yeah! yeah! yeah!

真係好開心, 好高興呢~~~~~~   原來睇波都幾刺激, 自己鍾意個隊球隊win咗, 尤其興奮呢~~ 唔怪得之咁多人, 不論男女, 都咁狂熱啦! 不過, 下場葡萄牙對法國, 可能都無機會出線吧~~ 因為葡萄牙前鋒好費呢~~ =.=" (尋晚全晚都無聽過個旁述講過葡萄牙個前鋒個名, 淨係成日講英格蘭d球員)

本來好想睇埋巴西vs法國, 但實在太眼瞓啦 (我同張先生都認為呢場一定好好睇), 結果都選擇咗去瞓覺! 仲以為巴西隊會出線, 結果卻出人意表, 竟然0:1輸咗比法國, 賽果實在太令人意外啦~~