水車屋

尋晚與張先生去咗尖沙咀水車屋食buffet慶祝生日(同事介紹過話好, 所以就去試下), 不過張先生遲到, 等咗佢差不多45分鐘, 佢都係因為要開工, 所以先遲遮...自己就買定本雜誌食住等佢, haha...

尋晚都好多人去食, 全店爆滿, 坐無虛席, 星期一book位都要坐係bar枱(我覺得坐枱好過坐bar枱), 難怪上次同朋友食飯, 打算去水車屋食, 早一日book都book唔到, 所以大家如果打算去試下的話, 就早四五日book枱吧~~ (如果同一大班朋友食, 可以嚐試book房, 房個d係 "他他咪", 好得意, 不過就得三張枱係 "他他咪")

至於食物方面, 有刺身、手卷、壽司、鐵板燒、中式、天婦羅、甜品還有其他小食，款式都算多, 味道就一般, 不過不失, 而刺身都算新鮮, 但上菜速度就真係慢, 尤其是熟嘅食物, 等咗好耐, 還以為係走咗單, 於是再叫刺身、手卷同埋甜品, 點知差唔多食到好飽時, 先黎碟炒雜菜 =.=""", 結果就同待應姐姐講唔要個"香芒三文魚手卷", 因為確實食唔落, 唔好浪費~~

刺身: 刺身除咗相片個d之外, 仲有幾款刺身, 有帶子同埋幾款魚類(唔記得係咩魚, 因為魚類刺身實在有數款, 同埋除咗三文魚刺身之外, 其他刺身我就不感興趣啦~~)

(上圖) 北寄貝、三文魚(我嘅至愛, 厚厚的好有口感, 正!!!)、赤貝& 甘蝦(肚仔度黐住晒灰色嘅蝦子, 感覺怪怪的, 試過聊少少蝦子黎食, 無味道, 所以撩走晒, 淨係食蝦肉, 都唔差) 

(下圖) 靈?魚(賣相幾靚, 一片魚下面黃色嘅係魚子, 咬落去d魚子度"索索"聲) & 吞拿魚

壽司: 類別都有十數款選擇, 我只叫咗部份咋(怕叫得多, 食個嚿飯都食飽啦, 又唔想浪費~~) 火焰類別就得三款(三文魚、芝士帶子同埋牛肉)

(下圖) (左) 三文魚、火焰芝士帶子、火焰三文魚、(中) 帶子、唔記得係咩魚 (右) 炸蝦卷、炸軟殼蟹

天婦羅: (下圖) 蝦、番薯、南瓜、洋葱, 其實另外仲有冬菇、多春魚, 不過無叫到!!! 番薯同南瓜天婦羅好好味呢~~~~~~

鐵板: 有蝦、帶子(見下圖)、魚、牛仔骨、薄牛肉、炒雜菜...

小食/中式: 凍豆腐(見下圖)、蟹粥、蠔仔粥(兩款粥都無乜特别)、人參雞湯(都ok嘅)、雞腎串(唔知點解係凍嘅)、韓式煮蜆(辣辣地都ok)、啤酒蝦(麻麻地, 唔入味)...

甜品: 南瓜蓉薄脆(見下圖, 個米通扑扑脆, 都ok), 炸香蕉(好香, 都幾好味

), 烤菠蘿(叫咗, 但埋單都未黎)

總括而言, 未去過嘅都可以一試, 價錢食buffet黎講都算第(兩個人埋單加理一都係$392), 好味度就一般, 最不滿就係叫咗嘅嘢食好耐先到, 等到好悶...

 唔怪得之可以由6:30pm食到9:30pm咁耐啦~~~

地址: 尖沙咀漆咸道9號地下

訂坐電話: 2722-5001