5.1.2009
唔知點解今朝瞓醒覺, 左手踭伸唔直喎?! 一伸直扯住痛, 好痛個隻, 唔通瞓覺時瞓得衰, 壓傷咗隻手?!
放工去咗睇王大夫, 咳咗好耐都仲未咳好, 氣管敏感真係麻煩, 一咳就手尾長, 唉~~
到夜晚, 左手踭都未痛完, 輪到右手膊頭個關節位勁痛, 郁一郁就已經勁痛, 手遞唔到高, 總之少少郁動已經好痛, 唔郁隻手就唔痛, 究竟發生乜事?! 瞓覺都要攤係度唔郁隻右手至瞓到..........
6.1.2009
起身見仲係咁痛, 就同老細請病假, 等B仔爸放工回來食早餐, 跟住陪我去睇跌打, 咁大個人自懂性以黎第一次睇跌打, 都幾驚下架, 唔知會點扭我架麻~~~
等咗成粒鐘至輪到我睇呢! 入到去坐係房中間, B仔爸坐在一傍, 黃師傅檢查完就話我頸對落凸起個舊嘢好凸兼好實, 仲叫B仔爸睇, B仔爸都話好凸, 黃師傅話呢度勞損, 會影響到手同成條尾龍骨, 我問我腰骨間中會刺痛, 會唔會關生完仔事, 黃師傅就話都係關凸起個度事!
跟住黃師傅就幫我按鬆凸起部位, 然後又拉手, 又拉腰, 又話拉返正個膊頭, 初初都覺得好好笑, d動作都幾大下, 但又好驚~~ 話晒第一次去睇鐵打麻! 黃師傅就成日叫我放鬆, 我就成日同自己講要放鬆!
"舞"完一輪, 又確實鬆返d, 無之前咁痛, 但仲有少少痛, B仔爸都話凸起部位都無咁凸同無咁實, 跟住就敷藥係凸起部位, 要敷成六個鐘! 咁就睇咗大拿拿350蚊! 仲要睇多2,3次呀~~
睇完跌打就返屋企, 睇咗套戲 <畫皮>, 尾個部份好感動呀~~ 睇到B仔媽眼濕濕!
沒有留言:
張貼留言