年三十晚

25.1.2009

今晚過咗嫲嫲度食團年飯, 今年好奇怪地, 嫲嫲無叫大伯二伯一家黎食團年飯!

去食飯之前, 帶咗B仔係附近個花巿行咗一轉, B仔見到d氫氣球好似好想要咁, B仔媽好想買個細細地既俾B仔, 但B仔爸唔俾, B仔媽俾錢都唔俾呀! 話B仔唔識玩喎! B仔媽細細個時見到呢d氫氣球, 非常之渴望擁有呢! 但當時買一個好貴, 媽咪唔會買呢~~ 所以B仔如果想要, B仔媽一定會買一個俾佢! haha...

一去到三伯屋企, B仔見到爺爺嫲嫲開始驚, 係咁黐住B仔媽, 仲要攬住B仔媽兩條腿唔郁唔望佢地添呀!

B仔爸抱B仔俾爺爺抱, B仔個樣一副好不願意, 想剷落地但又唔多敢, 但又無喊喎~~

嫲嫲見爺爺抱得咁過癮, 佢又黎抱, B仔一到嫲嫲手, B仔個樣係超唔願意, 但又係唔敢郁, 唔敢剷落地, 見B仔爸同B仔媽都無意慾抱返佢走, 就開始扁咀, 繼而開始喊, 嫲嫲就咋咋臨俾返B仔媽(因為B仔媽至近佢, 否則實又俾B仔爸而唔係B仔媽呢~)

當B仔熟習咗, 雖然都仍抗拒嫲嫲, 但又不至於一望見佢就喊, 已叫做好好囉~~ 如果唔係, B仔媽會好唔得閒呢~~ haha.....

食飽坐到九點幾至返屋企, 返到屋企第一件事就係煲椂柚葉水, 跟住就咋咋臨同B仔白白豬, 跟住瞓覺豬啦~~ 天氣真係勁凍呀!!!

B仔瞓咗, 就煮咗碗湯圓食! 今次買現成, 御品皇既花生同芝蔴味, 都ok啦~~ 但就甜咗d~~