花面豬 + 椰汁年糕

17.1.2009

B仔, 你做乜變咗花面豬呀?!

公公話俾玩具界到, 應該係舅父俾佢玩個部車仔!

今朝B仔晨早八點幾就醒咗, 開支奶佢食諗住繼續係床度再hea下啦~~ 點知... 換片時發現漏尿 =.=""" 想唔起身都唔得啦!

搞掂晒十點幾就去街巿買餸, 同埋諗住整年糕, 第一次整咋~~ B仔部私家車變咗貨車! Haha.....

12點幾趁B仔午睡, "B仔媽黃金時間"開始啦~~, 咋咋臨動工做椰汁年糕! 過程實在"呢咁Hea", d粉黐埋變咗好多舊嘢係d粉漿度, 搞到要續d續d搞返勻佢, 都搞咗好耐下呀, 好不容易至變返順滑既粉漿呀! 第一次整, 無經驗係咁上下架啦!

未蒸都已經聞到好香既椰汁年糕味!

大約一個鐘之後.......... d糕就完成啦! 但個面就好樣衰下喎! 自己人食無所謂啦! 好食咪得囉~~ 事實味道確實唔錯喎!

圓形呢個棷汁年糕係俾婆婆的! 事前都唔敢同婆婆講B仔媽整年糕, 因為B仔媽話整, 婆婆就話買算啦~~ 話如果整年糕失敗咗唔好意頭喎!

在蒸糕期間, 柏滔同軒軒上咗黎一齊玩呢~~ 軒軒第一次見, 三個小朋友當中, 至大件就係軒軒(無影到相添), 抱上手好"聚"手下架! haha...

之但係, 至曳個個仍然係張B仔呀! =.=""""""" 又同柏滔爭玩具玩, 人唔玩佢又唔去玩, 人地玩緊就偏要去搶人, 唔通真係"隔離飯馨香d" ?!

玩到5點左右柏滔同軒軒就返屋企lu~~ B仔媽都好忙碌, 同B仔沖涼, 開奶, 黃昏睡一睡(當然係B仔至有咁既享受啦~), 同埋執返整齊個"戰場"呀! haha..................

今晚B仔同B仔媽既晚餐~~ 都幾豐富下架! 有肉碎蒸水蛋、薑葱蒸鯇魚、白烚雜丸、燉川貝果皮瘦肉湯!

由於個電子煲今日好busy, 蒸完糕又要燉湯, 無時間俾佢煲飯俾我地食, 於是B仔媽用咗個"乞兒兜"黎蒸飯! Haha... 蒸出黎都唔錯架! 不過就好似晒咗d煤氣咁囉~~

B仔好多時走到好前睇電視, B仔媽今日就開始訓練B仔要坐係凳度至可以睇電視, 一離開張凳B仔媽就轉台令到電視畫面黑晒, 要B仔坐返上凳至開, 試咗幾次, 又得得地喎! 一同B仔講要坐係凳度至有得睇電視, 佢又真係乖乖坐定定喎! 希望唔係淨係今日至work啦~~ 不過返婆婆度B仔又放肆架啦~~