大年初六

31.1.2009

今朝瞓醒就去咗見嫲嫲, 但B仔又係一見佢就好抗拒, 係咁黐實B仔媽, 嫲嫲抱又係即喊, 大大滴眼淚標出黎呀~~

唉... 嫲嫲又重提叫我地返去佢間屋度住, 真係煩, 都講咗九億幾次話唔返架啦! 人地住係依家間屋好地地, 又想人地返佢度住, 究竟佢係咪一定要人聽佢既做法黎做至安樂架?! 人地真係想住就唔會搬走啦!

又對住B仔話第時踩單車接佢返學放學, 乜我有講過要佢接我個仔返學放學咩?! 唉... 真係煩爆呀! 睇黎佢真係打算第時B仔返學時幫我湊仔, 大濟!!!

探完嫲嫲就去食嘢, 食飽飽行咗一陣街就去街巿買餸! 買完餸就返屋企!

是日晚餐有......

淮山杞子雪耳龍眼肉無花果煲豬展(之但係我覺得個豬肉佬應該俾咗瘦肉我呀 =.="")

南瓜蒸排骨 (B仔爸話好正! haha...)

米水瑤柱浸菜心

薑葱蒸唔知咩魚 (hehe... 買魚時問過個賣魚婆, 但轉過頭就唔記得佢名堂, 要問返舅父仔或涼粉媽至知佢何方神聖, haha... 都幾好味, 條魚大拿拿40蚊呀)

肉鬆蒸水蛋 (Special for B仔的, 但B仔爸同B仔媽都有份, haha)

仲有B仔碗南瓜飯

大年初五

30.1.2009

今日去咗B仔爸個好朋友度拜年, 仲有兩個姐姐同B仔玩, 玩得好開心呢~~

坐到四點零鐘就去咗志蓮淨苑, 個度影相都幾靚! haha... 但個度五點就關門, B仔爸泊車黎到都已經欄住咗唔俾入去d佛度, 等B仔爸期間, B仔媽同B仔已行咗入去睇咗一趟, haha...

入唔到去, 就係出面影下相!

跟住過對面個公園, 都未行到入口已俾管理員話唔入得, 因為準備關門, 唯有下次早d去啦  =.="""

之後去咗Mega Box, 因為之前成日睇Hipot廣告, 諗住去試下, 去到點知...... 原來B仔媽記錯咗地方, 結果去咗德興打邊爐! B仔第一次係街打邊爐呢~~ 至抵就係B仔啦, 任食火煱B仔唔洗錢, 但就由頭食到落尾! haha... 食到尾聲仲要痾咗篤屎, 好彩個時大家已食飽飽!

食飽飽去咗打鼓呢~~ B仔爸都唔知點影相, 應該影埋隻米奇麻~~

影完相就返屋企lu~~ 今日B仔勁攰啦~~ 玩足全日, 仲要無乜點瞓!

今日係荷李活廣場同Mega Box停車場都free, 至抵係荷李活, 我地都無消費, 只要着牛仔裝就有得free 3hrs, 着條牛仔褲都得! haha..... Mega Box就食咗餐打邊爐free咗5hrs, haha......

大年初四

29.1.2009

今日無無聊聊無嘢做, 想去海洋公園, 但又瞓到成11點幾, 晏得濟都係取消咗呢個念頭! 所以都係留係屋企渡過!

B仔帶住牛屎帽嘆益力多, 話知你用頂牛屎帽笠住佢, 有得飲就乜都得, Haha.....

成個大爺咁俾B仔爸餵黎飲, 仲要邊飲邊嘆電視添呀~~

下晝四點幾有兩個姐姐黎同B仔拜年! 謝謝姐仔親手整既芋頭+現成買既豆腐花! 仲有Kit姐姐送既哈記雪糕! Haha...

大年初三

28.1.2009

今日無聊地渡過! 本來去探B仔爸個朋友, 但臨時取消咗! 無聊既B仔媽又同B仔影相, 玩B仔孭牛仔, haha.... 超搞笑呀!

跟住湊牛仔B仔實在好忙呀! 孭住牛仔通屋行呀!

行行下又走去騎牛!

騎騎下又扒係地下好似玩掌上壓咁!

跟住又走去"禁"電視......

"禁"完電視又走去玩狗仔...

總結, B仔無洛洛哥哥湊得咁稱職! B仔係無姿態又無實際, 完全不理會牛牛既生命危險呀! Haha......

四點幾一家三口去咗街巿買餸, 去到街巿, 竟然九成半無開, 開得一檔豬肉, 仲要係見到都無意慾買, B仔明天唯有食齋粥囉~~

菜檔開得幾檔, 又係唔多靚, 買一條粟米都大拿拿5蚊呀! 真係貴! 之但係無計, 樓下d食店開得一兩間, 仲要係唔好食添呀!

是日晚餐......

滾鯪魚肉節瓜湯

蕃茄煮蛋

蒜蓉粉絲焗蝦 (失敗咗!)

大年初二

27.1.2009

今朝B仔爸放工, 一齊去咗M記食早餐, 之後出發去太婆屋企!

嘩... 今日真係凍到呢~~~~~ 可能天氣好凍, 唔鍾意戴帽既B仔都唔抗拒戴呢頂咁得意既冷帽呀!

今年我地最早到太婆屋企! Haha......

每逄初二係太婆度都係食盤菜開年的!

食飽飽坐咗一陣我地就去太嫲屋企拜年, 之後一齊返婆婆屋企! 食埋晚飯就返屋企lu~~

賀年花

無所事事, 拎咗部相機影B仔之餘,  影埋d賀年花! haha...

 

大年初一

26.1.2009

今日係大年初一, B仔爸要返工, 得B仔同B仔媽係屋企渡過! 天氣實在太太太凍, 我地無出過街呢~~ 出過一次, 就係掉B仔條屎片啦! haha......

大年初一既第一餐...... 齋+菜心+麵, B仔就瑤柱節瓜粥

之後就無無聊聊地渡過~~ 無聊時候拎部相機黎同B仔照下靚仔相先啦~~

係旺角花巿買個頂牛屎帽, haha....... 實在太搞笑啦~~

B仔當然唔鍾意戴啦, 一來對佢黎講都幾重, 二來B仔係一個唔like戴帽既人!

夜晚B仔同B仔媽既晚餐, 砵仔蒸飯+西蘭花炒齋

B仔非常搞笑, 見B仔媽係廚房着拖鞋, 佢又走黎着B仔媽對拖鞋, 着住通屋走呢~~

B仔媽俾利是B仔, 望兩望佢就隊俾B仔媽, 走人去玩玩具啦~~

恭喜發財

 

恭喜發財!

祝大家

身體健康!

心想事成!

萬事如意!

財源廣進!

添丁發財!

笑口常開!

幸福快樂!

年三十晚

25.1.2009

今晚過咗嫲嫲度食團年飯, 今年好奇怪地, 嫲嫲無叫大伯二伯一家黎食團年飯!

去食飯之前, 帶咗B仔係附近個花巿行咗一轉, B仔見到d氫氣球好似好想要咁, B仔媽好想買個細細地既俾B仔, 但B仔爸唔俾, B仔媽俾錢都唔俾呀! 話B仔唔識玩喎! B仔媽細細個時見到呢d氫氣球, 非常之渴望擁有呢! 但當時買一個好貴, 媽咪唔會買呢~~ 所以B仔如果想要, B仔媽一定會買一個俾佢! haha...

一去到三伯屋企, B仔見到爺爺嫲嫲開始驚, 係咁黐住B仔媽, 仲要攬住B仔媽兩條腿唔郁唔望佢地添呀!

B仔爸抱B仔俾爺爺抱, B仔個樣一副好不願意, 想剷落地但又唔多敢, 但又無喊喎~~

嫲嫲見爺爺抱得咁過癮, 佢又黎抱, B仔一到嫲嫲手, B仔個樣係超唔願意, 但又係唔敢郁, 唔敢剷落地, 見B仔爸同B仔媽都無意慾抱返佢走, 就開始扁咀, 繼而開始喊, 嫲嫲就咋咋臨俾返B仔媽(因為B仔媽至近佢, 否則實又俾B仔爸而唔係B仔媽呢~)

當B仔熟習咗, 雖然都仍抗拒嫲嫲, 但又不至於一望見佢就喊, 已叫做好好囉~~ 如果唔係, B仔媽會好唔得閒呢~~ haha.....

食飽坐到九點幾至返屋企, 返到屋企第一件事就係煲椂柚葉水, 跟住就咋咋臨同B仔白白豬, 跟住瞓覺豬啦~~ 天氣真係勁凍呀!!!

B仔瞓咗, 就煮咗碗湯圓食! 今次買現成, 御品皇既花生同芝蔴味, 都ok啦~~ 但就甜咗d~~

世上只有自己媽媽最好

24.1.2009

今日天寒地凍晨早輪到B仔媽要工, 真係痛苦!

放工返咗屋企樓下同公公婆婆姨姨飲茶, 公公婆婆幫B仔媽湊咗B仔返黎呢~~ 實在太~~ 好啦!

B仔婆婆唔單止湊B仔返黎, 仲要幫B仔媽買埋今晚餐餸, 買埋料俾B仔媽煲湯, 買埋椂柚葉俾B仔媽年三十晚煲水沖涼, 買埋一盒齋過年煮黎食, 買咗芥蘭苗、菜心、西蘭花仲有蜜糖豆, 個雪櫃一下子爆晒棚! haha...... 婆婆可能驚B仔媽一家過年無啖好食呀! haha..... 所以話呢~~ 世上真係只有自己媽媽最最最...... 好架~~

公公婆婆姨姨坐咗一陣就返屋企!

是晚愛心靚湯 -- 牛蒡紅蘿蔔粟米豬骨湯(正呀!)

蒸咗條石蚌魚, 好鮮甜, 仲有薑汁炒芥蘭苗!