11 July 2007
正日牛一應該係聽日, 但係聽日張先生要返工, 所以提早慶牛一!
同張先生拍拖到結婚至今, 都差唔多八年啦~~ 呢八年以黎, 每年嘅牛一, 都係食餐飯, 佢送份禮物俾我就咁渡過, 發現呢八年黎, 佢係無買個蛋糕俾我切(屋企人每年都會買蛋糕呢~~) 於是尋晩咪同佢講, 等佢醒水, 識做啦!
仲諗住今晚會有驚喜嘅我(女人就係成日都想有驚喜, haha...), 朝早返到公司無耐, 張先生就打電話我知佢同d舊同事去遊船河! 真令人羨慕呀~~ 我都好想去呢! 但佢去遊船河, 咪等於無驚喜俾我?! 仲諗住佢今晚會醒水買定蛋糕係屋企同我切架麻......
到放工, 約咗係沙田等, 理應我去到沙田無耐佢就到架麻~~ 點知等咗佢半個幾鐘至到 
結果, 係沙田太興隔離個間日本餐館食晚飯! 係食到尾聲, 張先生話有件事, 不過呢件事講咗出黎佢知我一定唔會高興, 叫我估, 估唔中, 開估......
佢班同事竟然係"綠盒"karaoke等緊我地, 張先生話買咗個蛋糕
其實我不嬲都唔鍾意去karaoke (張先生知架~~), 一來我唔鍾意唱歌(唱歌難聽), 二來唔鍾意d咁嘈嘅地方, 三來家陣有小寶寶, 更加唔想去karaoke! 四來大肚肥咗兼樣衰咗咁多, 唔想見咁多人 
雖然一班人同我興祝, 理應好高興! 但我比較鍾意靜靜地, 兩口子慶祝下仲開心! 又或者係自己班朋友, 又係另一種講法呢~~
去到karaoke, 一坐低, 小寶寶已不停係咁郁, 唔知佢係聞歌起舞
期間, 佢其中一位同事(其實唔多鍾意佢, 覺得佢好做作, 鍾意引人注目)竟然係karaoke房吸煙 
坐咗一陣, 就切蛋糕...... 食完個蛋糕, 九點鐘就閃人! 因為張先生知我唔鍾意~~
點解我個頭會大過張先生個頭架~~ 唔係肥到頭都大埋麻~~~~~~
呢個就係八年以黎, 第一個張先生所送o既生日蛋糕, 係Tiramisu, 好搞笑地, 食完個蛋糕, 張先生問我好唔好食, 我話唔好(因為我唔好咖啡味), 原來佢都有同感!
其實我咩蛋糕都鍾意食, 唯獨是有咖啡o既就麻麻地好, 所以整蛋糕一定唔會有咖啡出現!
唉...... 八年啦! 曾幾何時同佢講過我唔鍾意咖啡, 又唔記得 
仲有, 今年份生日禮物都唔知有無着落囉~~~
沒有留言:
張貼留言