煲薑醋 + 大清潔

30 June 2007

今日媽咪過咗黎幫我煲薑醋! 幫我刨薑皮之餘, 又幫我抺廚房洗廁所! 唉............. 無諗過佢咁辛苦! 只諗住媽咪過黎淨係幫我搞煲薑醋架咋~~

媽咪係一個愛乾淨兼做不停手o既人, 佢見廚房個抽氣扇布滿千年油積, 睇唔過眼, 所以叫張先生去買支好強勁o既清潔劑返黎搞清潔! 其實我都睇唔過眼好耐架啦~~ 個抽氣扇一直以黎都只係不斷勞動, 但無人幫佢沖過涼架!

個抽油煙機都係我入咗門至省到佢立立令咋~~ 不過大住個肚搞唔到咁操重o既清潔, 張先生又賴賴閒  結果, 張先生係媽咪無意中所施o既壓力下, 唯有乖乖幫外母洗抽氣扇 ... haha... (換着係我叫佢, 實點叫都唔肯郁呀!!!)

抺完廚房, 媽咪又走咗去廁所幫我搞清潔! 佢真係做到無停手呢~~

 叫佢唔洗洗, 佢就話好快搞掂! 點阻都停不了佢o既清潔行動! 張先生亦唯有繼續做清潔助手! 睇黎佢住係間屋咁耐, 都未試過咁大規模搞清潔

搞咗大半個下晝, 媽咪至終於肯坐定定休息下~~ 今日真係辛苦媽咪囉~~~ 所以呢~~~ 永遠都是媽媽係最最最......................................好架

夜晚等埋爸爸收工就一齊食晚飯!

講返煲薑醋先~~

原來都唔係好難煲! 首先洗乾淨d薑, 然後用刀仔刮d薑皮, 刮完就再分別先下d薑皮同埋薑! 薑皮就拎去晒/吹乾留待坐月時沖涼, 而d薑就白鑊用細火烘乾d水份!

跟住將10斤甜醋放入砙煲, 加入已烘o既薑, 用中火煲滾佢, 點解用中火?! 媽咪話驚一滾起, d醋會滾瀉喎~~ 搞到四圍都係就麻煩囉! 滾起之後, 加咗半樽白醋入去, 咁樣d薑醋就會甜甜地又酸酸地! 加完白醋滾佢5mins就熄火, 然後每個禮拜煲滾佢一次咁就得! 好簡單! 係n年後小寶寶o既老婆生bb我都識得點樣幫佢煲呢~~ (haha...

 張師奶諗得真係長遠呀!)

呢d就係上個禮拜張老太買返黎o既薑刨落黎o既皮啦~~ 原來都唔係好多架咋! 媽咪話遲下仲要買d薑黎刨皮沖涼呀! 呢幾日天氣都唔多好, 睇黎有排都未晒/吹得乾! 其實可唔可以用焗爐烘乾佢o既呢?????

呢個煲好強勁, 因為好巨呀! haha.....  有成20公升呀! 10斤醋倒咗入去, 再加埋半煲薑, 都仲有1/3空間淨! 呢個煲特登去買架~~ 原本張老太叫我地用佢個煲湯砙煲黎煲, 但媽咪話太細啦~~ 其實我都覺得細, 但唔好意開口質疑張老太, 我諗係呢個o既一半咋! 所以咪叫張先生臨急臨忙去買!