腳腫 + 胃焯熱

腳腫............

自從上個禮拜開始, 有晚睇電視發覺, 兩隻腳掌腫咗.............. 變咗豬腳................. 仲要腫到無咗腳眼個隻! 望落去脹卜卜, 好似好得意咁!

其實已經晚晚long高咗對腳黎瞓, 食又唔係食太咸, 但都變豬腳, 真唔明解?!

有同事同我講, 隻腳三腫三消, 跟住就好快生得! 但我都唔知呢次係第一腫定第二腫, 之前無留意

 (果然係一名大意嘅孕婦) 亦唔覺佢有消過  ...... 咁即係點呢?!

張先生個同事又話腳腫就好快生得, 想當年佢老婆臨生之前又係腳腫, 結果個仔早咗兩個禮拜出世

唔通小寶寶都會早d出世?! 不過都係等夠37週先啦! 小寶寶你媽媽我仲未幫你洗衫呀! 唔好出黎住呀!

 

胃焯熱................

呢兩三個禮拜, 又唔知做乜, 一到下晝4點打後, 喉嚨"定"就有股熱氣流湧上黎咁......

 好辛苦! 有時搞到仲有想嘔嘅感覺, 但又係嘔唔出!

適逢呢斷時間又係開餐嘅時候, 唔食又肚好餓, 食... 但又食得辛苦! 救命呀~~~~

 仲未搵到能夠舒緩嘅辦法! 保險姐姐話呢d叫胃焯熱(想當年佢懷孕時都係咁), 叫我小食多餐!

唉...... 呢股感覺幾時至無呀?!

小寶寶又有禮物收

姐姐仔, 迷人Pinky, 靚靚鍾太同埋傻kit送咗份禮物俾小寶寶! 謝謝你地哦~~~

一拆開, 原來係個相架黎嘅~~

由出世貼到一歲, 小寶寶第時出咗世, 個樣嘅變化就會呈現係呢個相架上面, haha......  唔知會由醜仔變靚仔, 還是由靚仔變醜仔呢

 

遲來嘅牛一禮物

張先生成日吹我換電話, 因為我用緊個手提都用咗起碼3年啦~~ 3年前買3千幾蚊, 家陣只值2百幾蚊......

其實都唔係咁想換, 一來仲未壞, 二來睇唔啱心水, 三來啱心水個d又貴, 唔捨得...... 四來買咁貴都無乜用, 都係打出打入, 寧願留返d錢買嘢俾小寶寶好過!

尋日路過, 張先生又吹....... 真係頗煩, 一個禮拜起碼吹成2次...... 結果, 一人出咗一部 "生滋" 電話! 左邊個部我, 右邊個部張先生! 張先生個部第呀~~ 零機價! 第時小寶寶出咗世, 張先生返工都可以與小寶寶見面呀! haha......

結果, 呢部電話就變咗做牛一嘅禮物! 夠實用, 但無厘心思! (張先生係咁........)

星期日嘅晚飯

29 July 2007

張先生嘅廚藝進步咗呀~~ 家陣係滾魚湯高手, 拿手過我呀! 點解無啦啦會進步, 咪就係煮得多囉~~

呢排天氣熱, 孕婦又成日唔係頭痛就係胃焯熱, 又唔想成日出街食, 所以張先生要做大廚, 負責買餸煮飯滾湯嘅工作!

是晚靚湯靚餸有........

豆腐大魚頭湯 (個魚頭真係超巨大呀! 買咗大拿拿42蚊, 可想而知有幾巨! 我地見個賣魚亞姐啱啱劏咗條魚, 個魚頭咁新鮮, 咪買起佢囉~~ 滾起啖湯真係好清甜, 好好味! 一d都唔腥!)

冬菇馬蹄粒蒸肉餅 (呢味餸係我整嘅~~ 冬菇浸軟切粒, 馬蹄切粒, 肉碎醃一醃, 跟住撈埋一齊, 放係飯面度, 同d飯一齊煲熟佢就搞掂! 快靚正呀! )

上湯蒜子淥莧菜 (經我指導下, 張先生又學懂一味餸!)

超值沖涼盤 + 小衣架

最近想買個沖涼盤俾小寶寶, 但係屋企附近搵唔到, 搵到嘅d顏色好肉酸, 鮮粉紅色, 鮮綠色, 紅噹噹色...... 真係買唔落手! 本來想買個白色嘅沖涼盤, 吉之島、西田個d實在太...... 貴啦~~ 百幾蚊個沖涼盤! 唔值!

趁住星期六返娘家食飯, 去樓下雜貨鋪睇下有無心水, 結果買咗個粉綠色, 大拿拿35蚊, 質地都唔差過吉之島、西田個d架, 真係超值呀!

  不過盤入面個公仔就有點兒肉酸, 算啦~~ 35蚊貨仔, 唔好要求咁多囉!

星期日, 本來諗住洗小寶寶d衫仔, 於是買咗d小衣架, 5蚊有10個, 買咗20個呢~~ 細細隻, 都好得意!

不過見天氣唔好, 結果又無洗到小寶寶d衫仔! 睇黎要加把勁至得~~

星期六嘅節目

28 July 2007

今日同張先生去咗沙田睇<變型金鋼>, 佢懇睇咗好耐呢~~

適逄暑假, 應該好多人去睇戲, 所以尋日放工, 自己一個人(張先生返工)去咗沙田買飛先! 去到真係嘩... 的一聲呀! 已經排晒長龍預售戲飛! 個條龍起碼三十幾四十人呀! 加上售票速度其慢, 結果孕婦排咗差不多一個鐘至買到飛!

排隊期間, 熱都不特止呀! (因為係室外排) 仲要擔心排到至話無飛買的話就慘慘慘! 因為下晝上網睇時, 得返1/3吉位呢~~ 好彩! 排到我時, 都仲有位揀下, 同上網睇時情況差別唔大~~ 我諗d人係睇Harry Porter多, 搞到孕婦要排咁耐隊!

講返套戲......

一個字, 正! 再俾多兩個字, 精采! 無悶場, 單刀直入, 唔會拖泥帶水係咁交代呢交代路, 變型變得好有型! 又有搞笑位! 暑假值得一看嘅一套電影呀! 唔怪得之連張先生個同事個亞媽都話要睇3次啦!

至於小寶寶, 由開場踢到完場, 中場都有休息過下嘅~~ 真係差d踢c佢媽咪我呀! 搞到我一邊睇戲, 一邊摸住佢黎安撫佢, 但係都唔work嘅~~ 唔知小寶寶係咪係肚入面幻想緊自己係度打緊敵人呢?!

 

睇黎小寶寶鍾意玩機械人多囉~~ 到時張先生有個玩伴啦! 兩仔爺一齊玩機械人打怪獸, 怪獸一定係張先生啦~~

睇完戲, 閒逛咗一陣就返咗娘家食飯! 之後就回家!

33週產檢

25 July 2007

又到見小寶寶一面嘅日子! 今個星期小寶寶33週啦~~ 好快小寶寶就會出世啦! 好期待呢~~

今次孕婦磅重168磅, 比上個月重咗大拿拿6磅, 真係節節上升呀!

........ 連張醫生都覺得重得濟, 佢話 依家距離預產期仲有大約七週, 平均每週重1磅都唔得掂, 又話臨尾呢個月分分鐘每週重1至2磅  ....... 佢仲笑說生完有排減, 到時減完會唔認得我喎 .............

小寶寶頭仔直徑依家有8.9cm, 等於36週大嘅BB; 肚仔直徑10cm, 等於35週大嘅BB; 而大脾仔有6.7cm長, 等於34週大嘅BB! 醫生仲話小寶寶對腳仔應該都幾長呢~~

當醫生話小寶寶個頭仔等於36週大嘅BB時, 好驚訝! 大成3週, 都好似好誇張呀! 又好擔心, 唔知到時生得時會唔會唔夠位出而要開刀

 希望夠位啦!

小寶寶依家有6磅, 醫生估計佢出世時起碼有8磅! 如果醫生估計準確的話, 小寶寶果然係個大隻B呀! 睇黎真係要食少d嘢至得啦~~

醫生又話胎盤開始成熟緊, 估計小寶寶會早過預產期出世, 應該早一個禮拜左右! 係就好啦~~ 一放假無耐, 小寶寶就出世, 咁就perfect呀! 可以多dd時間照顧小寶寶呢~~

又係等咗成兩個鐘至搞掂, 不過等兩個鐘嘅係張先生, 因為佢幫我去登記先, 真係辛苦張先生~~ 而我都係等咗一個鐘左右, hehe......

發覺咗一樣嘢, 我懷疑小寶寶唔鍾意見醫生架~~ 係公司時, 佢就係咁郁, 跟住去到診所, 靜如止水, 到離開咗診所, 佢又開始活躍返!

 

 

相識9週年

25 July 2007

今日係我同張先生相識9週年嘅日子!

無慶祝, 無驚喜, 無禮物, 去咗食雲南米線, 平平淡淡渡過~~

唔通結咗婚係咁.......

 ...... 其實家陣小寶寶已蓋過一切呢~~ haha......

今日除咗係相識9週年嘅日子, 亦係紅娘劉師奶牛一大日子! 係度祝佢牛一快樂! 身體健康! 心想事成! 青春常駐! 減肥成功!

9年前嘅我, 當時仲係學生妹, 因為做summer job(第一份summer job), 結識咗翠思小姐, 又好奇怪地, 我地同劉師奶(當時未做師奶)亦好投緣喎~~

當年今晚, 劉師奶邀請咗我同翠思小姐呢兩個妹妹仔參加佢嘅牛一BBQ Party, 咁就結識咗張先生!

 

小寶寶

小寶寶

作曲：馮翰銘 作詞：克勤

小寶寶 快將出世 期待那天你叫我爸爸

像我嗎 更像媽媽嗎 我想親一下

給你聽 莫札特 從沒有想你變作曲家

願你可 有健康身體什麼都不怕

自細我會教你踢波 我會教你唱歌 我會教你不懶惰

大個仔別讓另一半難過 別要怪我太囉嗦

小寶寶 你可知道 其實我將你當珠寶

在倒數 將來一出世我要即刻抱

爸爸樂意天天抱 爸爸愛你比天高

****************************************************************************

雖然未曾聽過首歌, 但睇歌詞, 好爸爸心聲呢~~ 但其實亦好媽媽心聲!

好溫馨!

玩手手

22 July 2007

呢輪小寶寶郁得好利害, 尤其是夜晚攤係度睇電視時, 個肚間唔使會地震咁, 上下左右咁郁, 好勁呀! 睇到張先生嘩嘩聲! 係咁讚小寶寶勁! 難為我囉~~~ 小寶寶嘅飛無腿有時真係幾難頂!

通常小寶寶鍾意動腳不動手, 但今晚瞓覺時(當然未瞓着), 小寶寶係咁郁隻手仔喎~~ (但係都未見佢伸隻權頭仔黎睇下

) 咪叫張先生摸下佢, 安撫下佢, 等佢乖乖地瞓覺! 點知兩仔爺係度玩遊戲  ........

張先生禁下我個肚(當然係溫柔力), 小寶寶隻手就郁, 再禁下, 佢又郁, 兩仔爺玩得真開心! 張先生仲話小寶寶係度閃避佢呢~~ ... 佢就開心得過, 搞到小寶寶興奮得濟, 張先生瞓覺唔同佢玩時, 自己係度自娛 (可能係度自己玩左一權右一權), 搞到我眼光光咗一輪 輔導佢一輪, 佢至肯乖乖入睡! 

餵mama milk食乜~~~同唔食乜~~~

之前係Cary個blog (http://hk.myblog.yahoo.com/iam-cary/article?mid=4282&fid=104)度睇到一篇關於 "餵mama milk食乜~~~同唔食乜~~~" 嘅文章, 各位準媽媽可以參考下~~

 

不可吃!  媽媽吃了會收奶的食物
木耳     雲耳     白菜     芥蘭     菠菜
乳鴿     豬潤     豆豉     狗菜     麥芽
雞精     人參     韮王

吃多些!  媽媽吃了會多奶的食物
生魚湯(不過有傷口唔好飲住)     鮮奶     燕窩
鱆魚湯     花膠     芽菜

 

而QE亦都比左張上奶湯水單張我:  用豆腐, 花生, 豬蹄, 木瓜煲湯飲都可以多D奶奶

例如: 豆腐肉片湯, 木瓜花生湯, 花生煲豬腳......, 自己鐘意點煲都得~~~

 

 

哺乳戒口 中西醫看法迥異

哺乳戒口 中西醫看法迥異

 (明報) 07月 25日 星期三 05:05AM

【明報專訊】傳統相信魚湯、木瓜湯等食療能改善乳汁不足，但趙永醫生認為，類似方法和眾多產後禁忌都沒有醫學根據，媽媽若計劃餵哺母乳，只需要維持均衡飲食、攝取充足水分和營養即可。唯家族成員若有對食物過敏的病史，便要避免進食花生和貝類海產等致敏食物。

香港中醫師公會會長關之義指出，食物對乳汁分泌確實存在影響。其中豆豉、豬膶、乳鴿特別有「回奶」作用，令產婦乳汁減少；其他生冷寒涼的食物包括魚生壽司、蘿蔔、生菜、芥菜等，都會引致「無奶水」的情况。至於濕熱毒的食物則易令嬰兒哺乳後出現濕疹    和皮膚痕癢。此外，中醫亦能用藥改善乳汁不足。若問題源於氣虛，可以北芪、黨參、蓮子、淮山等治療；若源於血虛，則可用當歸和黃    精。多吃牛羊雞肉則是最簡單及普遍適用的方法。

資料摘錄自yahoo!新聞: http://hk.news.yahoo.com/070724/12/2c6bm.html

葡萄乾

21 July 2007

今日張先生返工, 放假o既我, 又係無所事事, 全日攤咗係屋企, 無乜點郁動, 天氣實在太..........熱啦! 無郁過都一身大汗! 期間落咗樓下買嘢食、閒逛兼涼冷氣, haha.......

走咗去街巿, 問咗個藥材鋪中醫師, 依家8個月係咪可以煲d白蓮鬚飲下去胎毒, 個中醫師話唔駛咁快飲, 到臨生前半個月至開始飲都未遲! 反而依家可以煲d葡萄乾水飲下, 佢話可以潤肺, 同埋令到BB皮膚靚喎!

張師奶從未係網上面聽d孕媽媽或已為人媽媽講過飲葡萄乾水, 只聽過話煲白蓮鬚飲, 所以聽完呢個中醫師咁講, 真係抱少少懷疑o既態度, 究竟係咪真係飲得架?!?!?!?!?!

所以都問清楚個中醫師係咪真係對個bb無影響架?!?!?!?!?!?! 個中醫師話葡萄乾不涼不燥, 適合孕婦飲, 老人家都飲得, 之前有個係北區醫院做o既護士大肚時都有買黎飲, 之後個護士帶埋個bb去搵佢, 佢話個bb皮膚好靚呢~~

於是, 張師奶即管一試! 買咗二両, 分兩次煲! 都唔平呀! 大拿拿12蚊一両呀!

個中醫師話, 5至6碗水煲45分鐘, 臨煲好就放隻烚熟咗o既雞蛋(mook咗殼), 再加冰糖調味, 煲多一陣就飲得! 於是今晚無所事事, 就煲黎試下, 都幾好味喎, 但係落得太多冰糖, 甜咗d!  煲淨兩碗, 一碗自己, 另一碗雪凍留俾張先生!

同中醫師對話期間, 張師奶多嘴問佢依家食唔食得西瓜, 佢當堂面帶驚訝, 話千其唔好食涼嘢~~ 苦瓜, 冬瓜, 蘿蔔, 西瓜, 生冷嘢千其唔好食, 食到肚痛到時你都唔知點算呀~~ (張師奶當堂無嘢好講)

之但係, 咁酷熱o既天時, 真係好好好............ 難唔飲凍嘢喎! 唯有盡力而為, 攤一攤暖d至飲!

至於西瓜, 唯有兩舊起, 三舊止! 盡量都唔食!

其實早幾日同個同事傾計, 佢都叫我唔好食西瓜! 佢講返佢o既經歷, 想當年佢陀住細女時, 臨生又係食好多西瓜, 到佢出咗世幾個月, 有次無啦啦發燒抽筋, 帶佢睇醫生時, 醫生問佢係咪陀住bb時食西瓜! 但同事又無講咩原因同西瓜有關喎!

恭喜恭喜

今個月有好多靚媽媽生咗BB呢~~

Cary, ar lin, 貓貓, 好快就輪到大寶添呀!

一直都有睇開佢地o既blog, 雖然大家都唔相識, 由佢地懷孕期間開始, 直到依家bb出世啦~~ 真係有種莫名o既興奮, 好似相熟o既朋友生咗bb咁呀!

係度祝佢地o既BB健健康康! 快高長大! 聰明伶俐! 聽教聽話!

祝各位靚媽媽早日復原! 修身成功! 努力照顧BB呀~~

係咁頂......

小寶寶呢輪係咁用腳仔頂我心口對落位置, 尤其是食晚飯時候, 頂到我食唔落飯

...... 頂到個肚實一實 ...... 頂之餘仲係咁上下左右郁 ........ 坐係對面食緊飯o既張先生都嘆為觀止 ......

可惜, 仍然未見過小寶寶伸隻腳仔上肚皮

....... 呢輪成日同小寶寶講, 叫佢伸隻腳仔黎睇下, 但佢都唔聽 ......  反而成日凸個pat pat上黎   ..... 肚o既右邊變咗一個山丘咁! 真係好期望係肚皮上見到佢隻權頭仔或者腳仔呢~~ (有史以黎, 見過一次權頭仔咁多咋~~)

呢輪聽d孕媽媽講, d BB係肚入面會打C egg, 當個肚好有頻率咁一下一下跳, 就係佢地係度打C egg, 呢輪發現, 係夜晚攤係度無所事事睇電視時, 個肚真係一下一下好有頻率咁跳, 應該係小寶寶係度打c egg吧! 好得意呢~~ 唔通佢飲咗d羊水, 續親自己?! ......

 

Pizza妹妹下水禮

星期日, Pizza妹妹真開心呀~~

小寶寶舅父同埋亞ming帶咗佢去咗西貢橋咀洲游水!

在船上......... good girl呀~~ 第一次搭船無暈船喎! 仲好精神爽利!

Pizza妹妹係個水泡上面, 個樣好似好驚咁喎~~ 睇黎佢都係鍾意自己係海暢泳多d~~

晒緊太陽嘅Pizza妹妹!

熱到Pizza妹妹條脷都就跌落地.......

聽媽咪講返, Pizza妹妹一返到屋企, 沖完涼, 食咗好多嘢, 又勁飲水, 跟住好早就zZzZzZzZzZzZzZ......