29 Dec 2006
終於有相同埋movie攞啦~~
放咗工去咗金都拎相, 因為d相未晒o既關係, 只得揀相index, 所以細細張都睇住先囉~~ 返到屋企已急不及待開隻cd係電腦睇相, 邊睇邊笑呢~~ (張先生要返工, 所以無份一齊笑, haha......) 覺得個攝影師唔多掂, 有d相影到個人無咗頭頂, 咁都有!
張師奶坐車回歸期間, 就係拿住呢叠index係度邊睇邊陰d陰d咁笑啦~~ haha......
輯movie就未睇, 等埋張先生一齊睇~~
呢兩盒就係結婚當日o既片段母帶, 傻傻的我攞相時, 竟然問店員哥哥我點睇呢兩餅嘢, 店員哥哥話呢兩盒係母帶, 已經整咗隻DVD架啦~~ (張師奶當堂覺得有點兒Law......)
攞完相, 約咗好友亞珊係尖沙咀和民食飯, 傾下計, 真係多謝晒結婚當日咁幫得手呢~~ 送咗份聖誕禮物俾我~~ 謝謝你啊~~ (我都忘記咗你份聖誕禮添~~ 下次補返!!! haha... )
呢份就係亞珊送我o既聖誕禮物 -- 圓碌碌咕o臣啦~~
27 Dec 2006
尋日台灣南部呂宋海峽發生的7.2級大地震, 令到亞太網絡大擠塞! 今日假後第一日返工, 返到去, 奇怪啦~~ 點解開唔到msn? 唔通部電腦神咗? 又唔係喎, 其他同事都開唔到, 唔通公司block咗msn? 原來, 係地震震斷咗海底光纖電纜!!!
無得任意上網嘅日子都幾痛苦呢~~ 做嘢做到悶悶地, 想check email, 又開唔到! 想同朋友msn聊下天, 又無得聊! 想打下blog, 一樣開唔到! 想send個email俾朋友, 又pending咗好耐都send唔到出去.........................睇新聞話最快要5至7日先能完成修復! 不敢相信, 若呢個世界無咗互聯網嘅日子, 會是一個怎樣嘅世界呢 
***********************************************************************************************
放工同張先生去咗沙田逛街(因為要俾個機會張先生去買聖誕禮物俾我, hehe... 簡介:
), 去咗小巴黎食越南菜, 食飽飽就去咗睇<踢躂小企鵝>......
活潑可愛的企鵝仔萬寶，本應鵝見鵝愛，卻偏偏天生不會唱歌．．萬寶的媽咪阿珍與爹地萬飛都知道，兒子如果不會唱歌，將永遠不能吸引女伴，找不到真愛，而上天又似愛同萬寶作對，與他青梅竹馬一起長大的歌莉雅，正是鵝靚聲甜的小歌后。
雖然備受其他企鵝仔取笑，但萬寶卻身懷一種奇怪絕技─就是他曉得跳一種充滿hip hop味道的踢躂舞步。他經常腳仔「郁郁」，自得其樂，氣壞其他企鵝。
萬寶的「異能」不但令他與歌莉雅產生隔膜，更令其他企鵝不滿，長老諾叔最後下令驅逐他出鵝群！
萬寶一隻鵝離開了傷心地，途中卻遇上了幾隻企鵝界中以列文為首的「粥粉麵飯」，與及一隻長有瘋毛瘋翼的企鵝「大情聖」，他們對萬寶出神入化的舞技刮目相看，決定跟他一齊踢躂上路，深入南極…
套戲頭三份二部份都幾好睇, 都幾好笑, 尤其是萬寶嘅幾隻企鵝朋友, 佢地好搞笑呢! bb企鵝仔都好得意呢~~
但尾部份講返人類係佢地地頭大量捕魚, 搞到佢地無啖好食, 係呢方面略為求期交差嘅感覺!
BB萬寶, 肥籐籐, 牙下牙下咁行, 好得意呢~~
26 Dec 2006
Boxing Day, 但都無禮物拆! (張先生仲未送俾我 張先生要返工呢~~ 我一早就返咗屯門同屋企人飲茶, 跟住去咗剪髮, 剪完髮就返娘家! 
)
細妹今晚搭飛機返澳洲啦~~ 佢話係度悶得濟, 所以提早返過個邊做下part-time賺下錢先喎~~
25 Dec 2006
聖誕節係媽咪牛一o既大日子! 夜晚返咗屯門食泰國菜, 去咗山景村隔離楊小坑村o既芭蕉葉泰國菜館食!
呢間泰國菜都幾好味! 我地叫咗8個餸加埋冬陰公, 8個人食, 都係食咗590蚊, 超第呀!!! 個咖喱麵包蟹好好味, d麵包加埋d咖喱, 簡直就正正正呀!!! 蒜蓉翡翠螺都好好味, 又大隻! 燒挪威?魚(唔記得叫咩魚, 似秋刀魚但大條好多), 又係好好味!!! 仲有其他餸, 都good good good!!!
食飽飽就一齊返娘家切蛋糕! 個蛋糕係細妹整, 爸爸做"模術"指導, 點解?! 因為細妹煎好塊皮就一層一層就咁撻係度, 經爸爸指點, 用咗個心型模, 做咗個心形蛋糕!
個賣相就good good good, 味道就見人見志, 我就覺得d cream唔甜, 好似無落過糖去打咁, 細妹話要咁甜做乜, 媽咪話呢個味就啱, 但我同爸爸都覺得唔夠甜呢~~ hehe...
為食o既pizza妹妹想分一杯羮呢~~
係下晝, 自己一個去咗沙田逛街(因為張先生尋晚激嬲我, 今朝又無氹返我 =.= 咪自己去街唔理佢囉) 雖然自己心情唔好, 但係都買咗份生日禮物俾張先生! 係咩?! hehe...... 係兩條孖煙通呢~~ 
而我, 就無收到張先生送我o既聖誕禮物呢~~~~~ 
未到boxing day佢就拆咗, 佢好鍾意呢~~
24 Dec 2006
今朝九點半, 一家人(我、張先生、爸爸、媽咪、細妹、細佬同埋佢女友)出發返鄉下擺幾圍請親戚朋友食餐飯呢~~
十一點幾就返到鄉下叔叔間屋, hea咗一陣就去酒樓! (大陸興食下晝, 唔興食夜晚呢~~)
親戚夾埋都成四圍, 再加一圍爸爸想當年o既同學呢~~ 連爸爸o既一位老師都有出席! 勁呀~~ haha...... 
<--叔叔屋企o既狗仔是日午餐非常豐富, 九餸一炒飯一燉湯一甜品一糖水! 味道都唔錯呢~~ 最好味就係個碟炒茶樹菇同埋蒜蓉白菜, 但係見隔離幾枱都淨低好多呢~~ 六百蚊一圍, 有如此餸菜, 真係平平平呀!!!
這位老師想當年教住一班年輕人, 家陣個個都大啦~~ 四五十歲, 想信這位老師見都佢地成班老同學, 應該都幾感慨呢~~
碟甜品有兩種一隻係南瓜仔(無食到唔知好唔好食) 另一隻係紅蘿蔔仔(其實係年糕入面包住蓮蓉, 味道普通啦~~) 
係美心擺酒時送o既VSOP, 結婚當晚見都未見過係咩樣, 淨咗幾支拎咗返屋企, haha... 今日拎咗兩支返去飲! 呢d又係結婚時飲淨o既紅酒, 拎咗三支返去飲! (結婚個日又係未見過咩樣, 今次第一次見)呢個B女係爸爸其中一位老同學o既孫女, 佢好可愛, 好乖呢~~ 聽媽咪講, 係佢屋企坐, 成班大人係度閒聊, B女就乖乖的坐埋一邊自己玩, 有時we we woo woo咁搭訕添呀! haha......
食飽飽, 爸爸同媽咪就同d舊同學聚舊, 而我地就返深圳按腳後就返香港lu~~~
<--爸爸抱住可愛o既B女
夜晚, 同張先生去咗粉嶺同朋友燒嘢食慶祝聖誕!!!
22 Dec 2006
今日係冬至, 全個張家成員都到齊, 係我屋企做節!!! 真係墟磡呀~~~ 好似打仗咁呀!!!
是晚餸菜非常豐富呢~~
一來唔習慣咁多人迫埋一齊食飯, 總共17人, 一張枱又坐唔晒, d細路坐係茶几食! 成個廳爆滿!
第二, 實在太嘈啦~~ 頭都痛埋(張老太同大嫂嘅聲浪實在太勁)!!! 第三, 佢地搞到成間屋好似變咗街巿咁, 又嘈又烏糟!!! d細路都大啦~~ 點解食飯食到成地都係嘅?! 
第四, 唔明十幾歲嘅姪仔, 點解都咁唔定, 全屋摷呢樣摷果樣!!! 又擒高擒低, 又企上張凳度睇電視, 又企上張sofa度坐, 又想拆埋廳部冷氣, 當時我地食緊飯, 睇住佢整個出風口、調溫制, 我都唔出聲, 忍!!! (但都已經黑黑地面) 跟住仲離譜, 想拆開個外殼, 真係忍無可忍, 示意張先生睇下個度, 有人想拆冷氣機, 成村人望住個姪仔! 佢父母都無出聲! 唯獨是張先生出聲! 唉......... 
第五, 點解大嫂佢地唔係等齊人先食, 都未煮好晒d餸就邊食邊等 
當佢地離開之後, 間屋好似打完仗咁, 地板烏糟到爆! (二嫂好好, 臨走前幫我抺過地下先! 其實有阻止佢抺架, 但阻止不了呢~~) 雖然抺咗一次, 但都唔夠乾淨呢~~ 佢地走晒之後, 就進行清潔工作, 拖拖下都無心機拖, d黑忟忟烏積好難抺呢~~ 
有煲炆花膠冬菇, 係咁摷! 叫其他人點食... 
結果, 向張先生發咗個少少脾氣, 我話好攰, 唔抺啦(其實係佢地未走時, 搞到間屋咁, 張先生都知我心情都已經唔好), 結果, 張先生自己係度抺!
唉.................. 往後嘅做節日子點算! 獲獲搞到咁烏糟好難頂呢~~ (本人有少少潔癖呢~~)
22 Dec 2006
係lunch時間, 公司搞咗個x'mas party, 但其實x'mas party前大老細講咗一輪部門嘅事項, 先至開始所謂嘅party!!!
Party係一點鐘開始, 但係等呀等~~ 等呀等~~ 等到成點半先有飯開, 真係餓死人囉~~~
食到咁上下, 大老細就發表言論啦~~ 當中提及五天工作天, 真係好啦~~ 終於公司轉五天工作天啦~~~ 但係, 因為serve同學關係, 要輪返星期六, 但就輪耐d先返一次, 唔駛好似依家咁, 兩個禮拜就返一次! 不過安排如何, 有待各section主管定案!!! 跟住大老細又發表咗一項不受歡迎言輪! 大前題係: 佢發現同事有遲到嘅習慣(我地返8:45am, 放5:15pm, 但有部份同事九點幾先至返)...... 所以返工時間有更改, 返9:00am 放5:50pm 
最後大老細話送份大禮物俾大家, 就係今日party完就可以收工!!! 就係佢呢份大禮物, 搞到大家不知幾咁不知所措, 究竟今日係咪有得早收工呢?! (因為隔離部門開完P就收工) 又未收到任何email通知喎~~ 拎唔拎袋去Party呢?! 
簡直就係一個超壞嘅消息呀!!! 
大老細講完一大輪嘢, 就開始抽獎環節(家陣先正式進入聖誕party嘅環節), d獎品由各section head貢獻! 我好幸運地, 抽中獎喎~~ 份獎品係隔離section老細(簡稱"度叔"老細)貢獻嘅~~ 係一盒咩咩白茶(茶葉黎嘅~~) Linco都抽到一盒人蔘茶包(又係"度叔"老細), 大家第一個反應都係: 過咗期未架?!
係搭車返歸時, 無無聊聊咪拎黎睇下, 發現保存期係一年, 生產日期係2006年3月8日 臨走前, 交換禮物, 抽到兩盒鉅記鳳皇餅, hehe..... 
家陣都已經12月尾, 咪得返兩個月左右?! 咁大包嘢點飲得切呀?! 
都唔知係咪返大陸交流時, 或者d大陸團體黎交流時嘅贈品黎呢~~~~ Anyway, 當抽到個幸運!!!而我貢獻個份禮物誰人抽咗?! 咪就係傻kit kit囉~~ wahahaha........ 
食得, 夠實際, good!!!
份禮物注定係佢架~~ 事緣我、姐姐仔同傻kit kit lunch時一齊去買禮物, 我買咗盒朱古力(見下圖), 揀時盒盒個盒都笠笠地, 我就話是旦啦, 唔會咁黑仔自己抽到嘅~~~ 到買花紙時, 我揀到張粉紅色幾靚嘅, 傻kit kit當時話: 依~~ 粉紅色, 唔鐘意! 咁我就話, 咁我揀囉~~ 並祝傻kit kit抽到我份禮物!!! 
wahahahahahahaha..........呢個係我今年收到o既第一份聖誕禮物, 係同事shan同susan送o既~~ 點知真係開口中喎~~~~~ (但六合彩唔見中) 走時見傻kit kit手上份禮物咁熟口面嘅?! 原來佢真係抽中我個份粉紅色包裝嘅朱古力喎~~~ 呢件簡直係2006年度最搞笑嘅事! 當時笑到我同姐姐仔差d抽筋呢~~~
