攞Passport, 睇BB

7.4.2008

好忙的半日!

今日拎咗假, 九點幾就要焗住醒, 趁B仔瞓醒要食奶奶, 就咋咋臨餵奶、執奶粉袋, 換件靚衫去拎特區護照!

瞓醒嘅B仔, 坐係搖搖椅度~~ 唉... 越大就越曳! 放佢挨係椅背, 佢就扶住兩邊 "吉" 起身, "吉" 咗起身就向一邊挨, 個頭就 "long" 係扶手位, 另一隻腳就 "long" 係另一邊, 跟住就係度嘆手指, 扶返直佢, 唔到五秒又變返咁... 今云衰到隻豬腳都走埋出黎(離開咗安全帶) 

未出發, B仔已渾身是汗, 臨出門口同佢抺身抺頭, 個樣超爆笑~~

坐係度拎玩具連環圖~~

10點半出門口, 11點左右去到元朗入境處, 唔駛15mins就拎咗本passport!

之後搭輕鐵去屯門中旅社申請回鄉証, 部輕鐵一到站, 成村人湧去車門等入車, B仔媽差d俾佢地迫C咗~~ 真討厭! 係咪無位坐會C人架?! 最後孭住B仔嘅我當然無位坐, 想有人讓位坐下都難上加難呀!

去到中旅社, 15mins左右就搞掂~~ 2個鐘搞掂晒d嘢! good呀~~

之後係巿中心食嘢, 然後約咗婆婆去睇BB, 婆婆個好姊妹抱孫呀!

上到去BB屋企, BB媽黑口黑面咁, 招呼又無同我地打, 食完碗麵就帶埋BB入房, 咩人黎架?! 幾唔鍾意都扮下嘢, 俾返少少面自己個奶奶啦! 仲要係為人師表, 都唔知佢點教人!

直到BB個爸爸返黎(佢nice好多), 至抱個BB出黎俾我地見下, 當然個女人無蒲頭啦~~

好搞笑, B仔望住細BB眼定定, 對住細BB講BB話時, 細BB合埋眼都睜大隻眼仔望住B仔, 好得意~~ 唔通佢地係度互相交流緊?! 還是細BB啤住B仔話佢嘈住人地瞓覺?!

本來好想影張相, 但都係唔好, 驚人地唔鍾意~~

之後就同婆婆一齊返娘家! B仔做咗臭B呀~~ 勁臭(汗)呀! 都未到夏天, B仔已着短袖衫, 仍無時無刻濕水雞仔咁, 到夏天點算?!