第一次飲

19.4.2008

因乜解究早前幫B仔拎特區護照同回鄉証?! 咪就係因為今日囉!

今日係B仔媽個堂細佬結婚之日, 唔出席又唔得, 其實真係唔多想帶B仔北上架~~ B仔仲咁細個, 同埋無人湊B仔麻~~ 無奈~~

好彩有舅父仔專車由屋企樓下直到鄉下酒樓, 中途唔駛落車過關, 所以至一齊北上咋~~

今日係B仔第一次北上, 第一次去飲呢~~ B仔媽第一次北上飲!

今朝晨早八點半就要起床準備!

B仔起床就放佢係搖搖椅, 諗住B仔爸睇住, 咪唔扣安全帶囉~~ 點知........................................... 可以玩到自己掉轉黎坐! =.=""

食飽飽, 抺面, 換衫, 仲要抺埋個頭(勁大汗呀!), 跟住攤係地墊度玩玩具自娛! B仔媽就繼續忙忙忙!

十點鐘出發~~

差不多十二點到達酒樓! 大陸飲宴興食下晝!

大陸既婚禮真係同香港唔同, 坐咗係酒樓成粒鐘都未見新郎新娘既影踪, 又無人同佢地影相, 一問之下, 原來佢地企咗係Reception度迎賓! 唔怪得之唔見佢地啦....... =.="""

佢地到入晒席, 至進場! 進場之後就有個司儀(酒樓經理)講一大堆恭賀說話, 聲大夾有幹勁, B仔媽真係忍唔住笑出黎呀!

之後一邊出豬, 一邊大個騎呢人走出黎唱歌! 驟眼睇以為係女人, 望真d, 男人黎架喎~~ 似去咗聯歡會多過去飲!

隻豬都幾爆笑, 成隻淨係片咗一片片皮, d肉又無切出黎, 淨係食皮, 但又唔翠, 仲好好o趙口添~~ =.="""""

隻豬身咁點?! 原來食到最尾尾, 隻豬頭同豬身後上, 最爆笑係, 條豬尾放正係中間, 成條天線咁向上"隊"上黎, 真係經典~~ 

雞是凍冰冰的, 龍蝦好似俾人食咗一半, 蟹蚶假牙都差d咬甩, 仲要係香港一粒等如佢4粒, 細粒到呢~~~ 扇貝細過一蚊, 上次買8蚊一隻既帶子等於佢8粒...............................

跟住d餸係咁上, 放到成枱都係, 唔同香港食完一味至黎另一味!

至搞鬼係個所謂既翅, 睇個樣, 點解咁啡色?! 食第一啖, 點解有花生醬味既?! 當堂唔多想食, 一個字形容: 怪!

全餐最好味, 亦是唯一好味既係至尾既點心 -- 餐包仔! 其他餸都食淨一大碟, 但其他枱都清晒, 未清晒都打包走~~

每席要成差不多三千蚊, 但成枱餸, 跟本一千蚊都唔值! 都唔知係咪俾人搵笨! 想當年B仔媽同B仔爸結婚都返去簡簡單單係間酒樓擺咗幾圍請食飯, 一圍都只不過係六百幾蚊, 不知正幾~~ 咁多! 不過B仔叔公要faces, 係酒店擺, 可能佢地覺得值呢~~

到散席, d賓客走得七七八八, d待應就咋咋臨收枱, 做清潔, 到賓客走晒, 我地想入禮堂影返張大合照, d字都已經拆走埋, d效率真係其高呀~~~~~~~~~~~ 結果唯有係酒店lobby影!

至爆笑係, 本來有五張凳响樹影相(俾長輩坐係度影), d待應趁d長輩影完起身, 手腳其快地收下又一張, 收下又一張, 相都未影晒, d凳就俾佢地收晒 =.=""""""""""""""""""""""""

今次既婚宴, 真係大開眼界, 兼食得最少既一餐!

我地影相期間, B仔瞓到豬的一樣!

飲宴完畢, 係B仔叔公叔婆屋企坐咗一陣, 就急急返港! 雨實在太大, 速速回歸視為上策!