又到無聊星期六

26.4.2008

尋晚B仔舅父車咗我地返屋企, 今朝B仔爸放工返黎, 去搵位飲茶, 點知我同B仔去到酒樓時, B仔爸自己已食飽 =.=""""""""""""""""

B仔媽叫咗一籠叉燒飽同埋海鮮扎就搞掂~~ B仔媽自己一人食晒成籠飽, 本來都唔想叫飽, 都係為咗B仔有包包食至叫咋~~~

天氣唔多好, 矇查查咁, 能見度超底, 空氣好似好污糟咁, 所以無地方好去, 又係留在家中的日子! 飲完茶, 買完餸就返歸!

今日煲咗節瓜茸瑤柱瘦肉粥俾B仔食! 唔知B仔係咪一早認定咗我煲嘅粥係唔好食, 肚仔餓, 又想瞓覺, 扭晒計, 係都唔食d粥(初初無加瑤柱架), 於是開咗支奶俾佢食算! d粥唯有晏d至再俾B仔食! 但B仔爸試過一啖佢話好味喎~~~ 都係唔好啦~~ 加d瑤柱去煲下出味d試下先~~

食飽就眠一眠, 瞓醒俾咗條餅B仔咬, 一邊咬一邊睇電視!

食完餅餅就要飲水水, B仔係一個唔多鍾意飲水嘅BB, 用奶樽餵佢飲水, 啜兩啜就"bu"晒d水出黎 =.=""

不過, 買咗呢個學習杯俾佢學用飲管飲, 初時將條飲管放入B仔個嘴, 佢係會喊, 初初唔識啜, 我就抬高個杯, 等d水由飲管自己流入B仔口, 佢知道有水時, 我就放返好個杯, 佢就好似啜奶咁啜, 啜到d水, 唔知係咪貪過隱, 係咁啜下放下, haha.......

不過B仔好lazy~~~ 唔多肯自己拎住黎飲,  我放佢兩隻手仔係杯耳度, 跟住推埋佢身度等佢拎住黎飲, 佢就係咁撐直隻手, 唔俾我推埋去 =.=""""""""

B仔爸同B仔媽晚飯緊時, B仔就係地墊度自娛! 超級大懶精~~

是日晚餐

滾冬瓜湯 (之前買咗罐罐頭瑤柱什麼羹, 都唔係好記得係乜, 但係唔多好味, 都係清清地咁滾正好多~~)

鹵水雞翼 (唔記得抺乾淨個碟邊至影相添~~ XD)

金銀蒜粉絲蒸勝瓜