拎回鄉咭

12.4.2008

今朝要返工, 放工返屯門同婆婆飯茶, 跟住去中旅社拎B仔張回鄉咭, 拎完去咗逛一陣就湊B仔返屋企! B仔爸又有嘢搞, 所以自己湊B仔!

跟住去咗上水街巿買餸, 好耐無係呢度買餸, 好鍾意係呢度買餸, 一來大, 二來選擇多!

行海鮮檔時, 見到個亞姐係度開帶子, 好大粒, 好靚, 又多人買, 自己見到又好想食, 咁多人買唔怕掛~~ 於是.............

買咗4隻, 大拿拿8蚊一隻架~~ 但真係好大粒, 厚到要中間界兩刀!

好彩B仔爸今日早咗返, 如果唔係, 都唔得閒洗餸呀~~

同B仔白白豬時, 試下個洗頭帽, 唔多識用, 究竟係向上反還是向下反? 笠咗頂帽, 點解仲有水漏既? 我笠得唔好? anyway, B仔戴咗頂帽個樣都幾好笑~~~

夜晚食飽飯, 同B仔親子時間~~ B仔爬係媽媽度, 幾冧冧~~

依家B仔成日郁黎郁去無時停, 同佢影相, 十張有一半都矇晒~~

是日晚餐有:

蒸帶子

咸蛋肉片節瓜湯 (改良版~~ 今次壓碎晒d咸蛋黃至放去滾, 正呀)

清炒白菜