廣華產後檢查

7 Nov 2007

今朝瞓醒就返咗屋企, 又係做搬屋助理(看車only), 不過今次搬一轉遮, 因為下晝要去廣華覆診!

去廣華之前, 返咗公司交醫生收據, 因為坐月期間都幫襯咗唔少醫生醫身痕, 儲埋儲埋都未claim錢, 今日順便出九龍咪返去一趟, claim返d錢黎洗下麻~~

跟住去咗油麻地陳枝記買把菜刀, 袋住把菜刀四圍行都驚驚地呀! 搞到張爹哋唔敢幫我咩袋!

買完菜刀, 時間剛剛好, 準時去到廣華N10做產後檢查! 去到都唔係好多人等, 都係得七八個人等, 登記咗又要填份問卷, 又係關於情緒方面o既問卷, 應該係test有無產後抑鬱o既問卷吧!

填完問卷就量血壓, 驗小便同磅重. 呢云真大濟, 成69.6kg, 大拿拿153磅呀!  呢兩個禮拜磅都徘徊係15x磅, 點解無輕過架?! 已經食少咗嘢架啦~~ 唔通.............. 唔通已經瘦定咗唔會再瘦?!

之後等見醫生做檢查, 都係個句: 一切正常! 最搞笑係醫生問我係咪好容易有BB, 我點知我係咪易, 我只好答佢一結咗婚就有咗!

其實我應該係一個唔容易有BBo既人, 因為一向經期唔準, 三四個月至黎一黎o既, 連張醫生都話我應該難有BB, 學廣華醫生話齋, 今次有咗都算幸運!

產後檢完就係旺角閒逛, 之後食埋飯至返娘家!