好耐無見

23 Nov 2007

總共四日四夜無見過B仔啦~~ 一返到娘家, 第一時間望下個仔先啦~~

見B仔坐咗係車仔, 對住個廚房(因為婆婆係度整緊餸), 佢就好似大爺咁攤係車仔, 兩隻腳仔係咁long係車仔前面條嘢度, 仲要係度 "梅" 緊手指, "梅" 到好滋味咁呀! 

爹哋媽媽咁耐無見B仔, 第一時間抱下個仔先~~ 望住戴住口罩o既媽媽, B仔無驚, 同佢傾計佢仲係度笑添呀! 果然係一名貪玩o既寶寶呀!

B仔又硬淨咗, 條頸仔開始有d力, 但係都未夠, 相信夠三個月時會好好多! B仔依家好似好鍾意企係度咁呀! haha...... (當然我地會就住黎啦!)

媽媽唔敢抱咁耐, 所以到爹哋抱抱, 爹哋同佢玩, 係咁整d肉酸表情同個仔玩, B仔就笑得好開心, 仲呀呀聲同爹哋傾計呀~~ 之後又同B仔一齊睇相, 佢好似識得睇咁, 睇到個樣幾認真, 真搞笑呢!

本來想今晚湊B仔返屋企, 但自己又未好返晒, 驚傳染俾個仔, 食咗d藥又好攰, 擔心聽日自己湊佢唔掂, 最後還是自己留係娘家睇B仔! 張爹哋就自己返屋企!

以前o既我, 病會睇醫生, 但係就一定唔會準時食藥, 一定唔會戴口罩, 但係今時唔同往日, B仔出世之後, 真係要乖乖, 準時食藥 (食藥食到眼都腫埋), 係屋企由朝到晚都笠住口罩至敢同B仔共處呀!

希望快d快d好返晒啦! 笠住口罩真係幾辛苦!