23 May 2007
好攰嘅一天, 瞓咗一晚, 好好多! 但頭都仍然是痛! 所以攞咗一日病假休息下!
今日要出佐敦, 去張醫生度檢查呢~~ 又與小寶寶見面啦!
去到診所第一時間就驗小便同磅重, 磅完睇下個磅數, 嘩........................ 自己都嚇親呀! 149磅呀! 上次檢查時140磅, 四個星期之麻~~ 重咗成9磅! 要節制下食量至得啦! 連醫生都叫我唔好食咁多嘢!
等咗好耐至見到小寶寶一面! 一切正常! 小寶寶係中碼BB! 胎水正常! 醫生話小寶寶開始有頭髮添呀! 我就睇唔出, 佢話有就有啦~~ hehe.... 小寶寶依家咁快就開始有頭髮, 咁出世會唔會係一個勁多頭髮嘅小寶寶呢?!
今次見到小寶寶成個樣, 雖然唔清楚, 都叫做睇到五觀咁啦! 醫生指住某度話係小寶寶隻眼珠, 但我睇唔出, 佢話係就係啦~~ 我問醫生佢擘大咗隻眼?! 醫生話唔係! (我仲以為小寶寶擘大咗隻眼仔添~~)
望住小寶寶個樣, 硬係覺得佢似張先生多過似我! 小寶寶, 你似我多d好d喎~~ 應該會靚仔d架~~ hehe...
見到小寶寶隻手仔係度郁下郁下咁! 當醫生同我講, 呢度係佢啫啫時, 醫生接住又話, 小寶寶遮住咗, 只係閃一閃見到! haha... 唔通小寶寶開始識得怕羞???
我又問醫生, 點解我個肚咁大個! 醫生就話: 有d人會覺得自己個肚細, 又d又覺得大, 其實無特定標準!
我又問醫生, 呢排唔知點解, 間唔使個鼻會出血, 但又唔係流出黎, 好似d血染嘅鼻屎咁! 醫生就話: 因為懷孕會令到血管擴張! 正常!
醫生跟住又叫我同張先生伸隻手出黎對比下, 果然我d靜脈(青根)係凸晒出黎~~ 連腳面果d都勁凸! 醫生跟住又講: 頭痛都係因為血管擴張所致呢~~ (唔怪得之間唔便會勁頭痛啦!)
檢查完, 食飽飽就回歸! 呢排腳骨力真係唔多夠呀! 行一陣就好攰! 家陣至六個月, 再過兩個月可能會行唔郁呀! haha......
我馱住仔仔嗰時, 喺馬尾爸爸嘅吹谷下都試個4星期重成10磅呀 。見完醫生仲要節制飲食添呀
回覆刪除你既小寶寶好@估或@喎~~ 你盡量休息多d啦
回覆刪除馬尾媽媽, 原來你都試過4星期重成10磅呀! 唉... 我都唔識點節制好! 係成日食嘢, 但肚餓就自然要食, 又唔算一下子食好多! 唔通要食少d飯, 食少d麵包??? 二家姐, 我會架啦~~
回覆刪除我試過最勁四星期重7磅, 但之後驗糖尿我戒口少甜少麵包少澱粉質，果個月真係重得慢D架!
回覆刪除哈哈...我嗰陣時食好多嘢架。馬尾爸爸見我冇作嘔又食得﹔於是就一日到黑都整嘢比我食, 致肥嘅根源係燉甜品呀, 日日都食 (鮮奶燉蛋、燉燕窩等), 就係咁重咗成10磅囉。 之 後醫生話要減磅, 爸爸就即刻煮少好多呢d甜品比我﹔ 有時我心思思想食, 佢就唯有少甜 (好過冇啦 )。就係咁體重變到冇乜上落...四個星期後又見醫生, 諗住冇死啦, 點知比個醫生鬧到趴地呀。佢話我而家係馱緊bb, 唔係鍾意就肥10磅, 唔鍾意就1磅都冇重過。卒之嗰次產驗就淨係喺捱鬧狀態下完成... 哈哈...第一次馱bb真係好多嘢都要學呀。
回覆刪除你要小心身體呀 大肚婆係較易有靜脈曲張既，特別係個子高大既孕媽媽(綜合同事之經驗)，你可以第防靜脈曲張既絲襪，曾經有位同事(好高既)五個月時已經開始第防靜脈曲張既絲襪，因為佢已經有靜脈曲張既情形，d同事話要好小心，因為有左靜脈曲張之後，血管擴張左就好難會收回，小心好d，保護自己保護bb呀
回覆刪除哈哈 ~~d靚媽咪以前佗BB時嘅體重都係節節上升！我以前啱啱佗住阿女頭3個月反而急跌6-7磅！可能係冇胃口、又暈 兼嘔吐 關係。到中段時，食量都係同未有之前差不多！所以體重升得好慢。到臨生之前只係重左15磅！醫生都話啱啱合格咋！ 好彩阿女出世都算中碼BB！
回覆刪除我今日都去見bb阿~~~~~~
回覆刪除肚大係唔係因為陽水多?
回覆刪除你丫... 又真似重快左d 喎... 好期待呢~~ 好想快d 下 bb 呀~~ JOAN
回覆刪除貓貓, 睇黎我都要少甜少麵包少澱粉質! 之但係肚仔餓, 又口痕時應該食咩?! 馬尾媽媽, 你真幸福呀! 馬尾爸爸對你咁好, 係咁整甜品俾你食! haha...... 馱bb真係好多學問! Whisky, 我小腿暫時都無事! 係腳面同手面d靜脈凸晒出黎(不過未有之前都凸凸地架啦~~) 我一直都係睇嘉賓大廈個位張國良醫生架~~ 小女人, 我同你相反! 有咗小寶寶以黎都好好胃口! 連張先生都嚇親! 大寶, 你見bb見成點呀! 一定好開心! haha... 阿玲, 醫生話胎水正常, 無多又無少囉! Joan, 唔好咁快見bb住啦~~ 過多三個幾月先啦~~ hehe...... 到時一定通知你!
回覆刪除小心身體呀, 有BB一定好開心
回覆刪除係咪多數去澳洲牛奶食呢?~~~~
回覆刪除就快見到小生命出生啦
回覆刪除靜脈曲張試下著壓力襪啦~
回覆刪除Jessie, 我會架啦~~ 多謝關心! 小肥, 牛奶公司d多士同炒蛋都好正 奶茶都唔錯(我都係黐張生個杯飲一啖咋~~ ) 碧碧, 仲有三個幾月就見到小寶寶! 好期待! Long Long媽媽, 我未有靜脈曲張~~ 希望用唔着個D襪啦~~
回覆刪除小寶寶已經知道有人望住佢，好自然咁用手仔遮住喇
回覆刪除係囉~~ 咁細個就識得怕羞, haha...
回覆刪除實左太辛苦啦...你好偉大呀 我真係不敢想像我有bb 所以我好享受我而家既生活 但祝你身體健康...唔再頭痛呀
回覆刪除鬼妹, 天下所有媽媽都係咁偉大呢~~
回覆刪除原來妳已經有六個月咁大
回覆刪除