好耐無一聚啦~~

檢查完, 食飽飽, 我同張先生去咗中環IFC逛街!

鄉下妹, IFC聽就聽得多, 去就真係第一次去! 不過純粹eye shopping!!!

逛街之餘, 我地都不忘去睇近期正片<蜘蛛俠3>

好好睇, 打得好精彩, d特技好正!!!

不過係IFC間戲院睇呢套戲係我同張先生有史以黎最貴嘅一場戲呀!!!

張先生聽佢同事講, 間戲院d位好正, 於是我地咪去試下囉~~

當俾錢時, 嘩................

 我有無睇錯呀?! 兩張飛成170蚊?!  你計咗我地兩個人定三個人呀???

張先生仲諗住頂多70蚊張飛, 沒想到係每人85蚊一張飛!!! 貴得利害呀!!!

入到場, d位確實幾舒服嘅, 皮sofa加大約120度嘅傾斜, 仲可以"long"埋個頭, 伸腳位又夠濶落, 都幾舒適嘅~~ 好彩套戲有返咁上下好睇, 同埋做成兩個半鐘, 睇完唔會背脊痛!

但係咁貴一張飛, 就真係好肉痛呀~~ 未試過, 叫做試下! 第時小寶寶出咗世, 無得咁樣享受囉~~

睇完戲, 第一時間去麥記醫肚! 孕婦真係好強勁, 食咗一個魚柳包都唔夠, 仲食埋張先生嘅半個至尊漢保! 勁呀!!! 食咗一個半包再加半包薯條都唔夠喉咁~~ 若食埋張先生個一半, 我又覺得唔太好意思咁

 都係今晚留肚食晚餐!

戲又睇過, 嘢又食過, 仲未到約咗朋友們嘅時間, 於是同張先生行咗中環個邊, 諗住去新開個間荷花睇下b仔嘢, 荷花就搵唔到, 反而去咗H&M逛下~~ H&M又係聽就成日聽, 又係第一次去!

嘩........ 估唔到裡面d嘢都幾第買! 百零蚊就有件衫! 最好就係任試唔嬲呢樣好呀!

可惜孕婦大肚腩, 着唔落個d衫, 唯有慳返d錢! 見到有孕婦裝, 睇中一件雖然好靚, 都幾條身, 但係都好多孕婦衫啦~~ 都係唔買囉!

睇B仔衫, 好得意, 好靚呀! 我掛四圍睇, 張先生就無啦啦停咗係某處唔知佢望乜?! 原來佢見到條工人褲仔好靚, 佢話第時要買條俾小寶寶着呢~~ 我第一次見佢睇b仔嘢睇得咁入神咋~~ 不過都係無買到!

睇張先生嘅衫褲, 試咗兩條褲一件背心, 但唔太好睇, 於是又慳返! 仲諗住送俾佢添~~ hehe...

結果, 我就買咗個袋俾自己! haha....... 129蚊咋~~ 好第呀!!!

當我地離開H&M時, 發現荷花原來就係附近, 不過無時間行啦~~ 唯有下次!

跟住與大姨媽一齊坐巴士入鴨俐洲 (本來話搭的士, 但係好似好奢侈咁, 孕婦要慳錢買尿片呢~~

 hehe... ), 與Lam Sir、靚嫲嫲、人類同埋小豪會合開餐! 我地好耐好耐無聚首一堂啦~~ 難得相聚一刻呢~~

是晚我地去咗鴨俐洲巿政大樓街巿個間珠記食, 非常豐富, 有......

白卓蝦 (唔記得個隻叫咩蝦, 好鮮, 好好味, 但唔敢食得多)

椒鹽瀨尿蝦 (細細隻, 但勁多膏, 但係食咗一隻咋~~ 又係唔敢食)

炒聖子 (好味)

鹽焗蟹 (聞到香噴噴, 但唔食得, 掂都無掂過!)

魚腩炒菜心 (唔知係咩魚, 但好好味)

鹽水粉絲蜆煲 (好鮮甜, 無沙呢樣好麻~~)

雜菜煲 (最唔掂~~)

椒絲腐乳通菜 (ok咁啦~~)

沙拉骨 (張先生聞到陣味覺得似嗅腳味, haha... 但我聞到係好濃烈嘅醋味)

真係好豐富呢~~~~~~~~~~~~

 

不過大姨媽心情唔多好, 有咁多美食放在眼前, 但就無乜胃口咁~~

大姨媽呀~~ 小寶寶叫你食多d嘢呀~~~ (好似佢咁係咁食食食) 食咁少嘢唔健康呀! 你要有強健嘅體魄! 無窮嘅精力! 同埋開朗嘅心情黎迎接小生命架!