25.5.2008
未瞓飽但食飽, 又唔記得坐幾耐車, 去咗懷集燕岩風景區, 睇金絲燕棲身地, 睇位大叔係個洞入面徒手攀岩掏燕窩表演!
B仔媽最驚曉飛嘅嘢, 係個洞入面見到咁多燕子飛黎飛去, 真係好驚! 又驚中頭獎! (雀屎) 未入個洞已擔定把遮! 真係好彩擔定把遮咋~~ 如果唔係, 真係中頭獎呀!!! 睇緊表演時, 突然聽到"啪"一聲, 望下把遮, 有撻嘢係把遮度呀 
睇完表演咋咋臨拉埋B仔爸急步離開呢個恐佈嘅地方, 咋咋臨去搵水洗遮! 不知幾想掉咗把遮, 實在太嚇人啦!!!!!!!! 夜晚返到酒店叫B仔爸再洗!!!!!!!!!!
之後又唔記得坐幾耐車, 去咗個世外桃源, 入呢個世外桃源要經過一個啱桃源洞, 原本跟個度個導遊行入去, 點知有d團友見到有竹筏坐, 話想坐, 其實B仔媽唔想坐, 但都要跟大隊, 因為領隊唔想團友東一個西一個驚出事, 於是B仔爸同B仔媽都一齊坐!
其實都幾無聊, 行仲快過坐筏! 最爆笑係, 要經過一道橋, 但道橋好矮, 當個筏越行越埋道橋時, B仔媽同另一位女團友大叫係咪要穿過去架?????? (因為我地坐係筏頭) 條穚咁矮點過呀?????????? 好驚呀!!!!!!!!! 個船夫叫係呀, 要穿過去架, 你地要烏底身架!
我地聽到個船夫咁講, 而且都就快去到條橋度, 即刻烏定身啦~~ 發覺我地都好似高得濟喎!!!! 因為頭排四個人都係高大形 要用3秒3嘅速度即刻"某"係度!!!! 手腳慢d都撞咗埋去!!! 真係又驚險, 又爆笑呀!!!
落咗船就去到個個世外桃源, 行入去途中有d小朋友同婆婆係度賣雞蛋, $1一隻, B仔爸買咗一隻黎食, 未食己聞到好香, 食都好好味, 好香蛋味! 香港d蛋真係差天共地!
同埋沿路都有個小朋友人釘人咁跟住我地, 向我地介紹當地d特色, 個個係咩山呀, 係岩洞入面又向我地介紹呢舊岩石似乜嘢, 個舊又係乜嘢, 成個小小導遊咁! 為咗乜?! 咪為咗賺dd錢! 其實個度d人好窮, 所以d小朋友一係就賣雞蛋, 一係就向遊客介紹!
不過呢個小男孩無攤大手板問我地拎錢, 但我地都俾咗$5個小朋友, 仲請咗包餅仔佢食添! 唔同之前係燕岩風景區個度個靚妹, 係咁釘住B仔爸, 見我地唔理佢, 係咁叫我地俾$1蚊佢或者俾支筆佢或者問我地攞糖食, 一路見我地無表示, 佢就一邊 "nur" 我地, "nur" 唔成就黑口黑面! 最討厭遇到呢類人! 唔係錢嘅問題, 係人格問題!
講返個世外桃源先, 入到去有一大片桃花樹, 但無桃花, 要過年至開! 經過桃花園就見到條村, 係呢度逗留咗一陣就走! 起程去德慶盤龍埉!
待續.........................
沒有留言:
張貼留言