26.5.2008
第三日行程, 又係晨咁早起身, 7:30am 食早餐, 食飽飽就坐 "所謂" 嘅環保車上半山, 點解係 "所謂" ?! 話明環保應該唔會用汽油, 個部係小巴! 仲要殘到呢~~~~~~
上到半山桃花寨入口就開始沿山路行落山!
起點有好多大大細細嘅水車......
落山途中又見到大大小小嘅瀑布......
有幾個團友真係勇, 敢玩 "空中飛人", 自費$50, 由呢邊山沿住條大鋼纜吊到另一邊山, 再由另一邊山吊返過黎! 咪搞我~~~
行咗個幾兩個鐘頭山, 就坐咗一陣車去咗水雲間, 係一個藏族族人地方, 個藏族姑娘導遊介紹得好鬼馬, 好搞笑!
係藏族係, 未嫁嘅女子叫亞依瑪, 嫁咗嘅叫亞路, 未娶嘅男子叫邦哥, 娶咗嘅叫石哥! 如果男方對女方有意思, 就會摸女方嘅髮垂(佢地頂帽側邊有串垂"丁"住係度架), 摸過就大濟啦~~ 要幫女方做三年苦工, 洗衫煮飯打掃無走雞... haha..... 為乜要咁! 女方要証明男方對佢真心喎~~~
咁如果女方對男方有意思, 咁又點?! 女方會踩男方隻腳指架~~ haha.................
去到佢地族人準備咗三杯巴"cake"酒, 要團友入面搵三個男人飲, B仔爸係其中一人, 佢話好好飲! 跟住主人家請我地飲第一杯歡迎茶, 然後再黎兩杯, 第四道茶係送別茶! 若主人家無斟茶你飲, 就即係唔歡迎你, 可以自動波走得喎~~~
飲完茶又買完茶, 跟住就出發返順德! 呢程車我記得坐幾耐呀! 成四個鐘呀~~~ 真係瞓醒一覺都仲未到!
返到順德時五點, 去食晚飯, 係五點食晚飯呀!!! 天都未黑呀!!! 食飽飽都只不過5:50pm!!! 平時放工時間, 家陣食飽飯 =.=""""""""""""""""
食飽飯去大良嘅李禧記食好出名嘅雙皮奶同埋薑汁撞奶, 6蚊一碗!
d團友係呢度係咁掃手信, 有崩砂、杏仁餅、花生糖.......... 係咁掃, 係咁掃, B仔爸同B仔媽洗晒d人仔, 佢又唔收港幣, 所以係咁望, 係咁食(試食), haha............ 
我地最欣賞都係蕃石榴糖, 話用新鮮石榴汁製成! 但真係好好味, 好香! 有位auntie唱咗大拿拿10蚊人仔俾我地買呢~~~ B仔婆婆鍾意食蕃石榴, 買返去孝敬下佢先得!
七點左右去到順德巷碼頭, 搭8:20pm船返香港, 10:20pm到信德碼頭, 返到屋企成12點囉~~~~ 仲要食埋碗牛丸麵, 呢云真係肥爆囉~~~
後記:
食: 餐餐都幾清淡, 菜多過肉, 每餐總有雞有魚有豆腐有青菜! 唔係好食, 但又唔係難食! B仔爸去親旅行都食四五碗飯, 係咪真係咁開胃?! 係屋企食一碗架咋!
住: 兩晚酒店都好好! 都乾淨!
行: 雖然呢幾日都有落雨, 但又好好彩, 落車時停雨, 上車時至落雨! 搭親車都勁想瞓, 真係眼都挈唔大! 以為無乜錢要洗, 但都洗咗成五百幾蚊人仔!
但係呢幾日, 好掛住B仔呀!!!!!!!!!!!
