6 Jan 2008
尋晚B仔發癲, 半夜3點幾嘈食奶, 跟住晨早7點幾又嘈食, 瞓着期間又無啦啦喊一兩聲, 但其實佢瞓緊架喎?! 可能發惡夢! 佢一叫我就醒, 成晚好似無瞓過覺咁, 仲慘過失眠, 失眠就眼光光, 瞓下又醒下呢下至攞命!
B仔食完晨早一餐奶, 跟住就同媽媽一齊瞓, 大家都好夢正甜嘅時候...... 點解會有門鐘聲架?! 果陣係9點零鐘, 原來係B仔嫲嫲到爺爺駕到! 唉...... 心諗: 駛唔駛咁早呀?! 唉...... 又無得瞓!
佢地黎到, B仔仲瞓緊, 嫲嫲成日問, B仔好夜至瞓咩?! 仲乜瞓咁晏都未醒?! 呢兩個問題, 係短短數分鐘係問咗成4次! 初初都唔想答佢, 因為越答佢越多嘢問! 最終都煩到答咗佢B仔尋晚十點幾瞓, 跟住問題又黎~~
又話十點到家陣未食過奶, 再答佢啦, 答完之後又係度話, 婆婆湊得B仔好好喎, 一覺瞓到天光至食奶...... 呢句說話, 又"up"咗幾次, 好似係度話我湊得唔好咁 
係我梳洗完畢時, 見到嫲嫲又走咗入房, 又拎住咗B仔個honey, B仔醒咗 唔知係咪又搞醒佢! 好彩B仔瞓飽, 如果唔係, 又拆天!
B仔開始認人啦~~ 一見到嫲嫲就係咁喊, 嫲嫲一抱, 又喊到嘩嘩聲, 即刻隊返俾我抱, 嫲嫲一開聲同佢傾計, 佢又喊, 要同佢溝通一輪至肯同佢笑呢~~
爹哋放工返黎就一齊落樓下飲茶! 飲茶期間真係煩到爆~~~~~~~~ 
嫲嫲次次黎到都講黎講去個d嘢, 又係度話我間屋細, 又話佢間屋裝修好返去住, 又話返去讀書好, 又話婆婆湊得好...... 整個飲茶過程都係得佢係度係咁講, 救命呀 
第時都係唔好去飲茶, 煩到嘔呀~~~~~~~~~~~~~~~~~~~
到下晝, 又到親子時間, 同B仔白白豬! 每次同B仔洗頭, 都覺得佢好搞笑~~ 因為佢個頭實在好圓! 
白白豬完就食奶, 跟住B仔開始午睡時間! 佢午睡期間, 見雪櫃有材料, 咪整個士多啤梨慕思蛋糕, 但唔係好成功, 唔夠實, 唉................... 之前整過一個朱古力慕思, 又係失敗咗, 成個塔咗落黎! 係食譜唔得, 還是太耐無整蛋糕生疏咗?!
又試下用焗爐黎焗日本小蕃薯, 都幾似燴蕃薯, 好好味, haha......
夜晚又俾B仔望下佢個大玩具, 都仍然未識用隻手去玩, 都係得個望字!
今晚公公婆婆係大陸返黎, 上咗黎食飯, 然後湊咗B仔返娘家! 又係唔捨得!
沒有留言:
張貼留言