與B仔行街街

5 Jan 2007

禮拜六, 無嘢做, 爹哋又返咗工, 公公婆婆北上玩, 得返媽媽同B仔兩個~~

於是, 媽媽一個人帶住B仔去咗沙田閒逛!

搭火車o既B仔~~

搭車中途, B仔俾個外藉女人撩, 初初望住人扁嘴, 跟住用好奇怪o既眼光望住佢, 可能大家膚色唔同(個女人係黑黑地皮膚), 佢第一次接觸, 跟住人地同佢玩下傾下計, 佢就同人笑, 人地同佢講英文, 佢就講BB話, haha...... 原來個女人個女係同B仔同一日牛一呢~~

去到沙田, 第一時間醫肚先~~ 去咗Triple O's食飽, 好鬼貴, $53蚊一個餐, 一個好巨o既漢寶飽, 一客薯條同一杯嘢飲, 但真係好好味, 塊肉都好juicy, 唔同麥噹噹個d~~ 我嘆緊飽, B仔就見下周公!

跟住就去咗西田閒逛, 又買咗個噹噹玩具俾B仔, haha..... 然後去咗超巿買餸, 臨返屋企之前仲去咗西田個育嬰室換片兼餵奶呢~~ 但裡面都有點兒焗同熱呀!

真係好佩服自己, 推住B仔仲可以買一大袋餸返屋企, 仲要落咗火車之後, 咩住個超大B仔袋(裝埋袋餸), 一手抱住B仔, 另一手"稱"住B仔部戰車, 仲走咗去搭小巴返屋企, 真係要俾十個"勁"自己呀! haha.....

點解搭小巴唔搭的士?! 其實都爭扎咗一輪, 由火車站返屋企只需5mins(推住B仔行路就約20mins), 雖然的士就唔駛跳錶, 但搭小巴只需$2.4, 張師奶又唔想行, 又唔想咁奢侈,  所以.......