黐身BB

26 Jan 2008

星期六, 今朝又要返工, 張爹哋又係要返工, 今朝要辛苦婆婆自己帶B仔返屋企!!!

本來唔打算帶B仔返屋企架~~ 但係要帶B仔打肺炎鏈球菌第二針!

放工返到去就咋咋臨帶B仔去打, 今次着得衫多呀! 啜唔到手指, 喊咗成分鐘呢~~

之後去咗買蘿蔔返屋企整蘿蔔糕! 材料買咗大約七十蚊都唔駛, 整到三個糕! Haha...... 一個自己, 一個俾B仔婆婆, 另一個俾B仔嫲嫲!

整蘿蔔糕都唔係好難, 最辛苦係將粉漿同蘿蔔混合! 手都軟埋呢~~

婆婆教導完點整蘿蔔糕之後就同公公返屋企!

夜晚嘅B仔好黐身呀!!! 想瞓又瞓唔到, 要媽媽"愛"佢一大輪至入睡, 趁住B仔瞓咗, 真係要9秒9去沖個涼呀! 因為B仔係屋企係頂多小睡半小時就起身~~

果然沖完個靚涼無耐就醒咗~~

想淥個麵食下~~ 一行開B仔就喊! 喊到眼仔都紅埋, 仲要大大滴眼淚標出黎呀~~ 陰公豬囉~~

好不容易至煮到個麵, 蒸到d燒賣做晚餐咋~~~

填飽個肚(其實都唔飽, 但無計!), 又到同B仔玩樂嘅時間!

發覺B仔都幾鍾意狗仔, 佢見到Pizza妹妹就會笑得好開心, Pizza妹妹係度吠, 佢又唔會驚! 見到呢隻斑點狗都好開心架~~ 仲同佢係度傾計添!

又到訓練時間啦~~

十點半餵埋餐奶就瞓咗~~ 跟住同佢剪指甲, 剪到我腰骨痛呀~~