唔開心

6 Dec 2007

今晚放工去咗做facial, 都好耐無去啦~~

做完facial就咋咋臨返娘家睇B仔, 入到屋B仔坐咗係車仔發呆咁, 於是撩佢傾計, B仔扭抱喎! 唔知佢係坐得耐想搵人抱?! 還是見到媽媽, 想媽媽抱呢?!

於是洗下手, 抱下B仔! 抱緊佢時, 公公又話要抱  我話咁耐無見佢(都3日3夜無見B仔啦~~) 等我抱下佢先啦! 佢係我個仔黎喎! 跟住公公就話佢係佢公公  跟住我話我生佢架喎! 跟住公公又話無你又點會有佢

好啦, 我抱咗B仔一陣就食飯, 就輪到公公抱! 我食飽飽, 見B仔好似想瞓咁, 於是咪想從公公手中抱B仔啦~~ 點知...........................

公公同B仔講唔好去媽媽度, 唔好俾媽媽抱!  丫~~~ 我幾嬲呀! 佢晚晚都見到我個仔, 幾時幾刻抱佢都得啦~~ 我幾日至見我個仔一次, 都唔俾d機會我同我個仔溝通下, 真係好嬲, 亦好唔開心!

要我就黎發老脾公公至肯俾B仔我抱! 佢仲要對住B仔講, 你媽媽發脾氣啦~~ 俾媽媽抱啦!  

婆婆都好d, 我返到去佢抱緊都會俾我抱, 雖然好多時我抱咗佢一陣, 跟住又話去婆婆度! 又或者我同個仔玩緊, 婆婆都會走黎撩B仔一齊玩! 咁嘅時候, B仔就會同婆婆玩, 我就抱住B仔做觀眾~~~ 婆婆一開聲同B仔玩, B仔就同佢笑架啦~~ 應該係日對夜對嘅關係吧! B仔家陣親婆婆多過我啦~~~

唉........................ 家陣我個仔似係公公婆婆個仔多過係我個仔咁!

唔想做嘢做師奶仔全職湊B仔嘅心頭又湧出黎啦! 真係好想有多d時間同B仔溝通下~~ 成日係度諗, B仔會唔會認錯媽媽架?! (張師奶又發神經! haha......)

不過張師奶都係諗下, 發下癲, 為咗B仔有好d嘅生活! 為咗唔想張爹哋咁辛苦咁大壓力! 張師奶都會繼續做嘢嘅~~~~~

除非中咗六合彩金多寶頭獎, 有千零萬身家, 到時就諗都唔駛諗, 即刻辭職唔做! haha..... 張師奶又發春秋大夢, 不過呢個夢都夢咗好耐仍未實現! 唯有繼續努力!