30 Dec 2007
今朝爹哋返工, 媽媽竟然瞓到連爹哋返咗工都唔知! haha......
B仔尋晚4點幾又嘈食奶, 跟住8點幾又嘈食, 但塞咗個奶嘴俾佢又瞓咗, 瞓到10點又嘈食! haha... 搞到媽媽好似無瞓過覺咁~~
瞓飽又食飽嘅B仔幾開心~~
跟住同公公婆婆飲茶, 之後就返婆婆屋企lu~~
Pizza妹妹你做乜"尼"係B仔部戰車個籃度呀?! 你想同B仔一齊去街呀???
2007年12月30日 星期日
大埔海濱公園遊
29 Dec 2007
今日無所事事, 之前係砵砵媽個blog見到佢帶咗砵砵去海濱公園影相好靚, 所以叫爹哋帶我地去影相!
未出發, 先興奮, B仔整裝待發準備出發! B仔, 點解你個樣好似好大個仔咁嘅?! 唔講人地以為你已經幾歲大囉~~ 
第一次試下坐私家坐! 好似好嘆咁喎~~
望下風景, 望望下瞓着咗~~ 去到公園都仍然熟睡中 
上回歸塔途中, 唔知係咪 "等" 得濟, 醒咗! 上到頂, 當相機對住B仔時, 呢位御用Model自動波笑到非常燦爛呢~~
企咗一陣, 影咗幾張相就落返去, 實在太大風啦~~
跟住去咗同d花影相, 點知................... B仔扭計, 喊晒口咁, 真係醜怪! 路過有個大叔見到佢喊住黎影相都忍唔住笑呀! B仔, 你睇你幾肉酸丫~~ 大庭廣眾係度發癲!
怕咗B仔, 於是返歸!
食飽飯就動工幫B仔打手印!
B仔好鍾意呢個消防員公仔, 望住佢係度笑, 想同佢傾計咁呢~~ 傻佬B黎架!
2007年12月27日 星期四
日單PP造型褲
日單小兔、小象、小熊PP褲
詳情請到B仔媽小店BLOG睇睇~~
http://hk.myblog.yahoo.com/bbmama-garden/article?mid=31
御用Model ~~ 張B仔
Boxing Day 逛街日
26 Dec 2007
B仔係婆婆度, 我同爹哋可以去行下街, 睇下戲!
我地去咗沙田睇魔間傳奇!
一個字 ~~ 悶!
睇完戲, 行咗陣街, 乜都無買到! 唯獨是買咗個消防員公仔, 好得意~~ 如果頂帽有埋個章就更加完美啦~~
之後返咗屋企煮飯仔, 都好耐無煮過飯啦~~ 今晚煮咗牛仔骨同蒜子上湯浸菜! 還有爹哋最愛o既節瓜滾瘦肉湯! 正呀~~
今日行街, 好多爹哋媽咪推埋個bb一齊行街, 此情此景, 好掛住B仔呢~~ 我地應該帶埋B仔去逛下街街望下嘢!
2007年12月26日 星期三
太婆&婆婆牛一
25 Dec 2007
聖誕日, B仔尋日俾公公婆婆帶咗返娘家, 爹哋收工同佢去咗灣仔會展睇遊戲展!
爹哋打咗兩鋪機, 每鋪10分鐘, 總共20分鐘, 呢兩鋪機就貴囉~~ 值60元正呀!
大拿拿30蚊一張入場飛, 無得食, 無得飲, 齋睇, 兩個人咁就無咗60蚊! 舉辦商真係賺到笑啦~~
會場入面有部好靚好型嘅車~~
PS3真係好正咁呀! 但d game太貴啦~~ 爹哋仲未捨得買呢~~
今年d靚女好似少咗! 可能去咗食lunch~~ haha... 
本來想行埋工展會, 但攰得濟, 最後都返咗巿中心閒逛! 買咗份聖誕禮物俾B仔, 跟住就返娘家!
B仔, 你做乜收到份聖誕禮物咁嘅樣呀?!
好似想講: 媽媽, 咁都叫聖誕禮物呀?! 有d格硬黎咁喎!
但係係你honey黎喎, 無咗佢唔得喎~~ hehe.......
B仔呀! 好過媽媽架啦~~ 爹哋都無買聖誕禮物俾我呀! 爹哋買奶嘴俾你咪好過無囉~~ 扮下聖誕小B開心下先啦~~
其實係媽媽大矇, 之前買個奶嘴係for 0-3個月, 所以要換啦~~ 咪去吉之島買囉!
跟住就同公公婆婆去咗山景同太婆慶牛一! 姨婆同埋舅公表舅父佢地都一齊慶祝, 真係熱鬧, 一行17人呀! 佢地見到B仔都好興奮呀!
今日適逢太婆(舊曆)同婆婆(新曆)生日, 所以一齊慶祝! 祝太婆同婆婆身體健康! 心想事成!
B仔, 你又想食呀?!
做乜咁情深嘅表情呀?!
太婆黎到見到B仔好開心呢~~ B仔係老人湯圓黎架! 好識氹老人家開心架! 太婆係咁同B仔傾計, 佢係咁同太婆笑呀! 仲嘴挈挈咁, 間唔使仲o衣o衣牙牙同太婆傾計添呀!
2007年12月24日 星期一
平安夜, 獨單夜
24 Dec 2007
今朝瞓醒都幾凍下~~ 公公同婆婆九點幾黎飲茶, 出門口前同B仔着多件衫, 驚佢凍親!
Haha... 着到佢郁唔到, 大字型攤咗係度!
飲完茶就返屋企, 婆婆餵B仔飲奶, 跟住就小睡咗一會, 然後就同B仔白白豬!
玩完踢水花, 又到抺身o既時候, 呢隻豬手一d都唔豬, "un 滋滋"...
之後公公就車咗婆婆同B仔返娘家! 得返張師奶孤零零一個留係屋企發霉~~~~ (張先生要返工)
自上星期四晚湊咗B仔返屋企, 到今日都湊咗佢四日四夜, 公公婆婆就四日四夜無見過粒孫, 係茶樓見到粒孫都急不及待攬下又鍚下!
呢輪公公因某d事唔多開心, 婆婆就話帶B仔返去, 等公公湊下玩下, 等佢開心返下!
本來打算boxing day個晚至湊B仔返婆婆度, 好讓我能對住B仔多d, 既然婆婆咁講, 公公心情又唔多好, 張師奶可以點?! 咪唯有割愛!
送咗B仔搭車, 真係好唔捨得! 望住B仔坐住部車就咁就駛走咗, 唉............. 真係超唔捨得呀! 要返工就話無辦法, 連放個長d d o既假湊下B仔都...................
唔知係咪生完之後d hormone未完全回復正常, 好易諗諗下就唔開心! 唉............
又俾張先生話我自己攞黎, 話我可以一齊返去, 唉...... 返去又如何, 又咪坐係度, B仔都唔會成日係我手中, 唔駛我照顧, 最多咪可以望下佢!
呢幾日湊B仔雖然都辛苦, 每晚最多連續瞓6個鐘, 尋晚仲衰, 3點幾又食, 7點幾又食, 好似無瞓過咁! 今朝晨早仲要醒一大pat屎我嘆! 但每朝俾佢嘈醒, 餵飽奶奶, 當B仔對住我笑得好燦爛時, 真係咩辛苦都消失晒!
尤其是抱住B仔, "愛"佢入睡時, 見到佢爬係自己心口瞓到冧冧時, 感覺真係好甜~~ 好.............. 唔識形容個種感覺!
問爹哋當抱住B仔瞓時, 佢會有咩感覺?! 佢竟然話無! 可能呢d就係爹哋同媽媽o既分別!
御用Model ~ 示範小象夾衣
終於有時間同B仔着呢件小象夾衣啦~~ B仔着呢件80碼, 大件咗d, 不過兩三毎月之後應該fit晒~~ haha...
B仔, 俾個pat pat大家睇下~~
哎吔....... 
瞓醒唔記得執靚張床至影相添! 失禮晒! 
冬至食飯
22 Dec 2007
今晚要返嫲嫲度做節, 4點幾嫲嫲就吹我地返去, 都唔知咁早過去做乜?! 等B仔瞓飽食飽至過去都未唔遲啦! (我地搭車過去都唔駛十分鐘呀!)
跟住5點幾又吹, 到我地出咗門口, 果時六點零, 又打黎吹................... 真係好煩!
同B仔着咗三伯娘買俾佢件蛤乸衣, 件衫都放咗係度好耐, 着過一次咁多, haha... 就着俾三伯娘睇下! 仲有頂帽仔, 不過已經唔多啱戴啦~~ 戴咗無耐就冼咗出黎!
戴頂帽影張相先! 好得意呢~~ 成個小丑咁! 爹哋同媽媽笑咗一輪至出門口呢~~
一返到嫲嫲度, 二伯娘就急不及待抱B仔, B仔都未望真係乜水, 加上成埋人係間屋入面, 都未見過咁多人, 所以抱佢唔夠兩秒就喊!
到B仔乖返之後, 二伯娘又黎~~ 
二伯娘抱咗一陣, 嫲嫲又話抱, 嫲嫲抱咗一陣就到三伯娘抱, 到食飯, B仔緊係跟住我架啦! 嫲嫲又話做乜唔放去佢個邊 
嫲嫲咋咋臨食完飯, 當時成村人都未食完, 佢又叫我俾B仔佢抱, 抱唔係問題, 至弊係佢唔識抱B仔, 次次抱親我都好驚, 驚佢整斷佢條頸! 但佢叫到唔通唔俾咩, 唔知係咪抱得唔舒服, 抱咗一分鐘都無, B仔又扭計! 跟手又俾返我!
俾返我之前, B仔又俾大伯娘欄途截劫, 都唔明點解, 我個仔有乜理由似佢個某個女細個個樣丫! 
真係好唔鍾意d人話我個仔似邊個邊個, 而邊個邊個唔係我同我老公, 係d無直接關係o既人! 最離譜係話唔似我地兩公婆呢下至離譜麻! (十個有九個都話似我架麻~~)
九點零就返屋企, 因為趕住B仔趕住回家食奶奶呢~~
嫁咗人, 無得返娘家過節(因為娘家都係正日做節), 娘家個邊人數唔多, 好似好冷清咁, 相反奶奶個邊就成棚人, 好熱鬧, 好想返娘家過節呢~~~~~~~
2007年12月21日 星期五
媽媽o既第一次........
21 Dec 2007
今日係疲累的一天!
尋晚婆婆同公公去飲, 所以帶咗B仔返屋企, 諗住婆婆今日過黎湊B仔, 但B仔太嫲跌親, 要婆婆煮飯佢食, 所以過唔到黎, 尋晚臨時臨急向上司請假, 順便拎埋平安夜個日, 一連放六日呢~~
爹哋今日要返工, 所以全日得我湊B仔, B仔今朝九點幾就瞓醒, 但佢媽媽我就仲未瞓飽~~
餵飽B仔之後就帶咗佢返公司, 今日公司lunch time開x'mas party! 我當然唔係咁神心特登帶B仔返去開party啦! 因為漏低咗d嘢係公司, 唔返去拎唔得呢~~
今日係B仔自出娘胎第一次搭火車, 但未去到火車站B仔已經瞓着咗, 所以係火車度依然瞓得好冧, 差不多到站佢至醒, 但神情有點怪呢~~ 可能架火車開得快, 佢未熟習吧!
返到公司, 同事們都輪住黎睇B仔, 好似d人去咗動物園睇動物咁! haha....... 呢云B仔變咗觸目人物添~~
臨帶佢返屋企前, 帶佢去俾大老細識, 點知...... 大老細一抱佢, 佢就喊到拆天, 唔通B仔唔鍾意佢?! 其實係扭眼瞓呢~~
搭火車返屋企時, B仔又熟睡, 媽媽心血來潮聞下佢籮pat, 點知........ 痾咗屎! 點解痾咗屎都瞓得咁冧o既???
唔扭計都好, 要係火車換片的話, 真係會嗅死成車人呀! 落咗車都要急急腳再轉的士返歸!
返到屋企忙到丫~~ 洗完pat順便沖埋涼, 跟住餵食奶, 之後B仔瞓咗一陣覺! 總算有少少時間忙裡偷閒上下網!
到夜晚推埋B仔去買外賣, 食飯期間, B仔又喊又笑, 真係吹脹, 搞到媽媽食個飯都要分段食, 等佢瞓着至食得晒! 唉.........
今日成日都諗今晚沖涼點算, 無人睇住B仔?! haha... 趁佢瞓着, 食飽飯咋咋臨走去沖涼, 好彩沖完佢都未醒!
唔知係咪少返屋企, B仔返親黎都成日扭我抱要瞓, 但係婆婆度都唔駛抱, 放落床仔就瞓! 食五安奶都分兩三次至食得晒, 衰仔... 蝦媽媽!
今日係我第一次單對單湊B仔呢~~ 第一次自己帶佢出街, 仲要出九龍添~~ 都倘算順利! 爹哋就擔心, 成日打返黎問B仔有無唔聽話! haha..... 不過湊住B仔, 想多點時間做自己嘢都無乜咁濟呀~~
但都開心架! B仔今日唔知發咩癲, 成日對住我笑喎! 仲要係燦爛個隻, 搞到幾辛苦都唔記得囉~~
2007年12月18日 星期二
100日人仔啦~~
18 Dec 2007
今日係張B仔一百日人仔o既大日子!!!
但係無特別o既慶祝, 因為B仔daddy同媽媽黑面中! 媽媽尋晚已經唔開心咗成晚, 到目前為止都係唔開心!
唔知點解, 每逢特別日子, 我o既牛一日、乜乜週年紀念日等等, 總係同佢有不快事發生! 唉............... 
今朝起身頭好痛, 應該係尋晚唔夠瞓吧! 所以攞咗假, 瞓醒返咗娘家, 因為都無人理, 無人同我講應該講o既嘢, 好似係我得罪咗某人, 而唔係某人激嬲我咁~~
索性返娘家睇下我個寶貝B仔仲好!
媽媽抱住B仔, 同B仔講: 媽媽好唔開心呢~~ 但B仔仲細, 無乜反應, 只係啜住個奶嘴(因為佢想瞓), 眼仔碌碌咁望住我!
到下晝, 又到媽媽最鍾意o既親子活動 ~~ 同B仔白白豬! 見到光嘟嘟o既B仔好開心, 佢不停係咁踢水, 同佢沖涼真係要着住雨褸至可以同佢沖, 如果唔係, 身都浸埋
玩完水, 婆婆就同B仔着衫~~ 又係個句啦~~ 好彩B仔係仔唔係女, 因為同佢抺完身, 佢竟然大爺咁, 挈到兩隻腳大一大攤係張床度, 真係笑c媽媽同婆婆呢!
有相為証架, 不過三點盡露, 不便公開 唯有露住兩點先啦~~
着衫中o既B仔表情怪怪~~
沖完涼又食飽飽, 又到午睡時間, B仔與周公約會期間我就返咗屋企, 因為心情實在不是太好!
B仔對住我笑, 對住我講嘢, 係我最開心最快樂o既時候呢~~
對唔住呀B仔~~ 今日本來應該同你慶祝一百日人仔, 點知因為媽媽同daddy不和, 所以無同你慶祝! 唉............
我覺得最幸福係做孕婦o既日子, 因為係人都會就你、關心你, 咩都唔駛自己做咁濟!
而最快樂係個仔係身邊o既日子, 因為當個仔對住你笑時, 真係一笑解千愁, 個刻咩唔開心、有幾辛苦都拋諸腦後!
今晩六合彩生生性性, 中返千零萬都夠架啦~~ 到時可以做師奶, 日日對住B仔啦~~
訂閱：
意見 (Atom)