流浮山海鮮餐

尋晚放工, 與張先生同埋佢d同事一齊入咗流浮山食海鮮, 我地七點鐘左右就到達流浮山, 流浮山俾我印象係好遠, 但原來與天水圍都好近, 駕車係天水圍至流浮山都不用5分鐘就到! 記得細個家庭樂嘅時候都去過(入到去尖鼻咀個頭), 但就無係個度食過海鮮!

入到流浮山, 當然行下個海鮮巿場, 沿路有好多海鮮檔同餐館, 海鮮種類都好多, 見到大大隻起碼至少有20cm長嘅瀨尿蝦, 大大條龍躉, 海斑當然唔少得, 仲有魚蝦蟹, 沿路一直行到盡頭 -- 面對住個海, 對岸就係蛇口, 睇落去都幾近, 可惜尋晚天氣差, 睇唔清楚對岸呢~~

因為要等齊人嘅關係, 結果等到八點半先有飯食! 肚餓非常呢~~~ 終於有飯開啦!

蒜蓉粉絲蒸帶子(好似手板咁大隻嘅帶子<--當然係指個殼啦, 粒肉都唔弱, 直徑都有成4cm長, 仲可以一開二添呀! 爽爽爽呀!)

蒸鮑魚(都唔算細隻, 都有成5cm長架~~ 新鮮~~ )

有伊麵底嘅上湯龍蝦 (大大嚿肉, 正呀!!!)

大班兩味

豉油皇炒大蝦 (好香, 好多膏, 好好味啊~~)

炒聖子 (大大條嘅聖子, 咬落去好爽呢~~)

鰻魚炒飯 (賣相都幾靚架, 炒得又香)

椒絲腐乳通菜

蒜蓉菜心

炸子雞 (新鮮即炸即上枱, 炸到d皮好硊扑扑, 好香, 肉質又啱啱熟, good good good)

一行15人去食, 埋單成三千八, 都算便宜啦, 仲要啤酒汽水無計賬 (其實係張先生有位同事識得老闆娘, 所以先至咁嘅價錢, 佢同事話如果無啦啦自己去食, 就唔好啦! 因為貴貴貴呀!!!) 不過真係好好好......味呀!!! 有機會再去食過 (下次一定要帶相機影低d美食至得, 今次因為事發突然, 所以未有準備, 唉....... =.=)