偷懶

尋日攞咗一日假, 其實係因為呢排無乜嘢做, 坐係公司由返工坐到放工, 真係悶到爆炸, 頭痛咗兩日, 所以決定偷懶一日, hehe...... (我都覺得自己好o曳, 俾老細知道咗就大件事囉~~~~)

不過今日都好充實, 起身食過早餐+午餐之後, 就上咗深圳閑逛, 第一站去咗東門, 睇下d結婚用o既鑽石耳環(當然係珠二醒啦), 買咗2對有鑽石+2對無鑽石, 都係買咗65蚊, 都算超值, 期間睇中一對鑽石耳環, 都好靚, 但係要成79蚊, 死都唔肯減價, 所以無買到!!!

上去最主要目的係去現代經典睇下d package (因為表舅父識得個主管, 所以有平), 最後都落咗訂呢, 準備九月尾去影相, hoho...... 雖然已影咗一輯, 今次係第二輯, 但都好開心, 好期待呢~~~

辦完今日o既重要事項, 我地就打的去咗藝展中心睇家具, 係個度我同張先生不約而同都睇中咗一棧燈, 都幾靚幾特別, 但係要成七百蚊, 都幾貴呢~~ 加上暫時未有屬於我地o既屋企, 買黎都無用!

行下行下, 見到有間店專賣假花, 款色多過花墟繽紛多多聲, 真高興呢~~ 適逢自己打算DIY手花俾幾位好姊妹, 於是張先生亦好熱衷咁協助我揀花同埋配搭d花呢~~ hehe......張先生都算係咁囉, 竟然肯幫我係度襯下花, 揀下邊種靚, hehe......應該都無乜邊個男仔會咁用心地幫女友/老婆揀花呢~~ 最後我地用咗35蚊買咗3種花呢~~ 平過花墟好多呢!!! 好開心!!! 之前係花墟繽紛睇過d假花, 睇中一束細朵假玫瑰, 要成三十幾蚊一束, 但係深圳見到一模一樣, 都係十零蚊, 好在係花墟時嚴貴, 加上又唔係真係太靚, 所以無買到, hehe...

行完藝展中心, 過咗附近o既百合隆文具批發巿場逛, 睇下有無d結婚用品平, haha...俾我地發現真係有d嘢啱用, 有回禮利是封同花炮, 不過我地無係呢個巿場買, 過咗隔離個個文具批發巿場逛, d回禮利是封2蚊一包有33個, 仲要係有好多選擇(百合隆個度d款好少同埋貴d), 我地買咗6包都係12蚊, 真係第第第呀!

另外又用咗3蚊買咗個大d o既利是封用黎封利是俾兄弟姊妹, 一包有15個, 又係第第第呀! haha.....當然, 如果唔要求高, 本着收利是o既人拆完都會掉咗個封o既心態, 係個度買個d利是封都係一個不錯o既選擇! (最好就係上去玩, 順道去買嘢就會第d啦)

個度有花炮買, 問過一間, 嘩! 講都唔係咁相信, 最細支個款七毫子一支, 真係平到笑呀, 買20支都唔駛廿蚊, haha.....但我同張先生都懷疑, 咁平會唔會係爆唔出呢 我地有諗過買返屋企試下抽幾支黎爆, 睇下會唔會爆唔出, 最後都無買, 留待遲下上去時先買!

跟住我地去咗華強北路個間山水時尚酒店o既韓國山水桑拿揼骨, 個度d環境就麻麻地, 幫我按個位姐姐仔, 叫咗佢細力d, 但細力咗一陣就變返大力 =.= 我就覺得佢按得麻麻地, 但張先生話佢個位就按得不錯!

之後去咗附近有間食湘菜o既小館 -- 醉湘西食晚飯, 本來一心想去試下"花垣扣肉", 點知午巿時已賣晒=.=, 唯有試佢地其他振店菜(唔記得咗菜名添=.=), 叫咗四餸, 其中兩餸真係辣到跳舞, 我地已經叫小辣, 但係對我地黎講, 應該係大辣吧~~ 適逄我生咗粒大飛滋, 真係一邊食一邊那到流淚+流鼻水(食到咁上下已經那到無乜知覺), 而每逢食親辣o既都變水人o既張先生, 食咗唔夠5分鐘, 成塊面成個頭都好似啱啱游完水咁, 濕晒, haha......