My Gym識堂~~

19.7.2008

尋日放工去街巿買定南瓜同瘦肉, 今朝一早煲咗南瓜肉碎粥俾B仔做早餐! (當然晨咁早六點已食咗餐奶)

食完晨咁早第一支奶, 瞓到八點就起身, B仔媽當然唔願起身啦, 但係......... B仔晨咁早整咗一大篤俾我嘆, 真係精神為之一振, 臭到醒晒, 要進行清潔B仔工程! 搞掂就食住粥仔等B仔爸放工返黎!

南瓜肉碎粥, 都幾正架~~

下晝三點去到紅磡都會個間My Gym玩, 約埋Tanya同曉妤第一次試堂, 大拿拿一百蚊架~~~~~~

一開始圍圈唱歌仔做動作, 但B仔超勁唔合作, 想爬黎爬去, 但人人係度唱歌做動作, 無理由由得B仔係度爬架麻, B仔媽咪捉住佢做運動囉, 點知就係咁反抗, 喊到唔肯收聲......... B仔媽同B仔爸真係無佢乎, 唯有抱B仔係一邊由佢自由發揮!

到人地唱完歌仔, 就開始自由活動......

我地抱咗B仔去波波池玩, 超勁開心呀!!! 跟住Tanya都一齊黎玩!

玩下單桿.......

B仔真係一隻牛黎架~~ 好大力! B仔媽都係輕輕托佢PAT PAT之麻, 佢都能夠自己捉住支棍喎~~

玩千秋, fing下fing下又係笑到卡卡聲, 勁開心...

捐山"濃", 左轉右轉都影响唔到B仔呢~~

趁墟呀~~~~~~ 唔好執輸..... hehe......

成堆BB堆埋一齊玩玩具, so happy呢~~~ 曉妤做乜無厘神氣咁呀?!

放B仔入個"濃"度, 佢都無有怕, 仲要膽生毛呀~~ 雖然 "i" 住遮, 竟然夠膽唔扶嘢企响樹喎!

從來無教過B仔爬樓梯, 唔知係咪本能, 佢竟然可以由地下爬到上頂, 勁呀! 未識行都咁有膽色, 識行時就真係大濟囉~~

當然唔止咁少嘢玩啦~~ 因為錄video多過影相呢~~

一小時好快就過去! 跟住去咗旺角食嘢就返屋企!

明天同B仔班朋友仔gathering~~ 好期待呀!!! 上次見已是佢地四個月大時, 今回個個都識爬識玩, 唔知佢地會唔會好開心呢! hehe........