24 Feb 2008
一早瞓醒覺嘅B仔, 瞓到出晒汗, 夏天點算?! =.="""""
呢輪隻腳仔唔知做乜, 成日都放隻腳係另一隻腳嘅腳指公同"腳食指"中間! 咁樣好舒服嘅咩?!
家陣唔鍾意食手指公, 鍾意食隔離個兩隻, 仲要食到得得戚戚咁! =.=""""""""""""""""""""
又一新造型! 真係笑爆嘴呀! 
小朋友讀書有茶點時間, B仔都黎個小茶點先~~ 兩仔爺一齊茶點, 一齊刨電視, 表情一致, 笑到B仔媽肚痛呢~~
2008年2月19日 星期二
2008年2月17日 星期日
2008年2月16日 星期六
無聊星期日
17.2.2008
今朝B仔九點幾就瞓醒, 十點起身餵佢食米糊, 一邊食, 一邊等爸爸返屋企!
B仔一邊睇叮噹一邊嘆糊仔, 係度享受人生! B仔食到個嘴好似生鬚咁, Haha…… 好叻叻呀! 食咗一飯碗糊仔呀! 餵到媽媽手軟~~ 成日係度諗, 咩方法至可以一邊暖住d糊仔一邊餵! 仲未諗到方法......
爸爸一返到黎見到咁, 即刻話做乜食到咁污糟 = =”””
食飽飽又坐係sofa嘆電視~~
之後嫲嫲又到~~ 坐咗一輪就回歸! 我地一家三口去買餸!
買完餸就咋咋臨同B仔沖涼~~ 沖完涼又食奶, 食完奶又氹佢瞓, 氹咗佢瞓又搞下d餸, 又拖下地, 瞓醒又要同B仔玩下...... 好忙!
夜晚食飽飽就湊B仔返婆婆度~~
正當我地開飯時, B仔又係度嘈嘈嘈啦~~~
是日晚餐有……
蕃茄沙律菜 (情人節晚餐煮淨, 自家調製沙律汁, 酸咗d, 但爸爸話好香)
栗子花生木瓜煲雞腳 (好正, 好甜, 好好味呀~~)
蒸水蛋 (又失敗咗~~ 又唔記得加蓋蒸~~)
焯油菜心
好辛苦呀~~
16.2.2008
今日爸爸返工, 尋晚照顧B仔既責任就落在我手, 又係好似無乜點瞓咁, B仔間唔使就"ai"下, 搞到瞓下又醒下!
今朝去食咗個早餐, 就同B仔去咗沙田, 本應都唔係咁想去, 但為咗去Citysuper買罐糊仔, 唯有走一趟!
跟住買咗盒餅仔, 我估應該係for 6個月食, 但又身痕想買, 於是買返去俾B仔試下!
跟住幫B仔婆婆去西田買嘢! 最後兩袋超巿袋返歸!
今日係B仔第一次啜餅仔, 當然啜咗少少, 跟住俾佢媽媽我食咗! Hehe......
仲有第一次用匙羹食糊仔, 呢隻糊仔好香呢~~ B仔係咁搭, 好似食得好滋味咁! 但係食食下又發癲, 因為扭眼瞓......
好攰呀~~~ B仔越大, 湊佢就越攰, 真係辛苦婆婆囉~~ 一至五都咁辛苦地照顧B仔!
B仔回歸日
15.2.2008
今日公公婆婆帶咗B仔出街, 之後湊咗佢返企, 婆婆仲同B仔沖埋涼至返屋企呢~~
婆婆都好擔心爸爸湊唔湊得掂B仔, 其實有幾難, 唔係食就係瞓, 一係就扭計! haha.....
放工去咗買餸, 跟住就咋咋臨返歸見下我個寶貝仔啦~~ 一入屋, 見到B仔, 點解又少咗頭髮架?????????? 係咪應該帶B仔剪下髮呢?????????
熟睡中既B仔, 好可愛呢~~ 之但係瞓之前就成日都扭計, 要扭一大輪至捨得瞓!
是日晩餐有......
蕃茄腸仔蛋炒飯 (爸爸傑作)
煎豬仔脾 (唔知點解, 我煎親嘢都唔熟既~~ 都煎咗好耐啦, 又用針篤過, 結果要蒸返熟佢至食 - -)
仲有爸爸至愛既滾節瓜湯~ 魚肉都加埋價, 最少要買6蚊 = =
乜都加價, 真係分分鐘出街食仲平過自己煮!
尋日買咗盒韓國士多啤梨都唔記得食, 留返今晚食! 都係日本好食D, 雖然韓國都唔差~~
2008年2月14日 星期四
情人節
14 Feb 2008
今日係情人節, 但對於我黎講, 都只不過係一個平常嘅日子! 無花無禮物無surprise, 乜都無! 預咗!
雖然自己無花收, 但見到同事們有花收, 都好替她們開心呢~~
自己唯有返屋企, 睇下自己買嘅年花先~~ haha...... 終於開花! 仲諗住d百合咁平唔會開添~~
今晚餐餸已買定, 所以放工返到屋企樓下, 同埋爸爸去咗睇王大夫, 因為張師奶對腳又發癲, 痕到爆炸, 好似之前坐月時個d痕, 出晒一粒粒, 加上過年時食得煎炸嘢多, 有點燥熱!
而爸爸, 初初唔肯睇大夫呀! 差d講到我發爛咋至肯睇大夫! 因為佢鼻竇炎多年, 又一直唔睇醫生, 又擔心唔知拖咗咁耐會唔會唔妥, 咪叫佢一齊睇大夫囉~~
好在睇一睇咋~~ 王大夫話爸爸個鼻入面生咗細粒息肉呀!!! 應該係啱啱至起~~ 若耐咗唔理會發大, 大粒會搞到個鼻變型架~~
睇大夫睇到差不多八點至返歸煮晚餐!
是晚自製情人晚餐有~~
真係大殺風景, 爸爸用報紙黎墊枱 = =
蒜蓉飽 (唔知係咪蒜蓉多得濟, 有點兒辣, 但爸爸話吾覺)
南瓜忌廉湯 (唔知點解, 唔似街個d成碗燈色?! 唔通要用攪拌機攪下佢?!)
香煎牛肋條并芝士焗大蝦 (d牛煎得生得濟, 但爸爸就話剛剛好, 芝士焗大蝦好正, 但唔明點解塊芝士焗咗都溶唔晒?!)
就這樣平平靜靜咁渡過呢個情人節!
2008年2月12日 星期二
年初五
11 Feb 2008
今日本來要返工架啦~~ 但拎咗假! hehe......
朝早瞓醒就落咗樓下飲茶, 搭枱兩位公公婆婆抱住個BB同B仔差唔多大, 大過B仔十幾日, 又係好得意, 皮膚黑黑實實咁, 不停咁啜手指, 啜得好滋味!
個BB已經出咗牙仔啦~~ 但B仔就一d動靜都未有 
個婆婆話見B仔成日伸脷, 應該都好快出牙!
飲完茶就返歸! 跟住收到哈哈媽咪寄黎上次BB Gathering嘅禮物! 真係唔該晒哈哈媽咪!
十一點幾B仔拉屎, 就咋咋臨同佢白白豬, 呢幾日B仔日日都有屎痾, 但之前通常隔日至一次, 初二零晨四點幾就送d"金"俾媽媽嘆, 精神為之一振! 初三晏晝又一篤! 但係B仔開大係無樣睇 
沖完涼又食飽奶, 瞓咗成兩三個鐘, 勁!
三點幾就去咗三伯三伯娘屋企拜年!
B仔好叻叻, 食飽飽就瞓, 今晚終於有餐安樂茶飯食! B仔跳下瞓下三伯娘張床, 等佢咋咋臨生返個細佬或細妹同你玩! Haha......
今晚奶奶放咗工都黎咗食飯! 又再一次覺得佢唔妥我! 表面無嘢, 內裡...... 不過唔知唔妥我有多深, haha......
我見三嫂買咗張Little Twins Star地毯好靚, 咪問下幾錢, 嘩... 成六十幾蚊, 我話咁貴我唔捨得買, 跟住就有人搭嘴......
話我買d十零蚊一張嘅地毯唔襟用, 佢買d三十幾蚊就用好耐......
咁佢言下之意, 即係話我買埋晒d cheap嘢啦 
心諗有五蚊我買五添呀! 又唔係自己屋企用!
同埋我買十零蚊個d, 洗咗又無走樣, 又無甩色, 仲要上年過年前, 特登買d紅卜卜嘅, 費事買其他色又話乜又勿, 買黎換佢個堆幾十年都唔洗嘅地毯, 有無佢講得咁差呀?!
三哥三嫂就乜都好嘅~~ 間屋有大海景、大又大過我間屋(不過係大少少)、幅牆裂咗都唔係好大問題, 無嘢格......
佢自己間屋, 係人面前就係咁彈, 又話矮、又話嘈、又話住高d好d...... but...... 係我面前又話我間屋又乜又勿, 佢間屋至係好, 仲唔係對人講人話, 對神講神話?!
人地唔知, 以為係我問題添~~ 真係吹到脹一脹呀!!!
都唔知點解?! 三哥問爸爸點解唔返上水住, 唉........ 點解個個都咁架?! 唔返咪唔返囉?! 咁你又唔返?! 點解一定係我地返?! 間屋放係度無人住會"冧"嘅咩?!
赤口日
果然係赤口日, 晨早已蘊釀開戰, 夜晚開戰.........
點解未有自己的家時又煩, 到依家有啦, 就更加煩煩煩?
點解成日都要我地搬返佢間屋度住?
點解講極都唔聽, 都同佢表明咗立場, 唔會返去架啦, 點解仲要成日迫我地?
點解成日都對人講人話, 對神講神話架? 同我講就隨得我地, 過兩日又迫個仔?
點解咁都唔係叫迫? 咁叫咩?
點解乜都好似想我地順從佢咁?
點解乜都要理我地架? 係咪真係寂寞得濟無嘢諗呀?
點解成日話我間屋呢樣個樣? 我間屋真係咁令佢討厭?
點解成日話自己間屋好? 風水好、讀書好、環境好、夠矮......
點解三哥三嫂乜都係好? 而我......
點解老公唔老早同佢講唔搬返去? 等佢唔好再煩! 佢叫到就應承佢搬, 有無理過我感受? 真的非常極度唔想搬返去住! 跟本個個都唔係屬於自己的家!
點解成日都敷衍佢? 呢d唔係叫開空頭支票叫咩?
點解自己唔可以當乜都聽唔到? 可惜未到咁高境界! 唔係直接煩住我都覺得好...... 煩, 更何況係老公!
點解老公次次為呢d事嘈親都話我自私? 我係自私又點? 都想生活係一個自己鍾意, 有自己一家三口空間嘅環境遮~~ 咁都叫自私?!
點解老公未有自己的家時, 就好恨搬出去, 到依家搬咗去佢心水地方, 又話要搬返去?
點解結咗婚仲衰過未結婚? 諗住結咗婚唔駛俾媽咪管住, 點知, 結咗婚自己媽咪無管, 但就俾人地亞媽管?
點解我個仔讀書都要擔心? 唔通淨係上水至有書讀? B仔好似係我個仔, 駛唔駛幫我為B仔安排埋?
點解我地兩公婆成日為咗佢而嘈交架? 係咪家變至安樂? 還是我個人問題呀?
點解?! 點解?!
點解咁多點解架?!
點解呢d點解無解決方法架?!
點解會咁煩架?! 幾時至煩完呀?!
點解人叫做凡人, 搞到咁"煩"呀?!
年初四, 張B仔五個月大啦~~
10 Feb 2008
B仔今日五個月大啦~~ 時間過得真快呀!!! 但係仲未出牙, 未識轉身, 最鍾意係啜手指同卒腳 = =
下晝去咗元朗同橄欖人姨姨拜年! 路過恒香, 買咗盒蛋卷, 好耐好耐都無食過蛋卷啦~~ 好想食! 一罐細嘅都唔平, 大拿拿42蚊! 但好好味! hehe...
之後出咗荃灣, 去咗B仔嘅舅婆太(即媽媽嘅舅婆)屋企拜年!
去到無嘢做, 同埋舅父仔&Ming姐姐行咗落去四面佛度逛下!
逛完返返去舅婆太度, B仔瞓到豬的一樣呀~~
食埋晚飯就車咗公公婆婆返屋企!
舅婆太仲俾咗盒朱古力我地呢~~
返到屋企咋咋臨同B仔沖個靚涼! 有史以黎最晏沖涼兼沖得咁快呢~~
2008年2月11日 星期一
年初三
9 Feb 2008
今日珊契媽同未來契爺黎拜年, 買咗好多禮物, 珊契媽, 你下次唔好買嘢黎呀~~ 如果唔係, 我唔開門你入屋架!!!
睇下珊契媽買咗d乜俾B仔?!
禮物1: Disney投影
禮物2: Precious Moments 靚靚相架, 好得意呀! 要搵張靚相放入去至得!
禮物3: Precious Moments 靚靚相簿(真係啱啦~~ B仔d相晒咗都未買相簿入)
呢個B仔有個咁鍚佢嘅契媽, 真係大個仔要
返啖珊契媽至得!
B仔又係度睇電視, 睇到佢幾專注
臨瞓前開咗珊契媽送嘅Disney投影, 嘩~~ 好靚呀! B仔係咁追住黎睇呀!
今晚係屋企煮飯仔...
美極煎蝦(唔知點解落咗好多美極都唔多夠味)
牛仔骨
清炒紹菜
心情唔靚, 煮咩都唔多正!
訂閱：
意見 (Atom)